આ પણ વાંચો ટ્રેન્ડિંગ સમાચાર
Jamnagar Crime : જામનગરના બેડી વિસ્તારમાં એક યુવાને પ્રેમ લગ્ન કરી લીધા પછી બંને પરિવારો વચ્ચે ગઈ રાત્રે ધીંગાણું થયું હતું, અને બંને પક્ષે સામ સામે હુમલા કરવામાં આવ્યા હતા. જેમાં બંને પક્ષની પાંચ વ્યક્તિ ઘાયલ થઈ છે. આ બનાવ મામલે બંને પક્ષ દ્વારા સામસામે પોલીસ ફરિયાદ નોંધાવવામાં આવી છે.
આ ફરિયાદ અંગેના બનાવની વિગત એવી છે કે જામનગરના બેડી વિસ્તારના ગરીબ નગર વિસ્તારમાં રહેતા અને ડ્રાઇવિંગ કામ કરતા અક્રમ ઉર્ફે જહાંગીર અબ્દુલભાઈ કક્કલ નામના 25 વર્ષના યૂવાને પોતાના ઉપર લોખંડના પાઇપ અને ધોકા વડે હુમલો કરી ઇજા પહોંચાડવા અંગે પાડોશમાં રહેતા રહીમભાઈ, કરિમભાઈ, સુલતાનભાઈ, ઇમરાન ભાઈ તથા સિકંદર વગેરે પાંચ શખ્સો સામે ફરિયાદ નોંધાવી છે.
આ હુમલા સમયે પોતાને છોડાવવા માટે આવેલી પોતાની બહેન ફરજાના ઉપર પણ લોખંડના પાઇપ વડે હુમલો કરી દેતાં તેણીને ઈજા થઈ છે. ભાઈ બહેન બંનેનું માથું ફૂટ્યું હોવાથી સારવાર માટે જામનગરની સરકારી જી.જી. હોસ્પિટલમાં ખસેડવામાં આવ્યા છે, અને ત્યાં બંનેને માથામાં ટાંકા લેવા પડ્યા છે.
આ ઉપરાંત સામા પક્ષે અબ્દુલ રહીમ મોહમ્મદભાઈ બુચડ નામના ૩૫ વર્ષના વાઘેર યુવાને પોતાના પરિવારના ત્રણ સભ્યો ઉપર લોખંડના પાઇપ-ધોકા જેવા હથિયારો વડે હુમલો કરવા અંગે પાડોશમાં રહેતા અક્રમ ઉર્ફે જહાંગીર તેમજ ફીરોજા બહેન, યાસ્મીનબેન, જીન્નતબેન, ફારૂકભાઈ અને આરીફભાઇ વગેરે છ શખ્સો સામે વળતી ફરિયાદ નોંધાવી છે. જે ત્રણેય ઇજાગ્રસ્તને પણ જામનગરની સરકારી જી.જી. હોસ્પિટલમાં સારવાર અપાઇ છે. જેઓને પણ માથામાં અને શરીરના અન્ય ભાગોમાં ઈજા થઈ છે, અને ટાંકા લેવા પડ્યા છે.
પોલીસ ફરિયાદમાં જાહેર કરાયા અનુસાર ફરિયાદી અબ્દુલરહીમ મોહમ્મદના ભાઈએ આરોપી જીન્નતબેનની પુત્રી સાથે લવ મેરેજ કરી લીધા હોવાથી બંને પરિવારો વચ્ચે મનદુઃખ ચાલતું હતું, અને આ બાબતે તકરાર થઈ હોવાને કારણે સામસામાં હુમલા કરાયાનું પોલીસ ફરિયાદમાં જાહેર થયું છે. જે મામલે સિટી બી. ડિવિઝનની પોલીસ ટીમ વધુ તપાસ ચલાવી રહી છે.
