આ પણ વાંચો ટ્રેન્ડિંગ સમાચાર
Jamnagar Weather : જામનગર શહેર અને જિલ્લામાં ગઈકાલથી અચાનક હવામાનમાં પલટો આવ્યો છે, અને ગઈકાલ સાંજથીજ બરફીલો ઠંડો પવન શરૂ થયો હતો, સાથો સાથ આજે વહેલી સવારે ગાઢ ધૂમમ્સની ચાદર છવાઈ ગઈ હતી, અને ઝાકળભીની સવાર થવાના કારણે માર્ગો પરથી પાણીના રેલા ઉતર્યા હતા.
ગઈકાલે સવારે ઠંડીનો પારો 17 સ્થિર થયો હતો, પરંતુ આજે તેમાં અચાનક ઘટાડો નોંધાયો છે, અને 14.5 ડીગ્રી તાપમાન સાથે વાતાવરણમાં ઠંડક પ્રવેશી છે, જ્યારે ભેજનું પ્રમાણ ગઈકાલે સવારે 73 ટકા રહ્યું હતું, પરંતુ તેમાં આજે એકદમ વધારો થયો હતો, અને મોડી રાત્રી થીજ ગાઢ ધુમ્મસની ચાદર છવાઈ હતી, અને ભેજનું પ્રમાણ 86 ટકા થઈ જતાં વીઝીબીલીટી જીરો થઈ ગઈ હતી, અને વહેલી સવારે ઝાકળનો વરસાદ થયો હોવાથી વાહન ચાલકો પરેશાન થયા હતા. જામનગરમાં સૂર્યદેવતાના દર્શન પણ મોડા થયા હતા, અને વાઇપર તેમજ લાઈટો ચાલુ રાખીને વાહન ચલાવવાનો વારો આવ્યો હતો. આ ઉપરાંત પવનની તીવ્રતા પણ વધી ગઈ હતી, અને ગઈકાલે મોડી સાંજથી પ્રતી કલાકના 25 થી 30 કિ.મી.ની ઝડપે પવન ફૂંકાયો હતો, જેથી લોકોએ ફરીથી ઠંડીનો અહેસાસ કર્યો છે, અને ઠંડીનો ચમકારો વધી ગયેલો જોવા મળ્યો છે.
જામનગર જિલ્લા કલેકટર કચેરીના કંટ્રોલરૂમના જણાવાયા અનુસાર આજે સવારે 8.00 વાગ્યે પૂરા થતા 24 કલાક દરમિયાન લઘુતમ તાપમાન 14.5 ડિગ્રી સેન્ટિગ્રેડ જ્યારે મહત્તમ તાપમાન 29.0 ડિગ્રી સેન્ટિગ્રેડ નોંધાયું છે. વાતાવરણમાં ભેજનું પ્રમાણ 83 ટકા રહ્યું હતું, જ્યારે પવનની ગતિ સરેરાશ પ્રતિ કલાકના 20.0 થી 25.0 કિ.મી.ની ઝડપે રહી હતી.
