આ પણ વાંચો ટ્રેન્ડિંગ સમાચાર
સપ્લાયર તરીકે મેંદરડાના શખ્સનું નામ ખૂલ્યું : મેંદરડા અને રાજકોટના શખ્સને રૂ 5 અને રૂ. 7 લાખનું કમિશન મળવાનું હતું
રાજકોટ, : ગોંડલ રોડ પર આવેલી હોટલની બહારથી માલવિયાનગર પોલીસે 970 ગ્રામ વ્હેલ માછલીની ઉલટી સાથે કાળુ નાગજીભાઈ કયાડા (ઉ.વ. 60, રહે. માનપુર, તા. મેંદરડા) અને પ્રફુલ શૈલેષભાઈ ટોળિયા (ઉ.વ. 33, રહે. અંકુરનગર શેરી નં. 8)ને ઝડપી લીધા હતાં.હવે આ કેસની તપાસ નિયમ મુજબ વન વિભાગ કરશે.
ચોક્કસ બાતમીના આધારે માલવિયાનગર પોલીસે બંને આરોપીઓને સકંજામાં લઇ તેમની પાસે રહેલા ડબ્બામાં તપાસ કરતાં 970 ગ્રામ વ્હેલ માછલીની ઉલટી કે જે એમ્બરગ્રીસ તરીકે ઓળખાય છે તે મળી આવી હતી. એફએસએલ પાસેથી ખાતરી કર્યા બાદ બજાર કિમત મુજબ રૂ. 97 લાખની એમ્બરગ્રીસ પોલીસે કબજે કરી હતી.
બંને આરોપીઓના મોબાઇલ ફોન પણ જપ્ત કર્યા હતાં. હાલ પોલીસે જાણવાજોગ નોંધ કરી છે. પોલીસની પ્રાથમિક તપાસમાં એવું ખૂલ્યું છે કે મેંદરડાનો કાળુ નામના શખ્સ ગઇકાલે બપોરે ગોંડલ રોડ પરના પેટ્રોલ પંપ પાસે પકડાયેલા કાળુને એમ્બરગ્રીસનો જથ્થો આપી ગયો હતો. જેથી સાંજે કાળુ આ એમ્બરગ્રીસનો જથ્થો પ્રફુલને આપવા ગોંડલ રોડ પર પહોંચ્યો હતો. બંને મળ્યા તે સાથે જ બાતમીના આધારે પોલીસે ઝડપી લીધા હતા.
ઝડપાયેલા કાળુને એમ્બરગ્રીસની હેરાફેરી કરવા બદલ કમિશન પેટે રૂ. 5 લાખ મળવાના હતા. જ્યારે બીજો આરોપી પ્રફુલ જો વેચાણ કરાવી આપે તો તેને કમિશન પેટે રૂ. 7 લાખ મળવાના હતાં. એમ્બરગ્રીસ આપી જનાર કાળુ પાસે તે ક્યાંથી આવ્યું તે વિશે હાલ પોલીસને કોઇ માહિતી મળી નથી. વન વિભાગની તપાસમાં આ માહિતી ખૂલે તેવી સંભાવના છે. પ્રફુલ એમ્બરગ્રીસ લીધા બાદ કોને આપવાનો હતો તે દિશામાં પણ પોલીસે તપાસ હાથ ધરી છે. ઉલ્લેખનીય છે કે આ અગાઉ શહેરમાંથી એસઓજીએ એમ્બરગ્રીસનો જથ્થો કબજે કર્યો હતો.
