આ પણ વાંચો ટ્રેન્ડિંગ સમાચાર
Gujarat MLAs May Get Allowance Hike : થોડાક વખત પહેલાં જ બધા ધારાસભ્યોને માસ્ટર રૂમ, લિવિંગ રૂમ સાથે અન્ય આધુનિક સુવિધાથી સજ્જ લક્ઝુરિયસ ફ્લેટ સુપરત કરાયા છે. હવે આ જ ધારાસભ્યોના મુસાફરી સહિત અન્ય ભથ્થાં વધારવા માટે પણ સરકારે વિચારણા હાથ ધરી છે. નાના મુદ્દે મતમતાંતર ધરાવતા શાસક પક્ષ અને વિપક્ષના ધારાસભ્યો સુવિધા અને લાભ મેળવવામાં એકમત ધરાવે છે. પ્રજા અનેક સમસ્યાઓથી પીડાઈ રહી છે જ્યારે ધારાસભ્યો પ્રજાના ટેક્સના પૈસે જલસા કરી રહ્યા છે. બધી જ સુખસુવિધાઓ મેળવી રહ્યા છે. થોડાક વખત અગાઉ જ જર્જરિત સદસ્ય નિવાસ ખાલી કરીને ભાજપ, કોંગ્રેસ અને આપના ધારાસભ્યોને લક્ઝુરિયસ ફ્લેટ આપવામાં આવ્યા છે. ગાંધીનગરમાં ધારાસભ્યો માટે કુલ 216 લક્ઝુરિયસ ફ્લેટ તૈયાર કરાયા છે.
દૂધની થેલી કરતાં પણ ઓછું ભાડું!
લક્ઝુરિયસ ફ્લેટનું મહિનાનું ભાડું દૂધની એક થેલી કરતાં પણ ઓછું છે. ધારાસભ્યોને માસિક માત્ર મહિને રૂ.37.50 રૂપિયાના ભાડે મોર્ડન ફ્લેટ અપાયા છે. ધારાસભ્યોને પ્રતિ લિટર પેટ્રોલના રૂ. 11, ડીઝલના રૂ. 10 અને સીએનજીના રૂ. 9 લેખે કાર એલાઉન્સ પણ ચૂકવાય છે. ઉલ્લેખનીય છે કે, મોટાભાગના ધારાસભ્યો લેટેસ્ટ મોડેલની મોંઘી કારો લઈને સચિવાલય-વિધાનસભા આવે છે.
ધારાસભ્યોના લક્ઝુરિયસ ફ્લેટમાં કેવી સુવિધાઓ છે?
ગાંધીનગરમાં ધારાસભ્યો માટે લક્ઝુરિયસ ફ્લેટ તૈયાર કરાયા છે જેમાં બે માસ્ટર-લિવિંગ રૂમ, 43 ઈંચનું એલઈડી ટીવી ટેબલ નેટવર્ક સાથે ત્રણ બેડરૂમ, રસોડું, ડાઈનિંગ એરિયા, ઓફિસ રૂમ, વેઈટિંગ રૂમ, બાલકની, ડ્રેસિંગ રૂમ, બાથરૂમ અને ટોઈલેટ અને 1 સર્વન્ટ રૂમ છે. ફ્લેટના સંકુલમાં બે લેન્ડસ્કેપ ગાર્ડન, પ્લે એરિયા, એક ઓડિટોરિયમ, હેલ્થ ક્લબ, કેન્ટીન, કોમ્યુનિટી હોલ, સ્વિમિંગ પૂલ સહિતની સુવિધાઓ ઉપલબ્ધ કરાવાઈ છે.
લક્ઝુરિયસ ફ્લેટ મળ્યા બાદ હવે ધારાસભ્યોના ભથ્થાં વધશે
આ સુવિધા અપાયા બાદ હવે ધારાસભ્યોને મળતા મુસાફરી ઉપરાંત અન્ય ભથ્થા વધારવા માટે વિધાનસભા ખાતે સમિતિની બેઠક યોજાઈ હતી. આ બેઠકમાં ધારાસભ્યોના રેલવે અને હવાઈ મુસાફરીના ભથ્થા, કાર્યાલય સહિત અન્ય ભથ્થા વધારવાની સંભાવના પર ચર્ચા કરાઈ હતી. પ્રજાની સેવા કરનારા ધારાસભ્યોને હવે ભથ્થાંની રકમ પણ પોષાતી નથી. હાલ ધારાસભ્યોને મોંઘવારી ભથ્થું, વિધાનસભા સત્રમાં હાજરી આપે તો ભથ્થું, પ્રવાસ ભથ્થું અને મુસાફરી ભથ્થું પણ ચૂકવાય છે. આ ઉપરાંત અન્ય રાજ્યોના ધારાસભ્યોના મળતા ભથ્થાની સમીક્ષા પણ કરવામાં આવી હતી જેથી ગુજરાતમાં ધારાસભ્યોને કેટલું ભથ્થું વધારી શકાય તેનો અંદાજ આવી શકે. સરકાર સાથે પરામર્શ કર્યા પછી ભથ્થા વધારાનો નિર્ણય લેવાશે. એવું પણ જાણવા મળ્યું છે કે, 16થી ગુજરાત વિધાનસભાનું બજેટ સત્ર મળવા જઈ રહ્યું છે ત્યારે સમિતિ ફરી મળશે.
હાલ ધારાસભ્યોને કયા ભથ્થા મળે છે?
મોંઘવારી ભથ્થું
ટેલિફોન ભથ્થું
કાર્યાલય રેલવે-હવાઈ મુસાફરી ભથ્થું
વિધાનસભા સત્ર-સમિતિની બેઠકમાં હાજરી આપે તો ભથ્થું
