આ પણ વાંચો ટ્રેન્ડિંગ સમાચાર
Ahmedabad News: અમદાવાદના અસલાલીમાં આવેલ તીરૂપતી એસ્ટેટમાં લાખો રૂપિયાની ચોરીનો બનાવ સામે આવ્યો છે. અહીં આવેલી નામાંકિત પાનમસાલા કંપનીના ગોડાઉનનું શટર તોડીને તસ્કરો લાખો રૂપિયાનો પાનમસાલાનો જથ્થો અને ઈન્ટરનેટના સાધનો ઉઠાવી ગયા છે. વહેલી સવારે બનેલી આ ઘટનાને પગલે ચકચાર મચી ગઈ છે અને પોલીસ દ્વારા આ મામલે ફરિયાદ નોંધીને સીસીટીવી ફૂટેજના આધારે ચોરોને પકડી પાડવા તપાસ શરૂ કરવામાં આવી છે.
વહેલી સવારે ચોરીને અંજામ
આ અંગે કંપનીના ગોડાઉનમાં છેલ્લા 11 વર્ષથી મેનેજર તરીકે નોકરી કરતા 56 વર્ષીય મહાવીરકુમાર ભંવરલાલ જૈને પોલીસમાં ફરિયાદ નોંધાવી છે. તારીખ 05/04/2026ના રોજ સવારે સવા છ વાગ્યે કંપનીના સબ-કોન્ટ્રાક્ટરમાં કામ કરતા કર્મચારીએ તેમને ફોન કરીને ગોડાઉનનું શટર તૂટેલું હોવાની જાણ કરી હતી. ત્યારબાદ તેઓ અને કંપનીના અન્ય અધિકારીઓ ગોડાઉને દોડી ગયા હતા. સીસીટીવી ફૂટેજ ચેક કરતા જાણવા મળ્યું હતું કે વહેલી સવારે 4:00 થી 4:40 વાગ્યાના અરસામાં 4 થી 5 જેટલા અજાણ્યા શખ્સો બોલેરો પીક-અપ ડાલામાં આવ્યા હતા અને ગોડાઉનનું શટર ઊંચું કરી, અંદર પ્રવેશીને ચોરી કરી હતી.
કઈ કઈ વસ્તુઓની ચોરી?
તસ્કરોએ અસલાલીના તીરૂપતી એસ્ટેટ સ્થિત ગોડાઉનમાંથી કુલ રૂપિયા 44,92,370ની ચોરી કરી બોલેરો પીકઅપમાં ભરીને ફરાર થઈ ગયા હતા. ચોરી થયેલ સામાનમાં પાનમસાલા (2.2 ગ્રામ)ના 13 બોક્સ અને પાનમસાલા (4 ગ્રામ)ના 65 બોક્સ (કિં.રૂ. 34,81,859), પાનમસાલા (100 ગ્રામ)ના 04 બોક્સ (કિં.રૂ. 1,81,944), તુલસી જર્દા (0.25 ગ્રામ)ના 06 બોક્સ (કિં.રૂ. 1,28,907), તુલસી જર્દા (0.45 ગ્રામ)ના 02 બોક્સ (કિં.રૂ. 51,657) અને તુલસી રોયલ ખજૂરની ડબ્બીના 06 બોક્સ (કિં.રૂ. 48,003) મળીને કુલ 96 બોક્સ (કિં.રૂ. 44,47,370)નો સમાવેશ થાય છે.
કુલ 44.92 લાખથી વધુનો મુદ્દામાલ ચોરી ગયા
આ ઉપરાંત, ગોડાઉનની ઓફિસમાં લગાવેલા ઇન્ટરનેટ રાઉટર તથા ઈન્ટરનેટ સ્વીચની પણ ચોરી થઈ હતી, જેની અંદાજિત કિંમત રૂપિયા 45,000 છે. આમ, તસ્કરો કુલ 44.92 લાખથી વધુનો મુદ્દામાલ ચોરી ગયા હોવાની ફરિયાદ પોલીસ ચોપડે નોંધાઈ છે.
આ પણ વાંચો: ગાંધીનગર: GIDCના બંધ ગોડાઉનમાંથી રૂ. 37.75 લાખનો વિદેશી દારૂ ઝડપાયો, બાતમીના આધારે SOGની કાર્યવાહી
પોલીસે તપાસ શરૂ કરી
અસલાલી પોલીસે આ મામલે ગુનો નોંધીને તપાસના ચક્રો ગતિમાન કર્યા છે. પોલીસે એસ્ટેટના તેમજ આસપાસના માર્ગો પરના સીસીટીવી ફૂટેજ કબજે કર્યા છે. બોલેરો પીક-અપના નંબર અને શંકાસ્પદ શખ્સોના ચહેરાઓના આધારે પોલીસની અલગ-અલગ ટીમો તસ્કરોનું પગેરું દબાવી રહી છે. ઔદ્યોગિક વિસ્તારમાં બનેલી આ ઘટનાને પગલે સ્થાનિક વેપારીઓમાં પણ ફફડાટ ફેલાયો છે.
