આ પણ વાંચો ટ્રેન્ડિંગ સમાચાર
મુંબઈ : ઈરાન -ઈઝરાયલ યુદ્ધને પરિણામે કેટલીક ઊભરતી બજારો માટે ઊર્જા આયાત, રેમિટેન્સિસ તથા વિનિમય દરો જેવા વધારાના પડકારો ઊભા થઈ શકે છે એમ રેટિંગ એજન્સી ફીચ દ્વારા એક રિપોર્ટમાં જણાવાયું હતું.
અમેરિકા તથા ઈઝરાયલ દ્વારા ૨૮ ફેબુ્રઆરીના શરૂ કરાયેલા હુમલા સામે ઈરાન જોરદાર વળતા પ્રહાર કરી રહ્યું છે.
અખાતી વિસ્તારમાંથી વૈશ્વિક ઊર્જા પૂરવઠામાં અપેક્ષા કરતા વધુ સતત ખલેલ વૈશ્વિક રોકાણકારોના માનસ પર અસર કરી શકે છે.
આને કારણે ડોલર મજબૂત બનશે અને ઋણ સાધનો જાહેર કરવા માટે બજાર વધુ નબળી બનશે. ઊર્જાના ઊંચા ભાવથી ફુગાવામાં વધારો થશે જે વૈશ્વિક સ્તરે નાણાં નીતિના નિર્ણયો પર અસર પાડશે, એમ રિપોર્ટમાં નોંધવામાં આવ્યું છે.
યુદ્ધને કારણે ઓઈલ તથા ગેસની આયાત પર સીધી અસર પડી રહી છે.ભારત જેવા મોટા અર્થતંત્રો માટે ઈંધણની નેટ આયાત જીડીપીના ૩ ટકા કે તેનાથી વધુ રહે છે.
ઊર્જા આયાતો, રેમિટેન્સ, રાજકોષિય સબ્સિડી તથા વિનિમય દરો પર આધારિત કેટલીક ઊભરતી બજારો માટે આ યુદ્ધ વધારાના પડકારો ઊભા કરી શકે છે.
હોર્મુઝ ખાડી એક મહિના કરતા ઓછા સમય સુધી બંધ રહેશે અને તેલ ઉત્પન્ન કરતા માળખાઓને મોટી નુકસાની અટકાવાશે તો, ઊભરતી બજારોના રેટિંગ્સને કાબુમાં રાખી શકાશે, એમ પણ રિપોર્ટમાં નોંધવામાં આવ્યું છે.
ઊર્જાના ભાવ લાંબો સમય સુધી ઊંચા જળવાઈ રહેશે તો ઊભરતી બજારો પર બહારી તાણમાં વધારો થશે.
