આ પણ વાંચો ટ્રેન્ડિંગ સમાચાર
Gujarat Weather Update: ગુજરાતના વાતાવરણમાં આવેલા અચાનક પલટાએ ખેડૂતો અને સામાન્ય જનજીવનને મુશ્કેલીમાં મૂકી દીધું છે. હવામાન વિભાગની આગાહી વચ્ચે રાજ્યના કચ્છ, અમદાવાદ, મોરબી, રાજકોટ સહિત અનેક જિલ્લાઓમાં સાંજે 4 વાગ્યા બાદ કમોસમી વરસાદ (માવઠું) અને ભારે પવન ફૂંકાતા ખેતીના પાકને વ્યાપક નુકસાન થયું છે.
કચ્છમાં મિનિ વાવાઝોડું ત્રાટક્યું
કચ્છના વાગડ અને પશ્ચિમ કચ્છમાં કુદરતનો બેવડો માર જોવા મળ્યો છે. રાત્રે ફૂંકાયેલા મિની વાવાઝોડા બાદ આજે સાંજે પણ મિનિ વાવાઝોડા જેવી સ્થિતિ સર્જાઇ છે, અનેક વિસ્તારોમાં કરા સાથે વરસાદ ખાબક્યો છે. પવનના જોરને કારણે કંડલામાં મોબાઈલ ટાવર ધરાશાયી થયો છે, તેમજ કંડલા પોર્ટ પર લાકડાનો જથ્થોને કન્ટેન્ટરને પવનના સુસવાટાના કારણે ભારે નુકસાન થયું છે. નખત્રાણા, લખપત અને અબડાસામાં વરસાદને કારણે વરિયાળી, ઈસબગુલ, એરંડા અને ઘઉંના પાકને ભારે નુકસાન થતા ખેડૂતો ચિંતાતુર બન્યા છે.
કચ્છમાં કમોસમી કહેરની તસવીરો
અમદાવાદમાં આંધી
રાજ્યનું આર્થિક પાટનગર ગણાતા અમદાવાદમાં વરસાદ કરતા પવનનું જોર વધુ જોવા મળ્યું. અમદાવાદ શહેર અને જિલ્લાના અનેક વિસ્તારોમાં વાતાવરણમાં પલટો જોવા મળ્યો છે. સમી સાંજે આંધી આવતા શહેર પર ધૂળની ડમરીઓનું રાજ જોવા મળ્યું, સિંધુભવન રોડ સહિત અનેક વિસ્તારોમાં તોતીંગ વૃક્ષો ધરાશાયી થયા હતા. ગત મોડી રાત્રે પવન એટલો તેજ હતો કે અનેક જગ્યાએ સાઈનબોર્ડ અને હોર્ડિંગ્સ નીચે પડ્યા હતા. AMCની ટીમ હાલ રસ્તાઓ સાફ કરવાની કામગીરી કરી રહી છે.
રાજકોટ: પંથકમાં ભારે પવન સાથે વરસાદ
ગોંડલ, જેતપુર, ધોરાજી અને ઉપલેટા પંથકમાં પણ ભારે પવન સાથે માવઠું થયું છે. પવનની ગતિ વધુ હોવાથી અનેક સ્થળોએ વૃક્ષો પડવાના બનાવો નોંધાયા છે. રાજકોટમાં 1 ઈંચ જેટલો વરસાદ થયો હોવાનું અનુમાન છે.
જામનગર: અષાઢી જેવો માહોલ
જામનગરમાં ચૈત્ર માસમાં અષાઢ જેવો માહોલ સર્જાયો હતો. લાલપુરમાં 16મીમી અને અન્ય ગ્રામ્ય વિસ્તારોમાં અડધા કલાકમાં 1 ઇંચ જેટલો વરસાદ ખાબક્યો હતો. જીરું, લસણ, મેથી અને ચણા જેવા તૈયાર પાકો ખેતરમાં જ પલળી જતા મોંમાં આવેલો કોળિયો છીનવાઈ ગયો હોય તેવી સ્થિતિ સર્જાઈ છે.
કચ્છના 5 તાલુકામાં વરસાદ
સવારે ૦6.૦૦ થી સાંજના 16.૦૦ કલાક એટલે કે 4 વાગ્યામાં સુધીમાં ગુજરાતમાં નોંધાયેલા કમોસમી વરસાદની વિગતો મુજબ, સૌથી વધુ વરસાદ દેવભૂમિ દ્વારકાના ઓખામંડળ તાલુકામાં 0.79 ઈંચ નોંધાયો છે. ત્યારબાદ જામનગરના લાલપુર તાલુકામાં 0.63 ઈંચ અને કચ્છના મુંદ્રા તાલુકામાં 0.59 ઈંચ વરસાદ પડ્યો છે. કચ્છ જિલ્લાના અન્ય તાલુકાઓની વાત કરીએ તો, ભુજ માં 0.35 ઈંચ જેટલો વરસાદ થયો છે. જ્યારે નખત્રાણા, અબડાસા અને લખપત ત્રણેય તાલુકાઓમાં એકસમાન 0.31 ઈંચ વરસાદ નોંધાયો છે. આ વરસાદ મુખ્યત્વે બપોરે 2 થી 4 વાગ્યાના સમયગાળા દરમિયાન પડ્યો છે, જો કે લખપત માં બપોરે 12 વાગ્યાથી જ વરસાદની શરૂઆત થઈ ગઈ હતી.
મોરબી: પવનના સુસવાટા અને વીજ સંકટ
મોરબી જિલ્લામાં ભારે પવન સાથે ખાબકેલા કમોસમી વરસાદે અનેક જગ્યાએ નુકસાન કર્યું છે. નવલખી બંદર પર દરિયામાં કરંટ જોવા મળ્યો હતો અને તેજ પવનને કારણે કોલસાની ડમરીઓ ઉડતા વિઝિબિલિટી ઘટી હતી. અનેક જગ્યાએ પતરા ઉડવાના બનાવો પણ બન્યા છે. માળિયા મિયાણાના રાયસંગપર પાસે 400 કેવીનો વીજ ટાવર નમી પડતા વીજ પુરવઠો ખોરવાયો છે. વરસામેડી પંથકમાં વરસાદ પડતા મીઠાના ઉત્પાદન પર વિપરીત અસર પડી છે.
દેવભૂમિ દ્વારકા: ઓખામાં સૌથી વધુ વરસાદ
હવામાન વિભાગના આંકડા મુજબ આજે સવારથી સાંજ સુધીમાં દેવભૂમિ દ્વારકાના ઓખામાં સૌથી વધુ 20મીમી વરસાદ નોંધાયો છે, જેના કારણે નીચાણવાળા વિસ્તારોમાં પાણી ભરાયા હતા.
બનાસકાંઠા અને પાટણ: ઉત્તર ગુજરાતમાં ચિંતા
બનાસકાંઠા: થરા અને વડા સહિતના ગ્રામ્ય વિસ્તારોમાં વરસાદી ઝાપટા પડ્યા છે. બટાકા અને તમાકુના પાકને નુકસાન થવાની ભીતિ છે.
પાટણ (સાંતલપુર)
અહીં અગરિયાઓની સ્થિતિ કફોડી બની છે. ભારે પવનમાં અગરિયાઓના રહેણાંકના છાપરા ઉડી ગયા છે અને ઘરવખરીને નુકસાન થયું છે.
9 જિલ્લામાં રેડ ઍલર્ટ
હવામાન વિભાગના Nowcast(નાઉ કાસ્ટ)મુજબ, આજે(19 માર્ચ) દેવભૂમિ દ્વારકા, પોરબંદર, જામનગર, રાજકોટ, જૂનાગઢ, ગીર સોમનાથ, દીવ, કચ્છ, અમરેલી અને પાટણ જિલ્લામાં 62થી 87 કિ.મી.ની ઝડપે પવન ફૂંકાવવાની સાથે કમોસમી વરસાદને લઈને રેડ ઍલર્ટ જાહેર કર્યુ છે. જ્યારે મોરબી, સુરેન્દ્રનગર, બોટાદ, ભાવનગર, બનાસકાંઠા, સાબરકાંઠા, મહેસાણા, અમદાવાદ, ગાંધીનગર, અરવલ્લી અને મહીસાગર જિલ્લામાં 41થી 61 કિ.મી.ની ઝડપે પવન ફૂંકાશે. આ સાથે કમોસમી વરસાદ, મેઘગર્જના અને કરા પડવાની શક્યતા છે. તેમજ ખેડા, આણંદ, વડોદરા, પંચમહાલ, દાહોદ, છોટા ઉદેપુર, ભરૂચ, નર્મદા, સુરત, તાપી, ડાંગ, નવસારી, વલસાડ જિલ્લામાં યલો ઍલર્ટ જાહેર કર્યું છે.
