આ પણ વાંચો ટ્રેન્ડિંગ સમાચાર
સરપંચના ઘરમાં ઘુસીને યુવકને ગંભીર રીતે માર માર્યો
છરી, લાકડી જેવા હથિયારો વડે માર મારી ઈજા પહોંચાડી ધમકી આપી, સોનગઢ પોલીસ મથકમાં ૧૩ શખ્સો સામે ગુનો નોંધાયો
સિહોર: સિહોર તાલુકાના ભુતિયા ગામના યુવકનો પીછો કરી ૧૩ શખ્સોએ ગાડીનું ભાડુ કરવા મુદ્દે છરી અને લાકડી જવા હથિયારો વડે જીવલેણ હુમલો કરી ગંભીર ઈજાઓ પહોંચાડી જાનથી મારી નાખવાની ધમકી આપી હતી. બનાવ અંગે સોનગઢ પોલીસે ૪ અજાણ્યા સહિત કુલ ૧૩ શખ્સો સામે બીએનએસની જુદી-જુદી કલમો હેઠળ ગુનો નોંધી આગળની કાર્યવાહી હાથ ધરી છે.
સિહોર તાલુકાના ભુતિયા ગામે રહેતા તથા ગામમાં જ પાનનો ગલ્લો ચલવવાનો અને ઈકો ગાડીના ભાડા કરવાનો વ્યવસાય કરતા અલ્પેશભાઈ રામજીભાઈ ઢીલાએ સોનગઢ પોલીસ મથકમાં રાહુલ વસ્તાભાઈ લેલા, ભીમ રામભાઈ ભરવાડ, શૈલેષ, ગોપાલ મૈયાભાઈ લેલા, વિશાલ હરજીભાઈ લેલા, ભોળા રેવાભાઈ, સંજય ઉર્ફે લાખો ગોદડભાઈ હાજરા, ગૌરાંગ પોપટભાઈ લેલા અને અજાણ્યા ૪ શખ્સો સામે ફરિયાદ નોંધાવી હતી. જેમાં ગત તા.૨૪-૦૨ના રોજ તેમના ગામના વિપુલભાઈ ઈચ્છાભાઈનો ગાડી ભાડા માટે ફોન આવ્યો હતો અને તેમનું ગાડીનું ભાડૂ કર્યું હતું. જેની દાઝ રાખી ઉક્ત લોકોએ ગતરોજ સવારે ૧૦.૧૫ કલાકના અરસામાં સણોસરાથી તેમની દુકાનનો માલસામાન લઈને ઈકો ગાડીમાં પરત આવી રહ્યાં હતા ત્યારે ઉક્ત લોકોએ અગાઉથી કાવતરું રચી એક સંપ કરી તેમનો પીછો કરી ચાલુ ગાડીએ છરી ઘા કરી હાથમાં ઈજા પહોંચાડી હતી. ઉક્ત લોકોએ તેમનો પીછો કરતા તેમણે તુરંત તેમના ગામના સરપંચના પતિ ઘનશ્યામભાઈના ઘર તરફ જતાં રહી ત્યાં કારમાંથી ઉતરતા ઉક્ત લોકોએ લોકડીઓ વડે તેમને માર માર્યો હતો અને આ દરમિયાન તેઓ ઘનશ્યામભાઈના ઘરમાં જતા રહ્યાં અને ઘનશ્યામભાઈ વચ્ચે પડતા ઉક્ત લોકોએ બીજા દરવાજેથી ઘનશ્યામભાઈના ઘરમાં ઘુસી માર માર્યો હતો અને ઘનશ્યામભાઈ તથા અન્ય લોકો વચ્ચે પડી તેમને બચાવતા ઉક્ત લોકોએ તેમને જાનથી મારી નાખવાની ધમકી આપી ચાલ્યા ગયા હતા. બનાવ અંગે સોનગઢ પોલીસે બીએનએસની જુદી-જુદી કલમો હેઠળ ગુનો નોંધી આગળની કાર્યવાહી હાથ ધરી છે.
