આ પણ વાંચો ટ્રેન્ડિંગ સમાચાર
અમદાવાદ : ચાંદીના ભાવમાં વર્તમાન સમયે જોવા મળી રહેલી તેજીનો મોમેન્ટમ રોકાણકારોને ખુશ કરવા કરતા ચિંતામાં વધુ મુકી રહ્યો છે. સોનાની ધીમી મક્કમ ચાલ પણ હવે પાંચમા ગિયરમાં આવી પહોંચી છે અને ચાંદીમાં જાણે બ્રેક ફેલ થઈ ગઈ છે. એનકેન કારણે ચાંદીમાં રોજબરોજ ૪-૫ ટકાનો અણધાર્યો ઉછાળો હવે રોકાણકારોની ચિંતા વધારી રહ્યો છે.
આજે પ્રથમ વખત દિલ્હી સોના-ચાંદી બજારમાં અને એમસીએક્સ પર ચાંદીનો ભાવ પ્રતિ કિલોગ્રામ ૪ લાખ રૂપિયાના લેવલને વટાવી ગયો છે. ચાંદીએ ૨૯,૦૦૦ના ઉછાળા સાથે ૪ લાખ ૧૪ હજાર ૫૦૦નો નવો કીર્તિમાન સ્થાપ્યો છે. જોકે વ્હાઇટઓક મ્યુચ્યુઅલ ફંડના એક અહેવાલમાં આ તીવ્ર વધારા અંગે કેટલીક ચિંતાઓ વ્યક્ત કરવામાં આવી છે. ફંડ હાઉસનું કહેવું છે કે ચાંદીમાં જોવા મળી રહેલો આ વર્તમાન તેજીનો પવન ખૂબ જ ઝડપી અને સટ્ટાકીય લાગે છે. ચાંદીની આ અણધારી તેજી ભવિષ્યમાં મોટા કડાકાનું જોખમ ઊભું કરી રહી છે.
ચાંદીના ભાવ બે મહિનાના ટૂંકાગાળામાં ૨ લાખથી ૪ લાખ રૂપિયા સુધી પહોંચી ગયા છે. જોકે છેલ્લા ૧૦ દિવસમાં જ ૩ લાખથી ભાવ ૨૫ ટકા ઉછળીને ૪ લાખને પાર નીકળ્યા છે. વ્હાઇટઓક મ્યુચ્યુઅલ ફંડે ‘ગોલ્ડ ઇઝ ટોકિંગ, સિલ્વર ઇઝ સ્ક્રીમિંગ : અ કેસ ફોર પ્રુડન્ટ રિપોઝિશનિંગ’ શીર્ષક સાથે એક રિપોર્ટ બહાર પાડીને ચાંદીની તેજી પર પ્રશ્નાર્થ ઉભા કરીને મસમોટા કડાકાની આશંકા વ્યકત કરી છે.
રિપોર્ટમાં જણાવાયું છે કે સોના અને ચાંદીના ભાવ એવા તબક્કામાં પ્રવેશી ચૂક્યાં છે કે જ્યાં પોર્ટફોલિયો વ્યૂહરચના માટે બે ધાતુઓ વચ્ચેનો તફાવત પહેલા કરતાં વધુ મહત્વપૂર્ણ અને જોખમી બની ગયો છે.
સોનું અને ચાંદી ખૂબ જ અલગ સંકેતો મોકલી રહ્યાં છે. સોનાનો ઉછાળો મેક્રોઇકોનોમિક તણાવ દર્શાવે છે, જેમાં ચલણની નબળાઈ, ભૂરાજકીય જોખમો અને વિકસિત અર્થતંત્રોમાં નાણાકીય સ્થિરતા અંગેની ચિંતાઓનો સમાવેશ થાય છે. સામે પક્ષે ચાંદીનો તીવ્ર ઉછાળો ઔદ્યોગિક માંગમાં વધારો તેમજ સટ્ટાકીય પ્રવૃત્તિમાં વધારો દર્શાવે છે. વ્હાઇટઓકના રિપોર્ટ મુજબ બંને ધાતુઓને નબળા પડી રહેલા યુએસ ડોલરથી ફાયદો થયો છે, જ્યારે ચાંદીના ભાવમાં વર્તમાન તેજીની પેટર્ન ખૂબ જ ‘પેરાબોલિક’ છે અને આ પેટર્ન ઐતિહાસિક રીતે મોટી અસ્થિરતા પહેલા જ જોવા મળે છે.
સોનાથી વિપરીત, ચાંદી વધુ જટિલ પરિસ્થિતિનો સામનો કરે છે. કિંમતી અને ઔદ્યોગિક ધાતુ તરીકે, તેની કિંમત મેક્રો અનિશ્ચિતતાઓ તેમજ ઇલેક્ટ્રોનિક્સ, સૌર ઊર્જા અને ઇલેક્ટ્રિક વાહનોની માંગથી પ્રભાવિત થાય છે.
વ્હાઇટઓક રિપોર્ટ ચેતવણી આપે છે કે આ બેવડી માંગ તેજીની સાયકલ ઝડપી અને મોટી હોય છે પરંતુ મંદીનું જોખમ પણ તેમાં વધારે છે. ઐતિહાસિક રીતે, સટ્ટાકીય પ્રવૃત્તિના અંતે જોવા મળેલા શિખરો પરથી ચાંદીમાં ૪૦થી ૫૫ ટકાનો ઘટાડો નોંધાયો છે અને રિકવરીમાં પણ ઘણા વર્ષો લાગ્યા છે. ચાંદીનું નબળું બજાર માળખું સટ્ટાકીય પોઝીશન કપાતા અવળી ચાલને પણ ઝડપી બનાવે છે.
