આ પણ વાંચો ટ્રેન્ડિંગ સમાચાર
Chhota Udaipur News: વિકાસની છાતી કૂટતી સરકાર અને છોટા ઉદેપુરનું તંત્ર હવે ઉંઘમાંથી જાગ્યું છે. નસવાડી તાલુકાના ડબ્બા ગામના સીતાવાડી ફળિયામાં સગર્ભા મહિલાને પ્રસૂતિની પીડા ઊપડતાં રસ્તાના અભાવે તેને ઝોળીમાં લઈ જવાની ફરજ પડી હતી. જેનો વીડિયો વાઈરલ થતાં નસવાડીના જવાબદાર બાબુઓ આળસ મરડીને બેઠા થયા છે. ગ્રામજનોએ કરેલી રસ્તાની માગ મુદ્દે આજે ઈજનેર શાખાના અધિકારીએ ડબ્બા ગામના ફળિયાની મુલાકાત લીધી છે. જેમાં ગ્રામ પંચાયતએ સૂચવેલા નવા રસ્તાના કામમાં સીતાવાડી ફળિયાનો ઉલ્લેખ ન હોવાનું અધિકારીએ રટણ કર્યું હતું. જેથી ગ્રામજનોએ નવા રસ્તાની સાથે 2 કિલોમીટરનો કાચો રસ્તો પણ બને તેવી માગ સાથે અધિકારી સમક્ષ ઉગ્ર રજૂઆત કરી હતી.
સીતાવાડી ફળિયા સુધીનો રસ્તો બનાવી આપો: ગ્રામજનો
હાલ ગ્રામજનોની રજૂઆત છે કે જે નવો રસ્તો બની રહ્યો છે તેની વચ્ચે સીતાવાડી ફળિયું જે બે કિલોમીટરના અંતરે આવેલું છે. ત્યાં 108 આવી શકતી નથી, જેથી સગર્ભા મહિલાઓને વધુ તકલીફ પડે છે, અમારે માણસો શોધી ઝોળીમાં 108 એમ્બ્યુલન્સ સુધી પહોંચાડવાની ફરજ પડે છે. જેથી તાત્કાલિક નવા રસ્તાનું જે કામ ચાલે તેમાં આ 2 કિલોમીટરનો સીતાવાડી સુધીનો રસ્તો પણ બનાવી આપે.
‘નવો રસ્તો બને છે, જ્યાં તકલીફ છે તે જોવા આવ્યા છીએ’: અધિકારી
નસવાડી કચેરીના ઈજનેર પંચાયત માર્ગ મકાન વિભાગ અધિકારીએ કહ્યું કે ‘ડબ્બા ગામથી પીપલવાડી તરફ જતાં રસ્તામાં વચ્ચે સીતાવાડી ફળિયું છે. એ ફળિયાને જોડતા રસ્તાને જોવા માટે અમે આવ્યા હતા. હાલની કચેરી હેઠળનો ડબ્બા પીપલવાણી રસ્તો છે તે કામગીરી હેઠળ છે. એક સગર્ભાની પ્રસૂતિની કેસ હતો, 108ને વચ્ચે સીતાવાડી ફળિયા સુધી પહોંચી શકી ન હતી, જેથી તે રસ્તો જોવા અમે આવ્યા છીએ’
સગર્ભા મહિલાને પડી રહેલી તકલીફનો વીડિયો થયો હતો વાઈરલ
નસવાડી તાલુકાના ડબ્બા ગામના સીતાવાડી ફળિયામાં વિકાસના દાવાઓની પોકળતા છતી કરતી એક હૃદયદ્રાવક ઘટના સામે આવી હતી. એક સગર્ભા મહિલાને પ્રસૂતિની પીડા ઉપડતા તાત્કાલિક 108 એમ્બ્યુલન્સ બોલાવવામાં આવી હતી, પરંતુ ગામના કાચા અને બિસ્માર રસ્તાઓને કારણે એમ્બ્યુલન્સ ઘર સુધી પહોંચી શકી નહોતી. અંતે સમયસૂચકતા વાપરીને પરિવારજનો અને સ્થાનિક યુવાનોએ મહિલાને સ્ટ્રેચર પર સુવડાવી, જીવના જોખમે બે કિલોમીટર સુધી પગપાળા ચાલીને એમ્બ્યુલન્સ સુધી પહોંચાડી હતી. આ ઘટનાએ ફરી એકવાર અંતરિયાળ વિસ્તારોમાં રહેતી જનતાની હાલાકી અને તંત્રની ઉદાસીનતાને ઉજાગર કરી હતી.
આ પણ વાંચો: નકલી ડોક્ટરોની હવે ખેર નથી! ગુજરાત વિધાનસભામાં ‘ક્લિનિકલ એસ્ટાબ્લિશમેન્ટ સુધારા વિધેયક’ પાસ
સ્થાનિક ગ્રામજનોના જણાવ્યા અનુસાર, આ વિસ્તારમાં પાકા રસ્તા જેવી મૂળભૂત સુવિધાઓના અભાવે લોકોને રોજબરોજ મુશ્કેલીઓનો સામનો કરવો પડે છે. અનેકવાર તંત્ર અને રાજકીય નેતાઓને લેખિત તથા મૌખિક રજૂઆતો કરવા છતાં પરિસ્થિતિ જસની તસ રહી છે. જ્યારે સરકાર વિકાસના મોટા દાવા કરી રહી છે, ત્યારે સીતાવાડી ફળિયું આજે પણ પાયાની જરૂરિયાતોથી વંચિત છે. ત્યારે ગ્રામજનો માગ કરી હતી કે ધારાસભ્ય, સાંસદ અને જવાબદાર અધિકારીઓ વ્યક્તિગત મુલાકાત લઈને આ ગામની સમસ્યાનો કાયમી ઉકેલ લાવે.
