આ પણ વાંચો ટ્રેન્ડિંગ સમાચાર
– શહેરમાં ઠેરઠેર કચરાના ઢગ ખડકાયા
– કામદારોને પેન્શન, છઠ્ઠા પગાર પંચનો લાભ, કોન્ટ્રાક્ટ પદ્વતિ નાબૂદ કરી કાયમી કરવાની માગણી
ડાકોર : ડાકોર નગરપાલિકાના સફાઈ કામદારોએ પેન્શન, છઠ્ઠા પગાર પંચનો લાભ અને કોન્ટ્રાક્ટ પદ્ધતિ નાબૂદ કરી કાયમી કરવાની માંગ સાથે અચોક્સ મુદતની હડતાલ પર ઉતર્યા છે. શુક્રવારે સામાન્ય સભા બાદ લેખિત જાણ કરીને આજે વહેલી સવારથી કામગીરી બંધ રાખતા ડાકોરના માર્ગો પર કચરાના ઢગલા જોવા મળ્યા હતા.
યાત્રાધામ ડાકોરમાં સફાઈ કામદારોએ પોતાની વિવિધ પડતર માંગણીઓને લઈ અચોક્કસ મુદતની હડતાલની જાહેરાત કરતા પાલિકા તંત્રમાં દોડધામ મચી ગઈ છે. સફાઈ કામદારોના નેતાએ ચીફ ઓફિસર અને પ્રમુખને રજૂઆત કરતા જણાવ્યું હતું કે, જ્યાં સુધી સરકારના ધાર્યા ધોરણ મુજબનો પગાર, પેન્શન યોજનાનો લાભ આપવા અને કોન્ટ્રાક્ટ પદ્ધતિ બંધ કરી કામદારોને કાયમી કરવામાં નહીં આવે ત્યાં સુધી સફાઈની કામગીરી કરવામાં આવશે નહીં.
આ ઉપરાંત પાલિકામાં સફાઇ કામદાર તરીકે નિમણુંક પામેલા હોય તેમની પાસે સરકારના પરિપત્ર મુજબ કામગીરી ફરજિયાત કરવી, રોસ્ટર પ્રથા મુજબ ભરતી થયેલા હોય તે ટેબલ વર્કની કામગીરી કરતા હોય તો તાત્કાલિક સફાઇ કામગીરી કરાવશો, છઠ્ઠા પગારપંચનો લાભ આપવો, પાલિકાના સેટએપની જગ્યા ખાલી હોવાથી વાલ્મિકી સમાજનો સમાવેશ કરવામાં આવે સહિતની વિવિધ માગણીઓ પાલિકા સમક્ષ કરી છે.
પાલિકાની સામાન્ય સભા પૂર્ણ થયા બાદ સફાઈ કામદારોએ હડતાલ અંગેની લેખિત જાણ કરી હતી. બીજી તરફ, યાત્રિકો અને સ્થાનિકોને મુશ્કેલી ન પડે તે માટે નગરપાલિકાના પ્રમુખે સોશિયલ મીડિયાના માધ્યમથી પાલિકાના કાઉન્સિલરો અને ટેકેદારોને અપીલ કરી હતી કે તેઓ સ્વૈચ્છિક રીતે જાહેર માર્ગો પર સફાઈ કરવા માટે આવે. જોકે, કામદારો પોતાની માંગણીઓ પર મક્કમ હોવાથી આગામી દિવસોમાં ડાકોરની સ્વચ્છતા પર અસર પડવાની ભીતિ સેવાઈ રહી છે.
