આ પણ વાંચો ટ્રેન્ડિંગ સમાચાર
Panchmahal News: પંચમહાલ જિલ્લાના મુખ્ય મથક ગોધરામાં કાયદો અને વ્યવસ્થાની સ્થિતિ સામે સવાલો ઉઠ્યા છે. શહેરના વ્હોરવાડ વિસ્તારમાં મોડી રાત્રે બાઈક પર આવેલા અસામાજિક તત્ત્વોએ રહેણાંક વિસ્તારોમાં પાર્ક કરેલી ગાડીઓને નિશાન બનાવી તોડફોડ કરતા સ્થાનિક રહીશોમાં ભારે રોષ અને ફફડાટ વ્યાપી ગયો છે.
મોડી રાત્રે મચાવ્યો આતંક
પ્રાપ્ત માહિતી અનુસાર, ગોધરાના વ્હોરવાડ વિસ્તારમાં ગત રાત્રે બાઈક પર સવાર થઈને આવેલા કેટલાક લુખ્ખા તત્ત્વોએ આતંક મચાવ્યો હતો. આ તત્ત્વોએ કોઈ પણ કારણ વગર રસ્તા પર અને ઘરની બહાર પાર્ક કરેલી ફોર-વ્હીલર ગાડીઓના કાચ પથ્થરો કે અન્ય સાધનો વડે તોડી નાખ્યા હતા. સવારે જ્યારે લોકો જાગ્યા ત્યારે પોતાની મોંઘીદાટ ગાડીઓની હાલત જોઈને સ્તબ્ધ થઈ ગયા હતા.
આ સમગ્ર ઘટના વિસ્તારમાં લાગેલા સીસીટીવી કેમેરામાં કેદ થઈ ગઈ છે. ફૂટેજમાં સ્પષ્ટ દેખાય છે કે બાઈક સવાર યુવકો નિર્ભય બનીને તોડફોડ કરી રહ્યા છે. આ પ્રકારની હરકત પાછળનો મુખ્ય હેતુ લોકોમાં ભય ફેલાવવાનો હોવાનું પ્રાથમિક દ્રષ્ટિએ જણાઈ રહ્યું છે.
આ પણ વાંચો: ધોલેરા SIR બનશે ગ્લોબલ AI હબ: ગુજરાત સરકાર અને L&T વ્યોમા વચ્ચે હાઈપરસ્કેલ ડેટા સેન્ટર માટે MOU
સ્થાનિકોએ પોલીસને જાણ કરી
વ્હોરવાડના રહીશો આ ઘટનાથી અત્યંત રોષે ભરાયા છે. સ્થાનિકોનું કહેવું છે કે આવા તત્ત્વોને કારણે શાંતિપ્રિય વિસ્તારમાં અશાંતિ ફેલાઈ રહી છે. આજે મોટી સંખ્યામાં લોકો ભેગા થઈને ગોધરા બી-ડિવિઝન પોલીસ મથકે પહોંચ્યા હતા અને તોડફોડ કરનારા તત્ત્વો સામે કડક કાર્યવાહી કરવા લેખિત અરજી આપી હતી.
બી-ડિવિઝન પોલીસે સીસીટીવી ફૂટેજના આધારે બાઈકના નંબર અને આરોપીઓની ઓળખ કરવાની તજવીજ હાથ ધરી છે. પોલીસે આશ્વાસન આપ્યું છે કે ટૂંક સમયમાં જ આરોપીઓને ઝડપી પાડી કાયદાનું ભાન કરાવવામાં આવશે. જો કે, આ ઘટના બાદ રાત્રિ પેટ્રોલિંગ વધારવાની માગ પણ ઉગ્ર બની છે.
