આ પણ વાંચો ટ્રેન્ડિંગ સમાચાર
પત્રકારોના હિત, સુરક્ષા અને એકતા માટે મજબૂત સંકલ્પ; પત્રકારોને 10 લાખના વીમા કવચ જેવી કલ્યાણકારી સેવાઓને મળ્યો પ્રાથમિકતા ભર્યો આધાર
પાટણ, અનિલ રામાનુજ, એબીએનએસ: ચાણસ્મા ખાતે પાટણ જિલ્લા પત્રકાર એકતા પરિષદનું જિલ્લા અધિવેશન અને પત્રકાર મિટિંગ ભવ્ય રીતે યોજાઈ હતી, જેમાં મોટી સંખ્યામાં પત્રકારમિત્રોએ ઉત્સાહભેર હાજરી આપી હતી. અધિવેશન દરમિયાન પત્રકારોની એકતા, સુરક્ષા, હિતના પ્રશ્નો, કલ્યાણકારી યોજનાઓ અને સંગઠનને વધુ મજબૂત બનાવવાના મુદ્દાઓ પર વિસ્તૃત ચર્ચા કરવામાં આવી હતી. કાર્યક્રમ દરમિયાન પત્રકારોના પ્રશ્નોને સંવેદનશીલતાપૂર્વક સમજતા અને તેમના હક્કોને મજબૂત આધાર આપતા અનેક મુદ્દાઓ ચર્ચાના કેન્દ્રમાં રહ્યા હતા.
આ પ્રસંગે ગુજરાત પત્રકાર એકતા પરિષદના પ્રદેશ અધ્યક્ષ લાભુભાઈ કાત્રોડિયા સહિત સામાજિક, રાજકીય અને અગ્રણી મહાનુભાવો ઉપસ્થિત રહ્યા હતા. ઉપસ્થિત આગેવાનોએ જણાવ્યું હતું કે પત્રકારો માત્ર સમાચાર પ્રસારણનું કામ જ કરતા નથી, પરંતુ સમાજના પ્રશ્નોને અવાજ આપતા, જનહિતના મુદ્દાઓને ઉજાગર કરતા અને સેવાભાવ સાથે સમાજજીવનમાં સક્રિય યોગદાન આપતા મહત્વપૂર્ણ સ્તંભ છે. આ કારણે પત્રકારોની સુરક્ષા, સન્માન અને કલ્યાણને પ્રાથમિકતા આપવી સમયની માંગ બની છે.
અધિવેશનમાં ખાસ કરીને પત્રકારોના હિતલક્ષી મુદ્દાઓને કેન્દ્રસ્થાને રાખવામાં આવ્યા હતા. પત્રકાર એકતા પરિષદ દ્વારા પત્રકારોને રૂ. 10 લાખના વીમા કવચ જેવી મહત્વપૂર્ણ સુરક્ષા સેવા ઉપલબ્ધ કરાવવામાં આવી રહી હોવાનું જણાવાયું હતું, જેને ઉપસ્થિત પત્રકારમિત્રો અને મહાનુભાવોએ ખૂબ જ આવકાર્યો હતો. માત્ર પત્રકારો જ નહીં પરંતુ તેમના પરિવારની ચિંતા અને ભવિષ્યની સુરક્ષાને પણ ધ્યાનમાં રાખતી આ પહેલને સંગઠનની દુરંદેશી અને કલ્યાણલક્ષી દૃષ્ટિ તરીકે જોવામાં આવી હતી. પત્રકારોના હિતના પ્રશ્નો, તેમની સુરક્ષા અને સશક્તિકરણ માટે પરિષદ સતત સક્રિય રહી આગળ વધી રહી છે, તેવો વિશ્વાસ પણ આ અધિવેશનમાં વ્યક્ત કરવામાં આવ્યો હતો.
જિલ્લા અધિવેશન પૂર્ણ થયા બાદ પત્રકાર એકતા પરિષદ દ્વારા સમાજસેવાના ભાગરૂપે એક પ્રશંસનીય સેવાકીય આયોજન પણ હાથ ધરાયું હતું. ચાણસ્માથી બહુચરાજી હાઈવે માર્ગે જગદંબાના દર્શનાર્થે પગપાળા જતા યાત્રિકો તેમજ રાહદારીઓ માટે ઠંડાપીણાં કેમ્પ શરૂ કરવામાં આવ્યો હતો. ઉનાળાની કડકડતી ગરમી વચ્ચે યાત્રિકોને તાત્કાલિક રાહત અને સેવા મળે તે હેતુથી આ આયોજન કરવામાં આવ્યું હતું.
ઠંડાપીણાં કેમ્પના પ્રારંભ પ્રસંગે ઉપસ્થિત આગેવાનો, પત્રકારમિત્રો અને મહાનુભાવોએ આ સેવાકીય પ્રવૃત્તિને સમાજપ્રતિની સકારાત્મક જવાબદારીનું જીવંત ઉદાહરણ ગણાવી બિરદાવી હતી. પત્રકારો દ્વારા સમાજના પ્રશ્નોને પ્રકાશમાં લાવવાની સાથે સમાજસેવામાં પણ સક્રિય ભાગ ભજવાઈ રહ્યો છે, તે બાબત આ કાર્યક્રમ દ્વારા સ્પષ્ટપણે ઉજાગર થઈ હતી. રાહદારીઓ અને યાત્રિકોમાં પણ આ સેવા આયોજનને લઈને સંતોષ અને આભારની લાગણી જોવા મળી હતી.
પાટણ જિલ્લા પત્રકાર એકતા પરિષદના સહયોગ અને ચાણસ્મા વિસ્તારના સહકારથી યોજાયેલ આ સમગ્ર કાર્યક્રમ પત્રકાર એકતા, પત્રકાર હિત, સુરક્ષા અને સમાજસેવાના મજબૂત સંદેશ સાથે સફળ રહ્યો હતો. જિલ્લામાં મોટી સંખ્યામાં પત્રકારો એકજૂથ બની સંગઠન સાથે જોડાઈ રહ્યા છે અને પત્રકારોના હક્કો તથા સમાજહિત માટે પરિષદ સક્રિય રીતે કાર્યરત છે, તેવો મજબૂત સંદેશ આ અધિવેશન અને સેવાકીય કાર્યક્રમ દ્વારા સામે આવ્યો હતો.
