આ પણ વાંચો ટ્રેન્ડિંગ સમાચાર
Strength of Bhairav Battalion : ભારતીય સેનાએ મહાશિવરાત્રિના પાવન અવસરે પોતાની નવી લાઈટ કોમ્બેટ બટાલિયન ‘ભૈરવ’ નો સાડા ત્રણ મિનિટનો એક પ્રભાવશાળી વીડિયો જાહેર કર્યો છે. સેનાના સત્તાવાર સોશિયલ મીડિયા હેન્ડલ્સ પર શેર કરવામાં આવેલા આ વીડિયોમાં સુપરસ્ટાર અમિતાભ બચ્ચનના દમદાર અવાજ જોવા મળ્યો છે. બચ્ચનના અવાજમાં એક કવિતા દ્વારા આ બટાલિયનની તાકાતને અત્યંત સિનેમેટિક અંદાજમાં રજૂ કરવામાં આવી છે. ભગવાન શિવના ઉગ્ર સ્વરૂપ ‘ભૈરવ’ થી પ્રેરિત આ બટાલિયનનું નામ અને તેની ઓળખ સેનાએ પ્રતિકાત્મક રીતે સ્થાપિત કરી છે.
જમીનથી આકાશ સુધી ચોક્કસ પ્રહાર
વીડિયોની ટેગલાઈન ‘ભૈરવ – નામ નહીં, ઓળખ. ભૈરવ – નામ નહીં, પરિણામ’ તેની કાર્યક્ષમતાને સચોટ રીતે વ્યક્ત કરે છે. વીડિયોમાં જોઇ શકાય છે કે, કેવી રીતે આ બહાદુર જવાનો ગીચ જંગલોમાં છુપાઈને હુમલો કરવામાં, પાણીના માર્ગે અને હવામાંથી એકદમ સચોટ પ્રહાર કરવા માટે સક્ષમ છે. અલગ-અલગ મુશ્કેલ વિસ્તારો અને વિશેષ ઓપરેશનોમાં ભૈરવ કમાન્ડોની કામ કરવાની ક્ષમતાને વિગતવાર દર્શાવવામાં આવી છે. આ વીડિયો માત્ર એક બટાલિયનની જાણકારી નથી, પરંતુ દુશ્મનો માટે એક કડક ચેતવણી પણ છે.
આ વીડિયો દ્વારા ‘ભૈરવ’ બટાલિયન પાસે રહેલા આધુનિક તકનીકી સંસાધનો અને હથિયારોની ઝલક પણ મળે છે. યુનિટ પાસે અત્યાધુનિક હથિયારો છે:
AK-203 એસોલ્ટ રાઈફલ્સ
નેગેવ (Negev) લાઈટ મશીન ગન
રોકેટ લોન્ચર અને નાઈટ વિઝન ઉપકરણો
ડ્રોન અને સ્ટ્રાઈક વ્હીકલ
આ બધું સેનાની ‘શેડો એન્ડ સ્ટીલ’ (Shadow and Steel) શ્રેણીનો એક ભાગ છે. જેની શરૂઆત ગયા વર્ષે ઓક્ટોબરમાં કરવામાં આવી હતી. જેથી દુનિયાને ભારતીય સેનાની રણનીતિ અને યુનિટ્સથી વાકેફ કરી શકાય.
ડિજિટલ યુગમાં સેનાની નવી રણનીતિ
ભારતીય સેનાની આ વિઝ્યુઅલ સ્ટોરીટેલિંગ હવે આંતરરાષ્ટ્રીય સ્તરની બની ગઈ છે, જેવી ટેકનિકનો ઉપયોગ પશ્ચિમી દેશોની સેનાઓ કરે છે. હાઈ ક્વોલિટી વિઝ્યુઅલ્સ અને સશક્ત બેકગ્રાઉન્ડ મ્યુઝિક દ્વારા સેના પોતાની તાકાતને ફિલ્મી અંદાજમાં રજૂ કરી રહી છે. ફ્રાન્સ જેવી સેનાઓએ પણ તાજેતરમાં પોતાની શક્તિ બતાવવા માટે આવા વીડિયોનો સહારો લીધો છે. ભારતીય સેનાની આ પદ્ધતિ માત્ર માહિતી આપવા માટે નથી, પરંતુ દેશના યુવાનોમાં જોશ ભરવા અને પોતાની સજ્જતાનો વૈશ્વિક સંદેશ આપવાની એક સમજી-વિચારી રણનીતિ છે.
