આ પણ વાંચો ટ્રેન્ડિંગ સમાચાર
– ઘરે બેઠા ટાસ્ક પૂરા કરીને પૈસા કમાવવાની ઓફર આપી
– ટાસ્ક પૂરો કરતા કમિશન સાથે વધુ નાણાં મળતા વિશ્વાસ બેઠો, વસો પોલીસે વધુ તપાસ હાથ ધરી
નડિયાદ : વસો તાલુકાના પીજ ગામના લિંક્ડઈન પર નોકરીની શોધ કરી રહેલા યુવકને સાયબર ગઠિયાએ શોભા રિયાલિટી કંપનીના નામે ટાસ્ક આપી વિશ્વાસમાં લઈ ઓનલાઇન રૂ.૧,૧૬,૬૦૯ ટ્રાન્સફર કરી છેતરપિંડી કરી હતી. આ બનાવ અંગે છેતરપિંડીનો ભોગ બનનાર યુવાને વસો પોલીસ સ્ટેશનમાં ફરિયાદ નોંધાવતા પોલીસે વધુ તપાસ હાથ ધરી છે.
વસો તાલુકાના પીજ ગામે આધ્યવિલા સોસાયટીમાં રહેતા અને મુંબઈ ખાતે ટેલી પરફોર્મન્સ કંપનીમાં નોકરી કરતા જયેશભાઈ નટવરલાલ કાપડિયા છેલ્લા ત્રણેક માસથી ઘરે હતા. તેઓએ નવી નોકરી મેળવવા માટે લિંક્ડઈન એપ્લિકેશન પર પોતાનું રિઝયુમ મૂક્યું હતું. આ દરમિયાન તા.૨૯-૧૨-૨૫ના રોજ શોભા રિયાલિટી નામની કંપની તરફથી જયેશભાઈને ઘરે બેઠા ટાસ્ક પૂરા કરીને પૈસા કમાવવાની ઓફર કરતો મેસેજ મળ્યો હતો. જેથી જયેશભાઈએ સંમતિ દર્શાવતા અજાણ્યા મોબાઈલ પરથી ફોન કરી તેમનું ઈન્ટરવ્યુ લઈને ટેલિગ્રામ પર ‘રિયલ એસ્ટેટ આસિસ્ટન્ટ’ નામના ગુ્રપમાં જયેશભાઈને જોઈન કરવામાં આવ્યા હતા. આ ટેલિગ્રામ ગુ્રપમાં જોડાયા બાદ તેમને અલગ-અલગ કંપનીઓની વેબસાઈટ લિંક મોકલી ટાસ્ક સોંપવામાં આવ્યા હતા અને ટાસ્કના નામે અલગ-અલગ બેંકના ખાતામાં પૈસા ભરાવવામાં આવ્યા હતા, જેની સામે તેમને કમિશન સાથે વધુ નાણાં પરત મળતા જયેશભાઈને વિશ્વાસ બેઠો હતો.
ત્યારબાદ જયેશભાઈએ તા.૧-૧-૨૦૨૬થી તા.૩-૧-૨૦૨૬ દરમિયાન અલગ-અલગ ત્રણ ટ્રાન્ઝેક્શન દ્વારા કુલ રૂ.૧,૧૬,૬૦૯ ભરી ટાસ્ક પૂરા કર્યા હોવા છતાં સામા પક્ષેથી કોઈ વળતર ચૂકવાયું ન હતું. ઉલટાનું તેમની પાસે વધુ રૂ.૧,૮૯,૦૦૦ની માંગણી કરવામાં આવી હતી. જેથી જયેશભાઈને નાણાં પરત ન મળતા પોતાની સાથે છેતરપિંડી થઈ હોવાનું જણાતા તેઓએ સાયબર ફ્રોડ હેલ્પલાઇન પર ફરિયાદ કરી હતી. આ બનાવ અંગે વસો પોલીસે મોબાઈલ ધારક સામે ગુનો નોંધી કાર્યવાહી હાથ ધરી હતી.
