આ પણ વાંચો ટ્રેન્ડિંગ સમાચાર
સુરત મહાનગર પાલિકાની આગામી ચૂંટણી માટે તૈયારી કરી રહેલા વિપક્ષના ચાવવાના અને બતાવવાના દાંત જુદા જુદા હોય તેવો આક્ષેપ થઈ રહ્યો છે. સુરત પાલિકાની બજેટની સામાન્ય સભા પુરી થઈ ત્યાં સુધી વિપક્ષે સત્તાવાર વિરોધ નોંધાવ્યો ન હતો. પરંતુ સભા પૂરી થયા બાદ પાછલા બારણે સેક્રેટરી બ્રાંચમાં વિરોધ નોંધાવવાનો પ્રયાસ કર્યો હતો. બજેટ પુરી થયા બાદ સભાપતિને નહી પરંતુ ક્લાર્ક સામે વિરોધ કરી પોતે વિરોધ કર્યાનો હોબાળો કર્યો હતો. જોકે, સભા સંચાલનના નિયમો મુજબ સર્વાનુમતે બજેટની દરખાસ્ત મંજુર કરી રાજ્ય સરકારમા મોકલી પણ આપવામાં આવી છે.
સુરત મહાનગરપાલિકાની સામાન્ય સભા બે દિવસ ચાલી હતી આ સામાન્ય સભામાં 82 કોર્પોરેટરોએ 1020 મિનિટ ચર્ચા કરી હતી. આ બજેટની ચર્ચા દરમિયાન વિપક્ષે શાસકો દ્વારા કરવામાં આવતી કામગીરી માં અનેક ભૂલો કાઢી શાસકોને ઘેરવાનો પ્રયાસ કર્યો હતો. જોકે, ચૂંટણી પહેલાની લગભગ છેલ્લી સામાન્ય સભા હોવા છતાં વિપક્ષ આક્રમક નથી પરંતુ શાસકોને અનુકૂળ હોય તેવો દેખાતો હતો.
સુરતમાં સૌથી મોટું કચરા કૌભાંડ થયું છે અને તેમાં સુરત શહેરની ઈમેજને ધક્કો પહોચ્યો હોવા છતાં વિપક્ષી નેતા તેમના સંબોધનમાં છેક છેલ્લે અને ગણતરીની સેકન્ડમાં આ મુદ્દો લાવ્યા હતા. કચરા કૌભાંડ અંગે તપાસ ધીમી પડી ગઈ છે અને તેની સાથે વિપક્ષનો વિરોધ પણ ધીમો થઈ ગયો છે. આ ઓછું હોય તેમ વિપક્ષે એક પણ વખત બજેટ નો વિરોધ કર્યો ન હતો. પાલિકાના વિપક્ષી નેતા સહિત તમામ સભ્યોએ બજેટનો કોઈ વિરોધ કર્યો ન હતો. પરંતુ તેઓએ અનેક સૂચનો કર્યા હતા અને તેને બજેટમાં સમાવવા માટેની માંગણી કરી હતી.
લગભગ પોણા બે દિવસ ચાલેલા આ બજેટની ચર્ચા બાદ બજેટ પર વિપક્ષે વિરોધ કર્યો ન હોવાથી મતદાન થયું ન હતું અને બજેટને સર્વાનુમતે જાહેર કરાયું હતું. વિરોધ કરવાનું ચૂકી ગયેલા વિપક્ષે બજેટની સભા પૂરી થયા બાદ પ્રોસીડીંગ રાઈટરને તેમનો વિરોધ છે તેવું જણાવ્યું હતું. જોકે, સભા સંચાલનના નિયમો મુજબ વિપક્ષે વિરોધ કરવો હોય તો સભાપતિ એવા મેયરને કરવાનો હોય છે. અને ત્યાર બાદ મતદાન થાય છે શાસકો અને વિરોધપક્ષના કોર્પોરેટરોના મત ગણવામા આવે છે અને ત્યાર બાદ બહુમતિથી ઠરાવ પસાર કર્યો હોવાનો ઠરાવ લખાઈ છે. પરંતુ આવી કોઈ પ્રક્રિયા કરી ન હોય વિપક્ષે માત્ર દેખાડા પુરતો વિરોધ કર્યો હોય તેથી પાલિકાના સામાન્ય સભાનો ઠરાવ પણ બજેટ સર્વાનુમતે થયો હોવાની નોંધ થઈ છે. આમ વિપક્ષે સામાન્ય સભામાં વિરોધ ન કરીને બજેટને સમર્થન આપ્યું હતું પરંતુ દેખાડો કરવા સભા પૂરી થયા બાદ વિરોધ નો પ્રયાસ કર્યો છે તેથી ફરી એક વાર ભાજપ- આપ ભાઈ ભાઈ હોવાના આક્ષેપ થઈ રહ્યો છે.
