સુરતમાં કમોસમી કાળ યુવકને ભરખી ગયો, પર્વત પાટિયામાં મનપાનું ભારે ભરખમ બોર્ડ તૂટી પડતાં મોત | Gujarat…

Gujarat Unseasonal Rain: ગુજરાતના અનેક જિલ્લાઓમાં અચાનક વાતાવરણ પલટાતા 40 કિમીની ઝડપે ફૂંકાયેલા પવન અને વરસાદને કારણે જનજીવન પ્રભાવિત થયું છે, જેમાં અમદાવાદમાં 20થી વધુ અને જામનગરમાં 55થી વધુ વૃક્ષો ધરાશાયી થતા વાહનવ્યવહારને માઠી અસર પહોંચી છે. જામનગરમાં હેવી વીજ લાઈનના બે ટાવર ભારે પવનના કારણે પડી જતાં અનેક વિસ્તારમાં અંધારપટ છવાયો છે. રાજ્યમાં આજે સાંજે 8 વાગ્યા સુધીમાં 36 તાલુકામાં વરસાદ ખાબક્યો છે જેમાંથી રાજકોટ શહેરમાં સૌથી વધુ 1.38 ઈંચ વરસાદ થતાં ઠેર ઠેર પાણી ભરાયા છે.

જુઓ કમોસમી વરસાદની તમામ લાઈવ અપડેટ

સુરતમાં મિનિ વાવાઝોડું યુવકને ભરખી ગયું!

સુરતમાં પણ ભારે પવને શહેરમાં બાનમાં લીધું હતું. ત્યારે પર્વત પાટિયા વિસ્તારમાં એક કરૂણ ઘટના બની છે. સુરત મનપાનું ભારે ભરખમ બોર્ડ પવનના કારણે તૂટીને એક યુવક પર પડતાં તેનું ઘટનાસ્થળે જ કમકમાટીભર્યું મોત નીપજ્યું હતું. પ્રાથમિક વિગતો અનુસાર યુવકનું નામ નીતિન વાજા છે. મૃતદેહને પોસ્ટમોર્ટમ અર્થે સ્મીમેર હોસ્પિટલ ખસેડવામાં આવ્યો છે. આ કુદરતી નહીં પણ માનવસર્જિત ભૂલના કારણે યુવકનો ભોગ લેવાયો છે ત્યારે ઘટનાએ જાહેર સ્થળો પર લગાવેલા બોર્ડ અને સ્ટ્રક્ચરની સુરક્ષા પર સવાલો ઉભા કર્યા છે. 

માતાજીના મંદિરનો મંડપ હવામાં ઉછળ્યો: વીજ લાઈન પર પડ્યો

બાવળા-સરખેજ હાઈવે પર આવેલા સરી ગામ પાસે આજે કુદરતી આફત અને આધુનિક ટેકનોલોજીનો અનોખો સમન્વય જોવા મળ્યો હતો. અચાનક ફૂંકાયેલા તેજ પવન અને વાવાઝોડાને કારણે હાઈવે પર સ્થિત એક મંદિરનો મંડપ હવામાં ઉડીને હાઈવોલ્ટેજ વીજ લાઈન પર ફસાઈ ગયો હતો. જોકે, સદનસીબે વીજ કંપનીની સતર્કતા અને આધુનિક લાઈનને કારણે મોટી જાનહાનિ ટળી હતી. ​સરી ગામે હાઈવે પર ઉગતા પોરના મેલડી માતાજીનું મંદિર આવેલું છે. હાલમાં ચૈત્રી નવરાત્રીનો પવિત્ર તહેવાર ચાલી રહ્યો હોવાથી મંદિરના પટાંગણમાં ભક્તો માટે વિશાળ મંડપ બાંધવામાં આવ્યો હતો. આજે અચાનક વાતાવરણમાં પલટો આવતા અને જોરદાર વાવાઝોડું ફૂંકાતા, આ મંડપ જમીન પરથી ઉખડીને હવામાં ઉછળ્યો હતો. હવામાં ઉડેલો આ મંડપ સીધો મંદિર ઉપરથી પસાર થતી 11 KV ફીડરની લાઈન પર જઈને ચોંટી ગયો હતો.

​સામાન્ય રીતે આવી ઘટનાઓમાં મોટો બ્લાસ્ટ થતો હોય છે અથવા તો આખા મંડપમાં કરંટ ઉતરી આવવાથી ભયંકર હોનારત સર્જાતી હોય છે. પરંતુ આ કિસ્સામાં ચિત્ર અલગ હતું. વીજ કંપની દ્વારા તાજેતરમાં જ આ વિસ્તારમાં નવી આધુનિક વીજ લાઈન નાખવામાં આવી છે.આ લાઈન એવી રીતે ડિઝાઈન કરવામાં આવી છે કે તેના પર કોઈ પણ વસ્તુ અથડાય કે ચોંટે તો પણ કરંટ લાગતો નથી જેથી મંડપ લોખંડ કે કાપડનો હોવા છતાં, આ વિશિષ્ટ વાયરિંગને કારણે કોઈ શોર્ટ સર્કિટ થઈ ન હતી કે કોઈ વ્યક્તિને ઈજા પહોંચી ન હતી. ​ઘટના બાદ સ્થાનિકો અને મંદિરના ટ્રસ્ટીઓએ રાહતનો શ્વાસ લીધો હતો. ભક્તોમાં પણ એવી ચર્ચા હતી કે માતાજીની અસીમ કૃપા અને વીજ વિભાગની કામગીરીને કારણે આજે એક મોટી હોનારત ટળી ગઈ છે.

7 જિલ્લામાં રેડ ઍલર્ટ 

આજે(19 માર્ચ) સાંજે 7 વાગ્યાના હવામાન વિભાગના Nowcast મુજબ, રાજકોટ, જૂનાગઢ, ગીર સોમનાથ, અમરેલી, ભાવનગર, બોટાદ, સુરેન્દ્રનગર જિલ્લામાં રેડ ઍલર્ટ જાહેર કર્યુ છે.

જામનગરના ઢીચડા રોડ પર તોફાની પવનના કારણે પતરાની આખે આખી ફેન્સીંગ ઉડી ગઈ

જામનગરમાં ઢીંચડા રોડ પર ફૂંકાયેલા વાવાઝોડા ના કારણે રોડની સાઈડમાં કામ ચાલી રહ્યું હતું, અને પતરાની લાંબી ફેન્સીંગ બનાવવામાં આવી હતી, જે આખે આખી ફેન્સીંગ હવામાં ઉડવા લાગી હતી. જો કે સદભાગ્યે આ ફેન્સીંગ ના કારણે કોઈને ઈજા કે જાનહાનિ થઈ ન હતી. જેનો વિડીયો પણ એક બાઈક ચાલક યુવાને ઉતારી લીધો હતો, અને તે સોશિયલ મીડિયામાં ફરતો થયો છે.

જામનગરમાં  હેવી વીજ લાઈન જમીનદોસ્ત, લાઈવ વીડિયો ડરામણો

જામનગર શહેર અને આસપાસના વિસ્તારમાં બપોરના સમયે અચાનક તોફાની પવન સાથે વાવાઝોડું ફૂંકાયું હતું, અને તોફાની વરસાદ પણ શરૂ થઈ ગયો હતો. જેમાં જેટકોને ભારે નુકસાની થઈ છે.  જામનગર થી સિક્કા તરફ જતી એસાર કંપનીની હેવી વીજ લાઈન કે જેના 220 કે.વી. ના બે મોટા ટાવરો એક પછી એક જમીનદોસ્ત થઈ ગયા હતા, જેના કારણે તે વિસ્તારનો વિજ પુરવઠો ખોરવાયો હતો. અનેક વાયરો તૂટીને નીચે પડ્યા હોવાથી જેટેકોની ટીમને દોડાદોડી થઈ છે, અને હેવી લાઈન બંધ કરી દેવામાં આવી છે. તેમજ સમારકામની કામગીરી પણ યુદ્ધ ના ધોરણે હાથ ધરી લેવામાં આવી છે. આ ઉપરાંત જેટકો નો 132 કે.વી.નો હેવી લાઇન નો કનસુમરા વિસ્તારમાંથી પસાર થતો  એક ટાવર પણ જમીન દોસ્તી થયો હતો. જેથી કનસુમરા અને આસપાસના ગ્રામ્ય વિસ્તારનો વીજ પુરવઠો ખોરવાયો છે, અને ત્યાં પણ જેટકો ની ટીમ દ્વારા તાત્કાલિક અસરથી સમારકામની કામગીરી હાથ ધરી લેવામાં આવી છે.

ફાયર બ્રિગેડની 10 ટીમોએ કામગીરી ઉપાડી

જામનગરમાં વાવાઝોડા દરમિયાન ચાલુ રિક્ષા પર ઝાડ પડવાની ઘટના બની હતી, જેમાં ફાયર બ્રિગેડની 10 ટીમોએ યુદ્ધના ધોરણે ઓપરેશન હાથ ધરી ગણતરીના કલાકોમાં જ રસ્તાઓ ખુલ્લા કરી પ્રશંસનીય કામગીરી કરી છે. 70થી વધુ ફાયરના જવાનોની અલગ અલગ 10 ટીમોં બનાવી હતી, અને કરવત, કુહાડા, રસ્સા વગેરે ની સાધન સામગ્રી સાથે તમામ ટીમોને દોડતી કરી દેવામાં આવી હતી, અને માત્ર દોઢ કલાકના સમયગાળા દરમિયાન 45 થી વધુ ફરિયાદોનો નિકાલ કરી નાખવામાં આવ્યો હતો.

અમદાવાદમાં આંધી

રાજ્યનું આર્થિક પાટનગર ગણાતા અમદાવાદમાં વરસાદ કરતા પવનનું જોર વધુ જોવા મળ્યું. સમી સાંજે આંધી આવતા શહેર પર ધૂળની ડમરીઓનું રાજ જોવા મળ્યું, સિંધુભવન રોડ સહિત અનેક વિસ્તારોમાં તોતીંગ વૃક્ષો ધરાશાયી થયા હતા. શહેરમાં 40 કિમીની ઝડપે પવન ફૂંકાતા 20થી વધુ વૃક્ષો ધરાશાયી થયા છે. અમદાવાદ ગ્રામ્યમાં વાતાવરણમાં પલટો, જેમાં બાવળા નાનંદ બાગમાં સ્વદેશી મેળામાં નુકસાન થયું હતું.

શિવકથાનો મંડપ પડી ગયો 

અમરેલી જિલ્લાના ધારી, ચલાલા અને બાબરા પંથકમાં ગાજવીજ સાથે ખાબકેલા વરસાદે ભારે તબાહી મચાવી છે. વલારડી ગામે વઘાસિયા પરીવાર દ્વારા આયોજિત શિવકથાના મંડપ પડી ગયો છે, જ્યારે ખેતરોમાં તૈયાર પાકને નુકસાન થવાની ભીતિથી ખેડૂતો ચિંતાતુર બન્યા છે.

કયા જિલ્લામાં કેટલો વરસાદ?