અમદાવાદ, ગુરૂવાર
અમદાવાદ સહિત ગુજરાતના વિવિધ શહેરોમાં સ્કૂલ, એરપોર્ટ અને સરકારી બિલ્ડીંગ બોંબથી ઉડાવી દેવાની ધમકી ભર્યા ઇ-મેઇલ મોકલવાના મામલે ક્રાઇમબ્રાંચને મહત્વની સફળતા મળી છે. જેમાં જે ધમકી ભર્યા ઇ-મેઇલ મળ્યા હતા તેનું વેચાણ કરનાર સૌરવ વિશ્વાસ નામના યુવકને પશ્ચિમ બંગાળના ગોપાલનગર જિલ્લામાંથી ઝડપી લીધો હતો. આરોપીની પ્રાથમિક પુછપરછમાં ચોંકાવનારા ખુલાસા થયા છે કે મુળ બાંગ્લાદેશનો રહેવાસી સૌરવ ગેરકાયદે ભારતમાં આવ્યો હતો અને યુએસડીટી-ક્રિપ્ટોથી નાણાં મેળવીને વર્ષોથી બંધ થયેલા ઇ-મેઇલ આઇડી રીકવર કરીને વેચાણ કરતો હતો. જે ઇ-મેઇલ આઇડીનો ઉપયોગ ભારતમાં ધમકી આપીને ભયનો માહોલ ઉભા કરવા માટે થતો હતો.
અમદાવાદ સહિત ગુજરાતના અનેક શહેરોમાં સ્કૂલ, એરપોર્ટ, કોર્ટ અને અન્ય સરકારી કચેરી બોંબથી ઉડાવી દેવાની ધમકી આપતા ઇ-મેઇલ મળવાના મામલે અમદાવાદ ક્રાઇમબ્રાંચ અને સાયબર ક્રાઇમે ટેકનીકલ એનાલીસીસની સાથે સમગ્ર નેટવર્કને જાણવા માટે તપાસની પેટર્ન બદલી હતી. જેમાં સાયબર ક્રાઇમના એસીપી હાર્દિક માકડીયાને માહિતી મળી હતી કે દેશમાં તેમજ દેશની બહાર વર્ષોથી બંધ ઇ-મેઇલ આઇડી રીકવર કરીને તેનું વેચાણ કરતી અનેક ગેંગ સક્રિય છે. જેના આધારે પોલીસે અલગ અલગ સોશિયલ મિડીયાની સાઇટ પર તપાસ કરીને ખુદ ઇ-મેઇલ આઇડી ખરીદવા માટેની ટેકનીક અપનાવી હતી. જેમાં પોલીસને એક મહિના પહેલા સૌરભ વિશ્વાસ અંગે કડી મળી હતી. તેની સાથે ટેલીગ્રામ ચેનલથી વાત કરતા તેણે ક્રિપ્ટો અને યુએસડીટીથી નાણાં અપાવવાનું કહીને કેટલાંક ઇ-મેઇલ આઇડી વેચાણે આપવા માટે ખાતરી આપી હતી અને ક્રાઇમબ્રાંચે ગ્રાહક બનીને નાણાં ટ્રાન્સફર કરીને કેટલાંક ઇ-મેઇલ આઇડી મેળવ્યા હતા.
જે પૈકી મહારાષ્ટ્રમાં એક ઇમેઇલ-આઇડીના રીકવર આઇડીનો ઉપયોગ ધમકી માટે થયો હતો. જેથી ક્રાઇમબ્રાંચને ઇ-મેઇલ આઇડી વેચાણના નેટવર્ક અંગેની માહિતી અંગે મહત્વની માહિતી મળી હતી. જેના આધારે પોલીસે ટેકનીકલ એનાલીસીસના આધારે પશ્ચિમ બંગાળના ગોપાલનગરમાં વોચ ગોઠવીને સૌરવ વિશ્વાસને ઝડપી લીધો હતો.
આ અંગે વધુ માહિતી આપતા ક્રાઇમબ્રાંચના જેસીપી શરદ સિંઘલે જણાવ્યું કે સૌરભ વિશ્વાસ મુળ બાંગ્લાદેશ ઢાંકાનો રહેવાસી છે. જે કોરોના સમયે ગેરકાયદે ભારતમાં આવ્યો હતો અને વિવિધ ટેકનીકનો ઉપયોગ કરીને વર્ષોથી બંધ ઇ-મેઇલ આઇડી પાસવર્ડ રીકવર કરીને વેચાણ કરતો હતો. આ ઇ-મેઇલ આઇડીનો ઉપયોગ આંતકી સંગઠન સાથે સંકળાયેલા તત્વો બોંબની ધમકી માટે કરતા હતા. મોટાભાગે આ પ્રકારના ઇ-મેઇલ ભારત બહારથી કરવામાં આવતા હતા. જો કે રીકવરી ઇ-મેઇલની લીંકથી સમગ્ર કૌભાંડ સામે આવ્યું હતું.
પોલીસને આરોપી પાસેથી ૨૦૦થી ઇ-મેઇલ મળ્યા
ક્રાઇમબ્રાંચે સૌરવ વિશ્વાસ પાસેથી મળેલા સીપીયુ, હાર્ડ ડીસ્ક, મોબાઇલ ફોન અને અન્ય ગેટેઝ્સ જપ્ત કરીને તપાસ કરતા તેની પાસેથી ૨૦૦થી વધુ ઇ-મેઇલ આઇ ડી મળી આવ્યા હતા. તેમજ આરોપીના અન્ય દેશમાં રહેતા દેશ વિરોધી તત્વો તેમજ તેની બહેન રસિકા વિશ્વાસ પણ તેની સાથે જોડાયેલી હતી. આ મોડયુલથી તે લાખો રૂપિયા કમાતો હતો.
આરોપી પકડાયા છતાં પાસપોર્ટ ઓફિસો અને ભુજ, વડોદરા કોર્ટને ઉડાવી દેવા ધમકીભર્યા ઈ-મેલ આવ્યાં
ધમકીભર્યા ઈ-મેલનો સિલસિલો કરનાર આરોપી પકડાયા છે તે પછી પણ અમદાવાદ સહિતની પાસપોર્ટ ઓફિસો અને ભુજની કોર્ટને ઉડાવી દેવાની ધમકી આપતાં ઈ-મેલ આવ્યાં છે. તા. ૨૭ના રોજ અમદાવાદની મુખ્ય અને અન્ય પાસપોર્ટ ઓફિસોને ઉડાવી દેવાની ધમકી આપતો ઈ-મેલ આવતાં અમદાવાદ સાયબર ક્રાઈમ બ્રાન્ચે વિધીવત ફરિયાદ નોંધી છે. તો, ગુરૂવાર તા. ૫ માર્ચના રોજ ભુજ અને વડોદરા કોર્ટને ઉડાવી દેવાની ધમકી આપતાં ઈ-મેલ મળ્યાં છે. અદાલતોમાં તપાસ બાદ કંઈ વાંધાજનક મળ્યું નહોતું. પોલીસ અને સાયબર ટીમોએ ધમકીભર્યા ઈ-મેલ અંગે તપાસ આરંભી છે. આ અંગે પોલીસ જણાવે છે કે ઇ-મેઇલનું વેચાણ કરતી અનેક ગેંગ સક્રિય છે. જેથી આ પ્રકારના ઇ-મેઇલ બંધ થવાની શક્યતા ઓછી છે.
