આ પણ વાંચો ટ્રેન્ડિંગ સમાચાર
Supreme Court on UGC New Rule: યુજીસી નિયમો વિરુદ્ધ અરજી અંગે સુપ્રીમ કોર્ટ સુનાવણી માટે તૈયાર છે. સુપ્રીમ કોર્ટમાં સમગ્ર મામલે અનેક અરજીઓ દાખલ થઇ હતી. આ અરજીને લિસ્ટ કરવા માટે સીજેઆઇ સૂર્યકાંતે તૈયારી દર્શાવી છે. જો કે સુનાવણી ક્યારે થશે તે અંગે હજી પણ અસમંજસ છે. પરંતુ કોર્ટે આ અંગે સુનાવણી કરવા માટે તૈયાર થઇ ચુક્યાં છે.
યુનિવર્સિટી ગ્રાન્ટ્સ કમિશન (UGC) દ્વારા તાજેતરમાં ‘ઉચ્ચ શિક્ષણ સંસ્થાઓમાં સમાનતાને પ્રોત્સાહન’ (Promotion of Equity in Higher Educational Institutions) રેગ્યુલેશન, 2026 બહાર પાડવામાં આવ્યું છે. આ નિયમો સામે દેશભરમાં વિરોધ ઉઠ્યો છે અને મામલો હવે સુપ્રીમ કોર્ટ સુધી પહોંચ્યો છે.
સુપ્રીમ કોર્ટમાં શું થયું?
સુપ્રીમ કોર્ટે UGC ના આ નવા નિયમોને પડકારતી અરજી પર સુનાવણી કરવા સંમતિ આપી છે. જસ્ટિસ સૂર્યકાંતની આગેવાની હેઠળની ખંડપીઠે આ મામલાની ગંભીરતાને ધ્યાનમાં લેતા જણાવ્યું છે કે તેઓ ટૂંક સમયમાં આ અરજીને સુનાવણી માટે સૂચિબદ્ધ (list) કરશે.
આ પણ વાંચો : બારામતી પ્લેન ક્રેશ: અજિત પવાર માટે ‘કાળ’ સાબિત થઈ ધુમ્મસ! માત્ર 800 મીટર હતી વિઝિબિલિટી
ભેદભાવનો આરોપ
અરજીમાં દલીલ કરવામાં આવી છે કે આ નવા નિયમો પક્ષપાતી છે. આરોપ છે કે આમાં અનુસૂચિત જાતિ (SC), અનુસૂચિત જનજાતિ (ST) અને અન્ય પછાત વર્ગો (OBC) માટે તો રક્ષણ છે, પરંતુ સામાન્ય વર્ગ (General Category) ના વિદ્યાર્થીઓ અને કર્મચારીઓને સંસ્થાગત સુરક્ષા અને ફરિયાદ નિવારણના અધિકારોથી વંચિત રાખવામાં આવ્યા છે.
બંધારણીય પડકાર
અરજદારોનો દાવો છે કે, આ નિયમો બંધારણીય જોગવાઈઓનું ઉલ્લંઘન કરે છે કારણ કે તે માત્ર ચોક્કસ વર્ગોને જ રક્ષણ આપે છે, જ્યારે સમાનતાનો અધિકાર દરેક નાગરિક પાસે છે.
સામાજિક આક્રોશ
આ નિયમોના વિરોધમાં બરેલીના સિટી મેજિસ્ટ્રેટ અલંકાર અગ્નિહોત્રીએ રાજીનામું આપ્યું હોવાના અહેવાલો પણ સામે આવ્યા છે. જેના કારણે આ વિવાદ વધુ વકર્યો છે.
શા માટે UGC ને આ નિયમોની જરૂર પડી?
UGC નું માનવું છે કે ઉચ્ચ શિક્ષણ સંસ્થાઓમાં જાતિગત ભેદભાવ દૂર કરવા અને તમામ પછાત વર્ગના વિદ્યાર્થીઓને સુરક્ષિત વાતાવરણ પૂરું પાડવા માટે આ કડક નિયમો જરૂરી છે. જોકે, સામાન્ય વર્ગના વિરોધના કારણે હવે આ મામલો કાયદાકીય ગૂંચવણમાં ફસાયો છે.
હવે જોવાનું એ રહેશે કે સુપ્રીમ કોર્ટ આ મામલે શું વલણ અપનાવે છે. શું આ નિયમોમાં સુધારો કરવામાં આવશે કે પછી તેને રદ કરવામાં આવશે, તેનો નિર્ણય કોર્ટની આગામી સુનાવણી પર નિર્ભર રહેશે.જો કે હાલ આ સમગ્ર મામલો દેશમાં મંડલ-કમંડલ બાદ ફરી એકવાર સવર્ણ અને અનામત વર્ગ વચ્ચે મોટી ખાઇ પેદા કરી શકે તેવો વિવાદિત બન્યો છે.
