આ પણ વાંચો ટ્રેન્ડિંગ સમાચાર
Ahmedabad News : અમદાવાદ શહેરના ઈસનપુર વિસ્તારમાં માનવતા અને પવિત્ર કૌટુંબિક સંબંધોને લાંછન લગાડતી ઘટના સામે આવી છે. ઘરમાં એકલતાનો લાભ ઉઠાવી 26 વર્ષીય દિયરે પોતાના જ નાના ભાઈની પત્ની (ભાભી) પર દુષ્કર્મનો પ્રયાસ કર્યો હોવાની ફરિયાદ નોંધાઈ છે. સમગ્ર મામલે પરિણીતાએ ફરિયાદ કરતાં ઈસનપુર પોલીસે આરોપીની ધરપકડ કરી જેલના સળિયા પાછળ ધકેલી દીધો છે.
પ્રેમ લગ્ન બાદ ભાભી પર બગડી દાનત
પોલીસ વિગતો અનુસાર, 22 વર્ષીય પીડિત પરિણીતાએ બે વર્ષ અગાઉ પ્રેમ લગ્ન કર્યા હતા અને તે પતિ સાથે ઈસનપુર વિસ્તારમાં રહેતી હતી. મહિલાનો પતિ લાટી બજારમાં એક દુકાનમાં કામ કરીને ગુજરાન ચલાવે છે, જ્યારે તેનો મોટો ભાઈ (આરોપી દિયર) અગાઉ રિક્ષા ચલાવતો હતો. પરંતુ હાલમાં બેરોજગાર હોવાથી મોટાભાગનો સમય ઘરે જ રહેતો હતો.
શારીરિક સંબંધ બાંધવા અવારનવાર દબાણ
ફરિયાદમાં જણાવ્યા મુજબ, થોડા દિવસો અગાઉ જ્યારે મહિલા ઘરે એકલી હતી ત્યારે આરોપી દિયરે ભાભી પાસે જઈ અશોભનીય દરખાસ્ત મૂકી શારીરિક સંબંધ બાંધવા દબાણ કર્યું હતું. મહિલાએ આ સાંભળી આઘાત અનુભવ્યો હતો અને મચક આપી નહોતી. ઘરમાં કંકાસ ન થાય તે હેતુથી મહિલાએ શરૂઆતમાં આ વાત પતિ કે સાસુને જણાવી નહોતી, જેનો ગેરલાભ આરોપીએ ઉઠાવ્યો હતો.
કપડાં ફાડી નાખ્યા, બૂમાબૂમ થતા પડોશીઓ દોડી આવ્યા
ગત 8 માર્ચના રોજ જ્યારે મહિલા ફરી ઘરે એકલી હતી, ત્યારે આરોપી દિયરે બળજબરી શરૂ કરી હતી. દિયરે ભાભી સાથે ઝપાઝપી કરી કપડાં ફાડી નાખ્યા હતા. ગભરાયેલી મહિલાએ હિંમત દાખવી બૂમાબૂમ કરતા આસપાસના પડોશીઓ ભેગા થઈ ગયા હતા. આ દરમિયાન મહિલાનો પતિ પણ ઘરે આવી પહોંચતા સમગ્ર મામલો પોલીસ સ્ટેશને પહોંચ્યો હતો.
આ પણ વાંચો: ગુજરાત ATSનો મુંબઈમાં સપાટો! 22 કિલો એટોમિડેટ સાથે 2 આરોપી ઝડપાયા, ઈન્ટરનેશનલ ડ્રગ નેટવર્કનો ભંડાફોડ
પોલીસે આરોપીને દબોચ્યો
પોલીસે જણાવ્યું હતું કે, મહિલાની ફરિયાદના આધારે છેડતી અને દુષ્કર્મના પ્રયાસનો ગુનો નોંધી આરોપીની ધરપકડ કરવામાં આવી છે. પોલીસ હવે એ દિશામાં તપાસ કરી રહી છે કે અગાઉ પણ આરોપીએ મહિલાને કેટલી વાર હેરાન કરી હતી. હાલમાં આરોપી પોલીસ કસ્ટડીમાં છે અને વધુ કાયદેસરની કાર્યવાહી હાથ ધરવામાં આવી છે.
