આ પણ વાંચો ટ્રેન્ડિંગ સમાચાર
બાર દિવસ બાદ ફરીથી
આ વખતે સુરતની રિજનલ પાસપોર્ટ ઓફિસને ધમકીનો મેઇલ મળતાં તકેદારીના ભાગરૂપે પોલીસે ચેકિંગ કર્યું
રાજકોટ: રાજકોટ સહિત સૌરાષ્ટ્રની પોસ્ટ ઓફિસ અને પાસપોર્ટ ઓફિસને ફરીથી બોમ્બથી ઉડાડવાની ધમકી મળતાં પોલીસે એન્ટી સબોટેજ ચેકિંગ કર્યું હતું. પરંતુ એકપણ સ્થળેથી કાંઇ શંકાસ્પદ નહીં મળતા ધારણા મુજબ જ ધમકી પોકળ પૂરવાર થઇ હતી. ૧૨ દિવસ પહેલા પણ આ રીતે પોસ્ટ ઓફિસ અને પાસપોર્ટ ઓફિસને બોમ્બથી ઉડાડવાની ધમકી મળી હતી.
ગઇ તા. ૨૭મી ફેબુ્રઆરીએ અમદાવાદની રિજનલ પાસપોર્ટ ઓફિસને બોમ્બથી ઉડાડવાની ધમકી મળતા તકેદારીના ભાગરૂપે સૌરાષ્ટ્રભરની પોસ્ટ ઓફિસ અને પાસપોર્ટ ઓફિસમાં પોલીસે ચેકિંગ કર્યું હતું. હવે સુરતની રિજનલ પાસપોર્ટ ઓફિસને આ પ્રકારની ધમકી મળતાં તકેદારીના ભાગરૂપે ફરીથી સૌરાષ્ટ્રની પોસ્ટ ઓફિસ અને પાસપોર્ટ ઓફિસમાં પોલીસે ચેકિગ કર્યું હતું.
રાજકોટના ગોંડલ રોડ પર આવેલી પાસપોર્ટ ઓફિસ અને હરિહર ચોકમાં આવેલી હેડ પોસ્ટ ઓફિસમાં એ ડિવિઝન પોલીસ સાથે એસઓજી, ક્રાઇમ બ્રાંચની ટીમો પહોંચી હતી. બોમ્બ ડિસ્પોઝલ સ્કવોડ અને સ્નાઇફર ડોગની મદદથી બંને કચેરીનો ખૂણેખૂણો અને આસપાસનો વિસ્તાર ચકાસ્યો હતો. પરંતુ કાંઇ શંકાસ્પદ મળ્યું ન હતું.
જૂનાગઢ એસઓજી, બોમ્બ-ડોગ સ્ક્વોડ, ફાયર બ્રિગેડ તેમજ ઉચ્ચ પોલીસ અધિકારીઓએ ગાંધીગ્રામ ચોકમાં આવેલી પોસ્ટ ઓફિસે પહોંચી પોસ્ટ ઓફિસ ખાલી કરાવી તપાસ કરી હતી. કર્મચારીઓ અને અરજદારોએ પોતાનું કામ પડતું મુકી બહાર નીકળી જવું પડયું હતું. દોઢ-બે કલાક સુધી સમગ્ર પોસ્ટ ઓફિસમાં તપાસ બાદ કંઈ મળી આવ્યું ન હતું આથી સૌએ રાહતનો શ્વાસ લીધો હતો. સમગ્ર રાજ્યમાં અવાર-નવાર આવી રીતે ધમકી આપી દોડધામ કરાવનાર શખ્સ હજુ સુધી પકડાયો નથી ત્યારે પોલીસની સાયબર ક્ષેત્ર અંગેની ક્ષમતા સામે અનેક સવાલો ઉઠયા છે.
અમરેલીની પોસ્ટ ઓફિસમાં જ પાસપોર્ટ સેવા કેન્દ્ર કાર્યરત છે. જ્યાં પણ પોલીસે કચેરી ખાલી કરાવી ચેકિંગ કર્યું હતું. પોલીસના ધાડેધાડા જોઇ ગ્રાહકો અને કર્મચારીઓમાં ગભરાટ જોવા મળ્યો હતો. કલાકો સુધી ચેકિંગ બાદ કાંઇ પણ વાંધાજનક કે શંકાસ્પદ વસ્તુ મળી ન હતી.
જામનગરની ચાંદી બજારમાં આવેલી મુખ્ય પોસ્ટ ઓફિસમાં પોલીસે ચેકિંગ કર્યું હતું. પરંતુ કશું વાંધાજનક નહીં મળતા હાશકારો અનુભવ્યો હતો. પાર્સલોમાં બોમ્બ મૂકાયો હોવાની ધમકી અપાઇ હોવાથી તમામ પાર્સલો પણ પોલીસે ચેક કર્યા હતાં. પોસ્ટ ઓફિસ ખાલી કરાવ્યા બાદ પોલીસે ચેકિંગ કર્યું હતું. જેને કારણે અરજદારોને મુશ્કેલીનો સામનો કરવો પડયો હતો.
મોરબીના પરાબજારમાં આવેલી મુખ્ય પોસ્ટ ઓફિસમાં પણ સ્થાનિક પોલીસે ધસી જઇ કર્મચારીઓ અને અરજદારોને બહાર કાઢી ચેકિંગ કર્યું હતું. પરંતુ કાંઇ પણ વાંધાજનક વસ્તુ મળી ન હતી.
