આ પણ વાંચો ટ્રેન્ડિંગ સમાચાર
પ્રેમજાળમાં ફસાવી વોટ્સએપ પર ફોટા મંગાવ્યા બાદ
કલોલ એડિશનલ સેશન્સ કોર્ટે ૫૦ હજારનો દંડ અને ભોગ બનનારને ૧ લાખનું વળતર ચૂકવવા આદેશ કર્યો
ગાંધીનગર : સોશિયલ મીડિયાના માધ્યમથી યુવતીને પ્રેમજાળમાં ફસાવી તેના અશ્લીલ
વીડિયો અને ફોટા પાડીને સોશિયલ મીડિયા પર વાયરલ કરનાર ધોળકાના શખ્સને કલોલની એડિશનલ
સેસન્સ કોર્ટ દ્વારા ૫ વર્ષની સખ્ત કેદ અને ૫૦,૦૦૦નો દંડ ફટકારવામાં આવ્યો છે. આ ઉપરાંત, ભોગ બનનાર યુવતીને
એક લાખ રૃપિયાનું વળતર ચૂકવવાનો પણ કોર્ટે આદેશ કર્યો છે.
આ કેસની મળતી વિગત મુજબ અમદાવાદ જિલ્લાના ધોળકા તાલુકાના
સાથળ ગામનો મૂળ વતની અને હાલ કલીકુંડ,
ધોળકા ખાતે રહેતા હિરેન ઉર્ફે જીગો મનુભાઈ પટેલ સોશિયલ મીડિયા મારફતે યુવતીના
સંપર્કમાં આવ્યો હતો. તેણે યુવતીને પોતાની પ્રેમજાળમાં ફસાવી હતી. ત્યારબાદ ગત ૧૫
જુલાઈ ૨૦૨૩ના રોજ તે યુવતીને અમદાવાદના ગેસ્ટ હાઉસમાં લઈ ગયો હતો અને તેની મરજી
વિરુદ્ધ શરીર સંબંધ બાંધવાનો પ્રયાસ કર્યો હતો. જ્યારે યુવતીએ તેની સાથે વાત
કરવાનું બંધ કરી દીધું, ત્યારે
હિરેને અવાર-નવાર ફોન કરીને ગાળો આપી હતી અને યુવતીના માતા-પિતાને જાનથી મારી
નાખવાની ધમકી આપી હતી. એટલું જ નહીં,
વોટ્સએપ વીડિયો કોલ દરમિયાન યુવતી પાસે નિવ ફોટા મંગાવ્યા હતા અને યુવતીની જાણ
બહાર તેના અશ્લીલ વીડિયો તથા સ્ક્રીન શોર્ટ બનાવી લીધા હતા. આ અશ્લીલ સામગ્રી
યુવતીના સગા-સંબંધીઓમાં વાયરલ કરી તેને સમાજમાં બદનામ કરવાનો પ્રયાસ કર્યો હતો. જેથી
આ મામલે કલોલ શહેર પોલીસ મથકમાં ગુનો દાખલ કરવામાં આવ્યો હતો અને આ કેસ કલોલના
એડિશનલ સેસન્સ જજ ડી.વી શાહની કોર્ટમાં ચાલ્યો હતો. જ્યાં સરકારી વકીલ જીગ્નેશ.એચ
જોષી દ્વારા પુરાવાઓ રજૂ કરવામાં આવ્યા હતા અને દલીલ કરવામાં આવી હતી કે, આરોપીએ યુવતીને
બદનામ કરવા માટે પ્રયાસ કર્યો છે. તેણીની જાણ બહાર ફોટા લઈને વાયરલ કર્યા છે
સમાજમાં વધતી આ પ્રકારની ઘટનાઓને પગલે આરોપીને સખતમાં સખત સજા થવી જોઈએ. જેના પગલે
કોર્ટ દ્વારા હિરેન ઉર્ફે જીગો મનુભાઈ પટેલને પાંચ વર્ષની સખત કેદની સજા કરવામાં
આવી હતી.
