આ પણ વાંચો ટ્રેન્ડિંગ સમાચાર
Vadodara Crime : વડોદરા શહેરના છાણી જકાતનાકા વિસ્તારમાં પાર્કિંગ મુદ્દે થયેલા ઝઘડામાં યુવાન પર હુમલો થવાનો બનાવ સામે આવ્યો છે. ઈજાગ્રસ્ત યુવાનને સારવાર માટે હોસ્પિટલમાં ખસેડવામાં આવ્યો છે અને પોલીસે આરોપીઓ સામે ફરિયાદ નોંધવાની કાર્યવાહી હાથ ધરી છે.
વડોદરા શહેરના છાણી જકાતનાકા વિસ્તારમાં આવેલા શ્રીજી એવન્યુમાં રહેતા જયરાજસિંહ નરેન્દ્રસિંહ સિંધા (ઉ.વ.23) મકરપુરા GIDCમાં નોકરી કરી પરિવારનું ગુજરાન ચલાવે છે. ગત તા. 16 માર્ચના રોજ રાત્રે આશરે સાડા આઠ વાગ્યે નોકરી પરથી ઘરે પરત ફર્યા બાદ તેમણે પોતાની બાઈક ફ્લેટની નીચે પાર્ક કરી હતી.
તે દરમિયાન સોસાયટીમાં સિક્યુરિટી તરીકે કામ કરતા ભરતભાઈ નારાયણભાઈ શ્રીમાળીએ પાર્કિંગ બાબતે વાંધો ઉઠાવી ગાળો બોલી ઝઘડો શરૂ કર્યો હતો. બાદમાં તેમના ભત્રીજા પાર્થકુમાર પ્રશાંતભાઈ શ્રીમાળી પણ ત્યાં આવી પહોંચ્યા હતા અને બંનેએ મળી જયરાજસિંહ સાથે મારામારી કરી હતી.
આરોપીઓએ યુવાનને નીચે પાડી દીધો હતો અને ઢોર માર મારી તેમજ લાતો મારી ગંભીર ઈજા પહોંચાડી હતી. હુમલા દરમિયાન ભરત શ્રીમાળીએ આજે તને “જીવતો નહીં છોડું” જેવી ધમકી પણ આપવામાં આવી હતી. આ હુમલામાં જયરાજસિંહને ચહેરા, હોઠ તેમજ મોઢાના અંદરના ભાગે ઈજાઓ પહોંચી હતી.
ઘટના બાદ તેમના પિતા નરેન્દ્રસિંહ તથા સોસાયટીના અન્ય રહેવાસીઓએ તેમને તાત્કાલિક ખાનગી વાહનમાં હોસ્પિટલમાં લઈ ગયા હતા, જ્યાં તેમની સારવાર ચાલુ છે. આ બનાવ અંગે જયરાજસિંહે બંને આરોપીઓ સામે પોલીસમાં ફરિયાદ નોંધાવી છે.
