આ પણ વાંચો ટ્રેન્ડિંગ સમાચાર
– મધ્ય-પૂર્વમાં વોર-ઈફેક્ટ : ક્રૂડ ઉંચકાતાં ઈમ્પોર્ટ બિલમાં વૃદ્ધિના સંકેતો
– રૂપિયા સામે ડૉલર 107 પૈસા ઉછળી 93.76ની નવી ટોચે પહોંચ્યા બાદ અંતે ૯૩.૭૧ના મથાળે બંધ રહ્યો
– ક્રૂડ, સોના-ચાંદી, કઠોળ, ખાદ્યતેલો સહિતની ચીજોની ઈમ્પોર્ટ કોસ્ટમાં વૃદ્ધિ : ફોરેક્સ રિઝર્વ ઘટતાં હવે ડોલર ઉછળી રૂા. ૯૫ થવાની ભીતિ
મુંબઈ: હુંડિયામણ બજારમાં આજે રૂપિયામાં મોટો કડાકો બોલાઈ જતાં ભાવ નવા નીચા તળિયે પટકાયો હતો ઈરાન વોરના પગલે વિશ્વ બજારમાં ક્રૂડતેલના ભાવ વધી જતાં તથા દેશની વેપાર ખાધ વધતાં તથા ઘરઆંગણે ડોલરનો ઈન્ફલો ઘટતા તથા આઉટફલો વધતાં રૂપિયા પર દબાણ નોંધપાત્ર વધ્યું હતું. રૂપિયા સામે ડોલરના ભાવ આજે ૧૦૭ પૈસા ઉછળી રૂ.૯૩ની સપાટી પાર કરી ઉંચામાં ભાવ રૂ.૯૩.૭૬ની નવી ટોચે પહોંચી કામકાજના અંતે રૂપિયો રૂ.૯૩.૭૧ રહ્યા હતા.
ડોલરના ભાવ જે બુધવારે સતાતાર બંધ રૂ.૯૨.૬૪ રહ્યા હતા તે ગુરૂવારે બંધ બજારે ઉંચામાં રૂ.૯૩ પાર કરી રૂ. ૯૩.૨૫ આસપાસ બોલાતા થયા હતા તે ભાવ આજે સત્તાવાર સોદામાં સવારે રૂ.૯૨.૮૯ ખુલ્યા પછી ઉંચામાં ભાવ રૂ.૯૩.૭૬ સુધી ઉછળી અંતે રૂ.૯૩.૭૧ રહ્યા હતા. રૂપિયામાં આજે નોંધાયેલો ૧૦૭ પૈસાનો કડાકો તાજેતરના સમયનો સૌથી મોટો કડાકો છે. ૨૦૨૬ના વર્ષમાં એશિયન દેશોની કરન્સીમાં રૂપિયામાં સૌથી વધુ ૩.૫ ટકાનું ધોવાણ થયું છે જે ૨૦૨૫માં ૪.૯ ટકાનું ધોવાણ હતું.
રૂપિયો તૂટતાં દેશમાં આયાત થતી ક્રૂડ તથા સોના-ચાંદી, કઠોળ, ખાદ્યતેલો સહિતની વિવિધ ચીજો મોંધી થશે તથા ફુગાવો ઊંચો જશે એવી ગણતરી બજારના આર્થિક તજજ્ઞા બતાવી રહ્યા હતા.
વૈશ્વિક સ્તરે ઈરાન યુદ્ધ વકરી રહ્યાના સંકેતોથી બજારમાં અજંપો વધ્યો હતો. ક્રૂડના ઉંચા ભાવના કારણે દેશમાં ઈંમ્પોર્ટ બિલ વધી જવાની ભીતિ સર્જાઈ છે. અમેરિકામાં વ્યાજ દર ઘટાડવાના બદલે જાળવી રાખવાનું નક્કી કરાતાં વિશ્વ બજારમાં ડોલર ઈનવ્ડેક્સમાં મજબુતાઈ દેખાઈ હતી. રિઝર્વ બેન્ક તથા સરકારી બેન્કોની ડોલરમાં ઉછાળે વેચવાલી નિકળતાં રૂપિયામાં વધુ મોટો ઘટાડો નિવારી શકાયો હતો. જોકે આમ ન થયું હોત તો રૂપિયો વધુ ગબડી રૂ.૯૪ની અંદર જવાની શક્યતા હતી.
દરમિયાન, વિશ્વ બજારમાં ડોલરનો ગ્લેોબલ ઈન્ડેક્સ આજે નીચામાં ૯૯.૨૫ તથા ઉંચામાં ૯૯.૫૪ થઈ ૯૯.૫૩ રહ્યો હતો. ભારતમાં ફોરેક્સ રિઝર્વમાં વધુ ૭.૦૫ અબજ ડોલરનો ઘટાડો થયાના સમાચારની અસર પણ રૂપિયા પર હવે જોવા મળશે એવી શક્યતા છે. દેશમાં ફારેક્સ રિઝર્વ ૭.૦૫ અબજ ડોલર ઘટી ૭૦૯.૭૬ અબજ ડોલર થયાના સમાચાર હતા. રૂપિયાને પીઠબળ આપવા તાજેતરમાં સરકારી બેન્કોએ નોેંધપાત્ર પ્રમાણમાં ડોલરનું વેંચાણ હાથ ધર્યું હતું અને તેના પગલે દેશના ફોરેક્સ રિઝર્વમાં ઘટાડો થતો જોવા મળ્યો હતો. વિશ્વના વિવિધ દેશોમાં વોર-ઈફેક્ટ વચ્ચે ફુગાવો વધી જતાં હવે વૈશ્વિક સ્તરે વ્યાજના દરો ઘટવાના બદલે આગળ ઉપર વધતા જોવા મળશે એવી શક્યતા ચર્ચાતી થઈ છે. આની અસર પણ કરન્સી બજારો પર હવે પછી જોવા મળશે.
આજે બ્રિટીશ પાઉન્ડના ભાવ રૂપિયા સામે ૨૩૪ પૈસા ઉછળી રૂ.૧૨૫ પાર કરી રૂ.૧૨૫.૫૨ થઈ રૂ.૧૨૫.૪૧ રહ્યા હતા. જ્યારે યુરોપીયન કરન્સી યુરોના ભાવ ૧૩૨ પૈસા વધી રૂ.૧૦૮ પાર કરી ઉંચામાં ભાવ રૂ.૧૦૮.૨૮ થઈ રૂ.૧૦૮.૨૩ રહ્યા હતા. જાપાનની કરન્સી રૂપિયા સામે આજે ૧.૭૧ ટકા ઉછળી હતી ચીનની કરન્સી ૧.૦૭ ટકા ઉંચકાઈ હતી. આમ આજે વિશ્વની વિવિધ પ્રમુખ કરન્સીઓ સામે રૂપિયામાં નોંધપાત્ર ધોવાણ થતાં બજારમાં ગભરાટ ફેલાયો હતો.
રૂપિયો તૂટી રૂ.૯૫ થવાની આગાહી તાજેતરમાં ગોલ્ડમેન દ્વારા કરાઈ હતી અને આ આગાહી હવે સાચી પડે એવી શક્યતા બજારમાં સર્જાતાં ઈમ્પોર્ટરોમાં પણ અજંપો વધ્યાના વાવડ મળ્યા હતા.
|
ફોરેક્સ ભાવ |
|
|
ડોલર |
રૂ. |
|
પાઉન્ડ |
રૂ. ૧૨૫.૪૧ |
|
યુરો |
રૂ.૧૦૮.૨૩ |
|
યેન |
રૂ. ૦.૫૯ |
