આ પણ વાંચો ટ્રેન્ડિંગ સમાચાર
– વોટ્સએપમાં લિંક મોકલી ક્રેડિટ કાર્ડની માહિતી મેળવી લીધી
– ખેડૂતો એપીકે ફાઈલની લિંકમાં ક્રેડિટ કાર્ડ નંબર અને સીવીવી નંબર જેવી માહિતી ભરતા જ પૈસા ઉપડી ગયા, પોલીસે ગુનો નોંધ્યો
નડિયાદ : મહેમદાવાદ તાલુકાના વણસોલ સુંઢા ગામે રહેતા અને ખેતીકામ કરતા કનુભાઈ મોહનભાઈ પટેલ સાથે સાયબર ગઠિયાએ આશરે ૨.૯૬ લાખ રૂપિયાની ઓનલાઇન છેતરપિંડી કરી છે. ગઠિયાએ ખેડૂતના મોબાઈલ પર વોટ્સએપ લિંક મોકલી ક્રેડિટ કાર્ડની ગુપ્ત માહિતી મેળવી લીધી હતી અને ત્યારબાદ કાર્ડમાંથી અલગ અલગ ત્રણ ટ્રાન્જેક્શન દ્વારા નાણાં ટ્રાન્સફર કરી લીધા હતા. આ મામલે ભોગ બનનાર ખેડૂતે સાયબર હેલ્પલાઇન પર ફરિયાદ કર્યા બાદ મહેમદાવાદ પોલીસ મથકે વિધિવત્ ફરિયાદ નોંધાવી છે.
મહેમદાવાદના વણસોલ સુંઢા વિસ્તારના હરીપુરાલાટમાં રહેતા ૬૬ વર્ષીય ખેડૂત કનુભાઈ મોહનભાઈ પટેલ સાયબર ફ્રોડનો શિકાર બન્યા છે. ગત ફેબુ્રઆરી માસની ૨ તારીખે તેઓ પોતાના ઘરે હાજર હતા, ત્યારે તેમના વોટ્સએપ પર અજાણ્યા મોબાઈલ નંબર પરથી એક એપીકે ફાઈલની લિંક આવી હતી. લિંક મોકલ્યા બાદ ગઠિયાએ ફોન કરીને જણાવ્યું હતું કે, તમારા એચડીએફસી બેન્કના ક્રેડિટ કાર્ડમાં ઓનલાઇન ઇન્ટરનેશનલ ટ્રાન્જેક્શન ચાલુ છે, જેને બંધ કરવા માટે આ લિંક ઓપન કરી તેમાં કાર્ડ નંબર અને સીવીવી નંબર જેવી માહિતી ભરવી પડશે. ખેડૂતે વિશ્વાસમાં આવીને વિગતો ભરી સેવ કરતા જ છેતરપિંડીનો ખેલ શરૂ થયો હતો. થોડી વાર બાદ ખેડૂતે બેન્કની એપ્લિકેશનમાં તપાસ કરતા તેમના ક્રેડિટ કાર્ડમાંથી ૯૨,૭૦૦ રૂપિયા અને ત્યારબાદ ૧,૦૧,૯૭૦ રૂપિયાના બે ટ્રાન્જેક્શન મળી કુલ ૨,૯૬,૬૪૦ રૂપિયા ઉપડી ગયા હોવાનું જણાયું હતું.
પોતાની સાથે છેતરપિંડી થઈ હોવાનું જણાતા કનુભાઈએ તુરંત સાયબર ક્રાઇમ હેલ્પલાઇન નંબર પર ફોન કરીને ફરિયાદ નોંધાવી હતી. ત્યારબાદ તેઓએ એચડીએફસી બેન્કના મેનેજરની મુલાકાત લીધી હતી, જ્યાં બેન્ક દ્વારા પોલીસ ફરિયાદ કરવાની સલાહ આપવામાં આવી હતી. આખરે કનુભાઈએ મહેમદાવાદ પોલીસ મથકે પહોંચી અજાણ્યા મોબાઈલ ધારક વિરુદ્ધ ફરિયાદ આપતા પોલીસે તપાસનો ધમધમાટ શરૂ કર્યો છે. મહેમદાવાદ પોલીસે આ મામલે ગુનો દાખલ કર્યોે છે. સાયબર ગઠિયાએ કયા લોકેશન પરથી ફોન કર્યોે હતો અને કયા બેન્ક ખાતામાં નાણાં ટ્રાન્સફર થયા છે તે દિશામાં પોલીસે તપાસ કેન્દ્રિત કરી છે. ગ્રામ્ય વિસ્તારોમાં વધતા જતા સાયબર ક્રાઇમના કિસ્સાઓને પગલે ખેડૂત વર્ગમાં ચિંતાની લાગણી ફેલાઈ છે.
