આ પણ વાંચો ટ્રેન્ડિંગ સમાચાર
– વર્તમાન બિલ્ડિંગમાં 3 કરોડના ખર્ચે વધુ બે માળનું નિર્માણ કરાશે
– મનપાની રચના બાદ વોર્ડ સભ્યોની સંખ્યા વધતા નવી વ્યવસ્થા અનિવાર્ય હોય ચૂંટણી પૂર્વે બિલ્ડિંગ વિસ્તરણનો નિર્ણય લેવાયો
સુરેન્દ્રનગર : સુરેન્દ્રનગર મહાનગરપાલિકાની પ્રથમ ચૂંટણીના પડઘમ વાગી રહ્યા છે ત્યારે વહીવટી તંત્ર દ્વારા ચૂંટાયેલી બોડી માટે બેઠક વ્યવસ્થા ઉભી કરવા કમર કસી છે. હાલ નગરપાલિકાના જૂના બે માળના બિલ્ડિંગમાં કમિશનરની ચેમ્બર અને અન્ય ઓફિસો કાર્યરત હોવાથી, આગામી સમયમાં ચૂંટાનારા ૫૨ કોર્પોરેટરો અને વિવિધ સમિતિના ચેરમેનો માટે બેસવાની કોઈ વ્યવસ્થા ઉપલબ્ધ નથી.
આ સમસ્યાના ઉકેલ માટે હયાત બિલ્ડિંગ પર વધુ બે માળનું નિર્માણ કરવાનો નિર્ણય લેવામાં આવ્યો છે. આ પ્રોજેક્ટ માટે અંદાજે ૩ કરોડનું બજેટ ફાળવવામાં આવ્યું છે અને તેની ટેન્ડર પ્રક્રિયા પણ પૂર્ણ કરી દેવામાં આવી છે.
મહાનગરપાલિકાની રચના બાદ ૧૩ વોર્ડના ૫૨ સભ્યો ચૂંટાશે, જેમાંથી મેયર, ડેપ્યુટી મેયર અને વિવિધ ખાતાના ચેરમેનોની નિમણૂક કરવામાં આવશે. અગાઉ જ્યાં ચેરમેનો બેસતા હતા ત્યાં હવે કમિશનરની ચેમ્બર બનાવી દેવાતા નવી વ્યવસ્થા અનિવાર્ય બની છે. નવા પ્લાન મુજબ, બે માળના બિલ્ડિંગને ચાર માળનું બનાવવામાં આવશે, જેમાં ચૂંટાયેલી બોડી માટે અદ્યતન ઓફિસો અને બેઠક વ્યવસ્થા પૂરી પાડવામાં આવશે. જોકે, ટેન્ડરની શરતો મુજબ આ કામ પૂર્ણ થતા અંદાજે એક વર્ષનો સમય લાગશે. આથી, ચૂંટણી બાદ અસ્તિત્વમાં આવનારી પ્રથમ ચૂંટાયેલી બોડીએ નવી ઓફિસો માટે થોડો સમય રાહ જોવી પડશે. હાલમાં એજન્સીઓને કામગીરી સોંપીને વહેલી તકે નિર્માણ કાર્ય શરૂ કરવાની તૈયારીઓ હાથ ધરાઈ છે.
