આ પણ વાંચો ટ્રેન્ડિંગ સમાચાર
Sabarkantha Accident: સાબરકાંઠા જિલ્લાના હિંમતનગર-ઇડર સ્ટેટ હાઈવે પર અકસ્માતની ઘટના સામે આવી છે. હિંગળાજ ભેટાલી ગામ નજીક ઘઉંનું પરાળ ભરેલા ટ્રેક્ટર અને આઇસર ટેમ્પો વચ્ચે જોરદાર ટક્કર થઈ હતી. આ અકસ્માતમાં ત્રણ લોકોને ઈજાઓ પહોંચતા તેમને તાત્કાલિક સારવાર માટે ખસેડવામાં આવ્યા છે.
રેલિંગ તોડી આઇસર ડિવાઈડર સાથે અથડાયું
મળતી માહિતી અનુસાર, હિંગળાજ ભેટાલી પાસે અકસ્માત એટલો જોરદાર હતો કે પરાળ ભરેલા ટ્રેક્ટર સાથે અથડાયા બાદ આઇસર ટેમ્પો કાબૂ ગુમાવી બેઠો હતો. ટેમ્પો રોડની લોખંડની રેલિંગ તોડીને સીધો ડિવાઈડર સાથે અથડાતા તેને ભારે નુકસાન થયું છે. ટક્કરને પરિણામે ટ્રેક્ટર પણ રોડ પર પલટી ખાઈ ગયું હતું.
આ પણ વાંચો: સાબરકાંઠાના ખેડૂતો માટે રાહતના સમાચાર, ઘઉંની ટેકાના ભાવે ખરીદી માટે રજિસ્ટ્રેશન મુદત લંબાવાઈ
હાઈવેની મધ્યમાં ટ્રેક્ટર પલટી જતાં પરાળ રોડ પર વેરાઈ ગયું હતું, જેના કારણે ઇડર-હિંમતનગર માર્ગ પર વાહનોની લાંબી લાઈનો લાગી હતી અને ટ્રાફિક જામની સ્થિતિ સર્જાઈ હતી. ઘટનાની જાણ થતા જ જાદર પોલીસની ટીમ તાત્કાલિક સ્થળ પર પહોંચી હતી. પોલીસે ક્રેન અને અન્ય સાધનોની મદદથી વાહનો ખસેડી ટ્રાફિક વ્યવસ્થા પુનઃસ્થાપિત કરી હતી.
અકસ્માતમાં ઘાયલ થયેલા ત્રણેય વ્યક્તિઓને 108 એમ્બ્યુલન્સ મારફતે નજીકની હોસ્પિટલમાં સારવાર માટે મોકલવામાં આવ્યા છે. જાદર પોલીસે આ મામલે અકસ્માતનો ગુનો નોંધીને વધુ તપાસ હાથ ધરી છે.
