પાલિકાના વોટ્સએપ ગુ્રપમાં સંપર્ક થયો હતો
નડિયાદ ગ્રામ્ય પોલીસ દ્વારા મહિલા સહિત બે શખ્સો સામે ગુનો નોંધી વધુ કાર્યવાહી હાથ ધરવામાં આવી
નડિયાદ: નડિયાદના યુવકને ગઠિયાએ પોતાના સંબંધી મહિલા ગાંધીનગરની ઓફિસમાં નોકરી કરતા હોવાનું કહી સરકારી નોકરી અપાવવાની લાલચ આપી જુદા જુદા ચાર્જ પેટે રૂ.૨૦,૭૦૦ મહિલાના ખાતામાં ટ્રાન્સફર કરાવી વિશ્વાસઘાત છેતરપિંડી કરી હતી. આ બનાવ અંગે નડિયાદ ગ્રામ્ય પોલીસે ગુનો નોંધી વધુ કાર્યવાહી હાથ ધરી હતી.
નડિયાદ સંતરામ વાટિકા સોસાયટી કપડવંજ રોડ પર રહેતા યોગેશકુમાર બાબુભાઈ તુરી (બારોટ) (ઉં.વ.૩૩) નડિયાદ નગરપાલિકામાં છુટક મજુરી કામ કરે છે. અગાઉ તા. ૧૧-૧૧-૨૦૨૫ના રોજ તેમના મોબાઇલના વોટ્સપ ઉપર નડિયાદ નગરપાલિકાના ગુ્રપમાં હિરેનભાઈ પ્રવિણભાઇ શ્રીમાળી (રહે. સંતરામ પાર્ક સોસાયટી જુનાબિલોદરા)નો સંપર્ક થયો હતો. આ દરમિયાન હિરેનભાઈએ યોગેશને તેના સાથી મિત્ર ઉર્વશીબેન શાંતીલાલ શ્રીમાળી (રહે. ગાંધીનગર, જિલ્લા ઉધોગભવન શિક્ષણ શાખા)માં નોકરી કરે છે. તેઓ નોકરી અપાવે છે તેવી વાત કરી હતી. તેઓએ નોકરી અપાવવાનો વિશ્વાસ આપી રૂ. ૫૦,૦૦૦ની માગણી કરી હતી. જેથી તા. ૧૪-૧ ૧-૨૦૨૫ના રોજ હિરેનભાઈના કહેવાથી તેઓને ડોક્યુમેન્ટ આપી ઉર્વશીબેનના ગૂગલ પે એકાઉન્ટમાં રૂ.૧૨,૦૦૦ ટ્રાન્સફર કર્યા હતા. ત્યાર પછી હિરેનભાઈ નોકરીનું એગ્રીમેન્ટ ભરાવવા તેઓના ખાતામાં રૂ.૩૦૦ તેમજ બીજા રૂ.૪૦૦ ટ્રાન્સફર કર્યા હતા. ત્યાર પછી નોકરીનો ઓર્ડર મળ્યા પછી બાકીના રૂપિયા આપવાની વાત કરી તેના ભાઈ ભુપેન્દ્રભાઈ બાબુભાઈના ખાતામાંથી ઉર્વશીબેન શ્રીમાળીના ખાતામાં પેટીએમથી રૂ.૮૦૦૦ ઓનલાઇન ટ્રાન્સફર કર્યા હતા. ત્યાર બાદ તા. ૨૬-૦૧-૨૦૨૬ના રોજ ભુપેન્દ્રકુમારએ ઉર્વશીબેનના ફોન ઉપર વાત કરી તો તેઓએ વર્ક ઓર્ડર તેમજ લેપટોપ અપાવી દઇશ તેમ છતા વર્ક ઓર્ડર આપેલ નહીં. જેથી તા.૧૨-૦૨-૨૦૨૬ના રોજ ઉર્વશીબેન બેસે છે. ત્યાં તપાસ કરતા જાણવા મળેલું કે, ગાંધીનગર ઉધ્યોગભવનના ચોથા માળે કોઇ આવી શિક્ષણ ખાતાની કચેરી આવેલ નથી. આમ હીરેનભાઈ પ્રવિણભાઈ શ્રીમાળી અને ઉર્વશીબેન શ્રીમાળીએ નોકરી અપાવવાની લાલચ આપી રૂ.૨૦,૭૦૦ ટ્રાન્સફર કરી લઈ નોકરી ન અપાવી વિશ્વાસઘાત છેતરપિંડી કરી હતી. આ બનાવ અંગે યોગેશકુમાર બાબુભાઈ તુરીની ફરિયાદ આધારે નડિયાદ ગ્રામ્ય પોલીસે હિરેનભાઈ પ્રવીણભાઈ શ્રીમાળી (રહે.સંતરામ પાર્ક સોસાયટી, જુના બિલોદરા, નડિયાદ) અને ઉર્વશીબેન શાંતિલાલ શ્રીમાળી (રહે. ઉદ્યોગ ભવન, ગાંધીનગર) સામે ગુનો નોંધી વધુ કાર્યવાહી હાથ ધરી હતી.
