આ પણ વાંચો ટ્રેન્ડિંગ સમાચાર
અત્રે નંદેસરી જીઆઈડીસીમાં જોખમી કેમિકલના ગેરકાયદે નિકાલ મામલે જીપીસીબીએ આણંદ જિલ્લાની સોજિત્રા જીઆઈડીસીની ઈન્ફિનિયમ ફાર્માસ્યુટિકલ્સ કંપની તાત્કાલિક બંધ કરવાનો હુકમ કર્યો છે.
શનિવારે રાત્રે પોલીસે નંદેસરી જીઆઈડીસીમાં આવેલ ગુજરાત ચોકડી પાસે ટેન્કરમાંનુ હેઝાર્ડસ મટિરિયલ ગેરકાયદે નિકાલ કરવાની પ્રવૃત્તિ ઝડપી પાડી હતી. કેમિકલ માફિયાઓ અંડરગ્રાઉન્ડ પાઈપલાઈન મારફતે વરસાદી ગટરમાં કેમિકલનો નિકાલ કરતા હોવાની વિગતો સપાટી પર આવી હતી.પોલીસે ૨૦ હજાર લીટર એસિડિક વેસ્ટ વોટર કબજે કરી બનાવ અંગે ટેન્કર ચાલક અને સ્થાનિકોના નિવેદન નોંધ્યા છે.
બીજીતરફ, જીપીસીબી (ગુજરાત પોલ્યુશન કંટ્રોલ બોર્ડ) વડોદરાની ટીમ દ્વારા મટિરિયલના સેમ્પલ મેળવવામાં આવ્યા હતા. આ ટેન્કર સોજિત્રા જીઆઈડીસીની ઈન્ફિનિયમ ફાર્માસ્યુટિકલ્સ કંપની ખાતેથી આવ્યા હોવાની માહિતી મળતા આણંદ જીપીસીબીની ટીમે ઈન્ફિનિયમ કંપનીમાં ઈન્સ્પેકશન કરી મટિરિયલના સેમ્પલ તપાસના કામે લીધા હતા.
એસિડિક વેસ્ટ વોટરના બંને સ્થળેથી મેળવેલા સેમ્પલોના વિશ્લેષણના રિપોર્ટ મેચ થતા ટેન્કરો ઈન્ફિનિયમ કંપનીથી આવ્યા હોવાનું બહાર આવ્યું હતું. વડોદરા અને આણંદ જીપીસીબી દ્વારા સેમ્પલના રિપોર્ટ ગાંધીનગર સબમિટ કરાયા હતા. જેના આધારે ક્લોઝર ડાયરેક્શન ઈશ્યુ થતા કંપની સામે કડક પગલાં ભરી સેક્શન ૩૩-એ મુજબ ઉદ્યોગને તાત્કાલિક ધોરણે ઉત્પાદન બંધ કરવાનો હુકમ કરાયો છે.
આ ઉપરાંત ઝડપાયેલા બંને ટેન્કરોના રજિસ્ટ્રેશન રદ કરાવવા આરટીઓ કચેરીને અહેવાલ મોકલી અપાયો છે. પોલીસ ચાર્જશીટ કરવા માટે જીપીસીબી,વડોદરાના અભિપ્રાય બાદ પ્રવૃત્તિમાં સંડોવાયેલ કંપની સંચાલકો સહિતના શખ્સો સામે કાર્યવાહી હાથ ધરશે.
