વ્યાજે આપેલા રૂા. 2 લાખના બદલામાં રૂા. 6 લાખની ઉઘરાણી કાઢી : મોટામવા પોલીસ ચોકીનાં મેદાનમાં પણ આરોપીએ ધમકાવ્યા હતા
રાજકોટ, : બાલાજી હોલ નજીક શ્રીરામ પાર્ક શેરી નં. 3માં રહેતાં ડીમ્પલબેન વિપુલભાઇ પાંભર (ઉ.વ. 34) ખુદ તેના માસીના પુત્ર ભાવિન અશોક ટીટીયાએ વ્યાજે આપેલા રૂપિયાની પઠાણી ઉઘરાણી કરી, તેના પતિને છરીના ઘા મારી દેવાની ધમકી આપ્યાની રાજકોટ તાલુકા પોલીસ મથકમાં ફરિયાદ નોંધાઇ છે.
જેમાં ડીમ્પલબેને જણાવ્યું છે કે, દોઢેક વર્ષ પહેલાં ઝઘડાને કારણે તેના પતિ અને ભાઇને ઇજા થતાં સારવાર માટે પૈસાની જરૂર પડતાં આરોપી પાસેથી રૂા. 2 લાખ વ્યાજે લીધા હતા. બદલામાં આરોપીએ દર મહિને રૂા. 6,000 વ્યાજ આપવાનું કહ્યું હતું. પહેલાં મહિને આરોપી વ્યાજ લઇ ગયો હતો. ત્યાર પછી વ્યાજ આપવાની સગવડ નહીં થતાં આરોપીએ તેને મંગળસુત્ર આપવાનું કહ્યું હતું.
જેનો તેણે આ મારા પતિની નિશાની છે તેમ કહીં ઇન્કાર કર્યો હતો. આમ છતાં આરોપી બળજબરીથી પાંચ તોલાનું મંગળસુત્ર કઢાવીને લઇ ગયો હતો. થોડા દિવસ બાદ આરોપીએ મંગળસુત્ર ગીરવે મુકી દીધાનું કહીં એક મોબાઇલ નંબર આપ્યો હતો. જેમાં દર મહિને 2500 થી 3000 ઓનલાઇન ટ્રાન્સફર કરવાનું કહ્યું હતું. જેથી તે મુજબ રકમ ટ્રાન્સફર કરતાં હતાં.
બે મહિના પહેલાં રૂા. 2 લાખની વ્યવસ્થા થઇ જતાં આરોપીને મંગળસુત્ર પરત આપવાનું કહ્યું હતું. તે વખતે આરોપીએ વ્યાજ સહિત રૂા. 6 લાખની ઉઘરાણી કાઢી હતી. ત્યાર પછી જ મંગળસુત્ર આપવાની વાત કરી હતી. જેને કારણે અવારનવાર આરોપીને સમજાવતા હતા પરંતુ માનતો ન હતો. એટલું જ નહીં ઉગ્ર વર્તન કરતો હતો.
તેના પિતા મનુભાઇ વ્યાસના ઘરે પણ જઇ ઉઘરાણી કરી બોલાચાલી કરતો હતો. આખરે આરોપી વિરૂદ્ધ ગઇ તા. 18ના રોજ અરજી કરી હતી. જેથી પોલીસે બંને પક્ષોને મોટામવા પોલીસ ચોકીએ બોલાવ્યા હતા. તે વખતે પરિવારના સભ્યો સાથે પોલીસ ચોકીના ગ્રાઉન્ડમાં ઉભા હતા ત્યારે આરોપી તેના વકીલ વગેરે સાથે ધસી આવ્યો હતો અને તેમને ધમકાવ્યા હતા.
