Surat SBI Robbery Case: સુરતના વરાછા વિસ્તારમાં આવેલી સ્ટેટ બેંક ઓફ ઈન્ડિયા(SBI)ની શાખામાં થયેલી રૂ.50 લાખની લૂંટના કેસ મામલે સુરતના કન્યાસી ગામે હથિયાર રિકવરીની કાર્યવાહી દરમિયાન આરોપી શુભમ ઠાકુરે ફાયરિંગ કરીને ભાગવાનો પ્રયાસ કરતાં પોલીસે સ્વબચાવમાં ફાયરિંગ કર્યું હતું. આ ઘટનામાં શુભમના બંને પગમાં ગોળી વાગતા સિવિલ હોસ્પિટલ ખસેડવામાં આવ્યા છે. લાખોની લૂંટના કેસને લઈને પોલીસ હથિયાર રિકવરી અને રિકન્સ્ટ્રક્શન કરી રહી હતી, ત્યારે આ ઘટના બની હતી.
હથિયાર રિકવરીની કાર્યવાહી દરમિયાન એન્કાઉન્ટરમાં આરોપીને પગમાં વાગી ગોળી
સુરત SBI બેંકમાં લૂંટ મામલે પોલીસે શુભમ અને વિકાસ નામના બંને આરોપીને તપાસની કામગીરી અ્થે કન્યાસી ગામે લઈને પહોંચી હતી. આરોપી શુભમે લૂંટમાં વપરાયેલી પિસ્તોલ અને મોબાઈલ ખેતરમાં છૂપાવ્યા હોવાની કબૂલાત કરતાં પોલીસે સ્થળ પરથી હથિયાર કબજે કર્યું હતું. આ દરમિયાન પોલીસ પાસેથી પિસ્તોલ છીનવીને શુભમે અચાનક ફાયરિંગ શરૂ કર્યું હતું. તેવામાં પોલીસ અધિકારીએ સ્વબચાવમાં ગોળીબાર કરતાં આરોપીને બંને પગમાં ગોળી વાગી હતી.
લૂંટનો માસ્ટરમાઈન્ડ બિહાર જેલમાંથી આપતો સૂચના
સુરત SBI લૂંટ કેસની તપાસમાં દેહરાદૂનમાં 12 કરોડની રિલાયન્સ જ્વેલરી લૂંટના કુખ્યાત આરોપી કુંદન ભગતની સંડોવણી હોવાનું સામે આવ્યું હતું. લૂંટના માસ્ટરમાઈન્ડ કુંદન ભગતે જેલમાં રહીને તેના સાગરીતો દ્વારા ઘટનાને અંજામ આપ્યું હતું. આ ગેંગના બે આરોપી શુભમ અને વિકાસને પોલીસ દ્વારા ઉત્તરપ્રદેશથી ધરપકડ કરી હતી. પોલીસ કમિશનરના જણાવ્યા અનુસાર, જેલમાં બંધ કુંદન ખાસ એપના માધ્યમથી લૂંટારૂઓને સૂચના આપતો હતો.
આ પણ વાંચો: સુરત SBI બેંક લૂંટ કેસ: બિહારની જેલમાં ઘડાયો હતો માસ્ટરપ્લાન! કુખ્યાત કુંદન ભગત સહિત 3 આરોપી પોલીસ સકંજામાં
જાણો શું છે સમગ્ર મામલો
વરાછા વિસ્તારમાં સ્ટેટ બેન્ક ઓફ ઇન્ડિયાની લંબે હનુમાન રોડ બ્રાન્ચ આવેલી છે. ભરચક ગણાતા આ વિસ્તારમાં હાલ મેટ્રોનું કામ ચાલતું હતું. જેને બેંકનું ખાસ કામ હોય તેવા ગણતરીના લોકો જ હાલ બેંકમાં આવતા. આ દરમિયાન 27મી એપ્રિલના રોજ બપોરે બે વાગ્યાના અરસામાં બેંકનો સ્ટાફ તેમની કામગીરી કરી રહ્યો હતો, ત્યારે પાંચ શખસો ત્યાં આવ્યા હતા. એટલામાં હિન્દીભાષા બોલતા આ શખસોએ પિસ્તોલ કાઢીને મહિલાઓ સહિતના સ્ટાફ અને ગ્રાહકોને બાનમાં લેવાનું શરૂ કર્યું હતું અને તેમને એક તરફ લઈ જઈ કેશિયર પાસેથી 12 લાખ રૂપિયા લૂંટ્યા હતા. તેઓ ત્યાંથી ભાગવાની તૈયારી કરતા હતા તે સમયે જ બેંકમાં કેશ ડિપોઝીટ કરતી વેન પૈસા ભરેલું બોક્સ લઈને આવતા તેને પણ બંધક બનાવી તેમાંથી બીજા 40 લાખ રૂપિયા મળી કુલ 52 લાખ રૂપિયાની મત્તાની લૂંટ કરી હતી. જેમાં આરોપીઓએ પૈસા થેલા અને બેગમાં ભરી તેમજ સ્ટાફ અને ગ્રાહકોના મોબાઈલ ફોન લઈ ફરાર થઈ ગયા હતા.
