આ પણ વાંચો ટ્રેન્ડિંગ સમાચાર
વડોદરા,સુભાનપુરા વિસ્તારમાં પરોઢિયે એક મહિલાનો અછોડો લૂંટી ફરાર થઇ ગયેલા સ્કૂટર ચાલકને ડીસીબી પોલીસે ઝડપી પાડયો છે. આરોપીના પિતા અમદાવાદ ગ્રામ્યમાં એ.એસ.આઇ. તરીકે નોકરી કરે છે.
સુભાનપુરાના શીતલ એપાર્ટમેન્ટમાં રહેતા લક્ષ્મીબેન અગ્નિહોત્રી ગત ૧૯ મી તારીખે સાડા પાંચ વાગ્યે તેમના પેટ ડોગને લઇને ચાલવા નીકળ્યા હતા. ત્યારે નૂતન મહેશ્વર સોસાયટી પાસે એક યુવક સ્કૂટર પર મોબાઇલ પર વાત કરતો હતો. તેણે બંગલાનું સરનામું પૂછવાના બહાને તેમની પાસે આવીને ગળામાંથી સોનાનો અછોડો આંચકી લીધો હતો.જે અંગે ગોરવા પોલીસ સ્ટેશનમાં ફરિયાદ નોંધાઇ હતી. દરમિયાન ડીસીબી પોલીસ સ્ટેશનના પી.આઇ. ડી.જે.ચુડાસમાની ટીમ દ્વારા તપાસ હાથ ધરવામાં આવી હતી. પોલીસને સ્કૂટરનો નંબર મળતા પોલીસ વાહન માલિક સુધી પહોંચી હતી. આ સ્કૂટર અમદાવાદના એક યુવકે પોતાના ડોક્યુમેન્ટ આપી સેલ્ફ ડ્રાઇવિંગ માટે સ્ટેશન વિસ્તારમાંથી ભાડે લીધું હતું. પોલીસે તે ડોક્યુમેન્ટના આધારે તપાસ કરી આરોપી તુષાર ઉર્ફે કાવો લક્ષ્મણભાઇ પરમાર (રહે. મકરબા પોલીસ લાઇન, સરખેજ રોડ, અમદાવાદ,મૂળ રહે. દાહોદ) ને ઝડપી પાડયો હતો. પોલીસે તેની પાસેથી ૧.૧૮ લાખની ચેન તથા મોબાઇલ ફોન મળીને કુલ ૧.૨૩ લાખનો મુદ્દામાલ કબજે કર્યો છે. પોલીસની પ્રાથમિક પૂછપરછમાં એવી વિગતો પ્રકાશમાં આવી છે કે, તુષારના પિતા અમદાવાદ ગ્રામ્ય પોલીસમાં એ.એસ.આઇ. છે. તુષાર કાર ડ્રાઇવિંગ કરે છે. વ્યાજના ચક્કરમાં ફસાયેલા તુષારે આ પગલું ભર્યું હતું. અગાઉ તે કાર લઇને વડોદરા આવ્યો હતો. તે દરમિયાન આ વિસ્તાર અવાવરૃ હોવાનું જણાતા અછોડો તોડવાનું નક્કી કર્યું હતું.
