આ પણ વાંચો ટ્રેન્ડિંગ સમાચાર
Vadodara News: વડોદરા શહેરમાં ગઈકાલે રાવપુરા પોલીસ સ્ટેશનની બહાર ભાજપનો ખેસ લગાવેલી એક ફોર્ચ્યુનર કાર જપ્ત થતાં જ જબરો રાજકીય અને સામાજિક ગરમાવો આવી ગયો છે. પાદરાના એક કથિત ભાજપ કાર્યકર દ્વારા બેંક લોનના હપ્તા ન ચૂકવાતા આખરે બેંક એજન્સીએ કાયદેસરની કાર્યવાહી કરીને કાર સીઝ કરી છે, જેને પગલે મામલો પોલીસ મથકે પહોંચ્યો હતો.
શું છે સમગ્ર મામલો?
મળતી માહિતી મુજબ, પાદરા ખાતે રહેતા અને પોતાને ભાજપના કાર્યકર ગણાવતા જગદીશ શાંતિલાલ પટેલે ફોર્ચ્યુનર કાર ખરીદવા માટે બેંકમાંથી ₹ 29.75 લાખની લોન લીધી હતી. બેંકના સત્તાવાર કર્મચારીઓના જણાવ્યા અનુસાર, લાંબા સમયથી લોનની ચુકવણી ન થવાના કારણે વ્યાજ સહિત આ આંકડો આશરે ₹34.12 લાખથી વધુ પર પહોંચી ગયો છે. બેંકના વારંવારના પ્રયાસો છતાં નાણાં પરત ન મળતા આખરે એજન્સી મારફતે આ મોંઘીદાટ કારને જપ્ત કરવામાં આવી છે.
અગાઉ પણ કાર સીઝ થઈ હતી, પણ…
બેંકના અધિકારીઓએ ખુલાસો કર્યો છે કે આ અગાઉ પણ પાદરા વિસ્તારમાં જગદીશ પટેલની આ કારને સીઝ કરવામાં આવી હતી, પરંતુ તે સમયે તેઓ ગમે તેમ કરીને કાર છોડાવી ગયા હતા. બેંકે એવો પણ દાવો કર્યો છે કે જગદીશ પટેલને અગાઉ બ્રાન્ચ ખાતે રૂબરૂ બોલાવીને બાકી રકમ ભરી જવા સમજાવવામાં આવ્યા હતા. તેમ છતાં, તેમના તરફથી કોઈ યોગ્ય સહકાર ન મળતાં આખરે બેંકના નીતિ-નિયમો મુજબ કાર સીઝ કરવાની ફરજ પડી હતી. એટલું જ નહીં, જગદીશ પટેલ પર અન્ય બેંકોની લોન પણ ચાલુ હોવાની વિગતો સામે આવી છે.
આ પણ વાંચો: દિયોદરમાં લોકશાહીનું ચીરહરણ? તા. પંચાયતની ચૂંટણી બીજી વખત રદ, અધિકારીના નાટકનો આક્ષેપ
કાર પર ભાજપનો ખેસ ચર્ચાનો વિષય બન્યો
ગઈકાલે જ્યારે બેંક એજન્સીએ કાર જપ્ત કરી ત્યારે મામલો રાવપુરા પોલીસ સ્ટેશને પહોંચ્યો હતો. પોલીસ સ્ટેશનની બહાર ઉભેલી આ વૈભવી ફોર્ચ્યુનર કારના ડેસ્ક પર ભાજપનો ખેસ મૂકેલો હતો, જે ત્યાં હાજર તમામ લોકોમાં ભારે કુતૂહલ અને ચર્ચાનો વિષય બન્યો હતો. જગદીશ પટેલે પોતે ભાજપના સક્રિય કાર્યકર હોવાનો દાવો કર્યો છે, ત્યારે સત્તાધારી પક્ષના કાર્યકરની જ કાર લોન ડિફોલ્ટ થવાને કારણે પોલીસ સ્ટેશને પહોંચતા પંથકમાં આ કિસ્સો ભારે ટોક ઓફ ધ ટાઉન બન્યો છે.
