આ પણ વાંચો ટ્રેન્ડિંગ સમાચાર
જામનગર જિલ્લા પોલીસ અધિક્ષક ડો. રવિ મોહન સૈનીના માર્ગદર્શન હેઠળ જિલ્લામાં ચાલી રહેલા “નો ડ્રગ્સ ઇન જામનગર” અભિયાન અંતર્ગત જામનગર એસ.ઓ.જી.ને વધુ એક સફળતા મળી છે. યુવાધનને નશાના કારોબારથી બચાવવા અને જિલ્લામાં નશીલા પદાર્થોના વેચાણ પર રોક લગાવવા માટે પોલીસ દ્વારા સઘન ઝુંબેશ ચલાવવામાં આવી રહી છે.
એસ.ઓ.જી.ના પોલીસ ઇન્સ્પેક્ટર વી.બી. ચૌધરી અને પોલીસ સબ ઇન્સ્પેક્ટર એ.વી. ખેરના માર્ગદર્શન હેઠળ સ્ટાફ ગ્રામ્ય વિસ્તારમાં પેટ્રોલિંગમાં હતો. તે દરમિયાન પોલીસ કોન્સ્ટેબલ વિરેન્દ્રસિંહ જાડેજા, બળભદ્રસિંહ જાડેજા અને મયુરરાજસિંહ જાડેજાને બાતમી મળી હતી કે પીપળી ગામથી કેલાગેઈટ-8 તરફ જતાં માર્ગ પર આવેલી રાજ બિહારી હોટલમાં પિન્ટુકુમાર શિવકુમાર શાહુ દ્વારા નશાકારક ચોકલેટનું વેચાણ કરવામાં આવે છે.
બાતમીના આધારે એસ.ઓ.જી.ની ટીમે રાજ બિહારી હોટલ ખાતે દરોડો પાડી તપાસ હાથ ધરી હતી. તપાસ દરમિયાન હોટલમાંથી અલગ-અલગ પ્રકારની નશાકારક ચોકલેટનો જથ્થો મળી આવ્યો હતો. પોલીસે સમગ્ર મુદ્દામાલ કબજે કરી લાલપુર પોલીસ મથકે જાણવાજોગ ફરિયાદ નોંધાવી વધુ તપાસ શરૂ કરી છે.
કબજે કરાયેલ મુદ્દામાલ
“તરંગ મદન મોદક વટી, આયુર્વેદિક ઔષધિ” નામની નશાકારક ચોકલેટ – 2,400 નંગ (કિંમત રૂ. 2,400) “સેવન મીનાર વટી, આયુર્વેદિક ઔષધિ” નામની નશાકારક ચોકલેટ – 1,840 નંગ (કિંમત રૂ. 1,840) પોલીસે કુલ 4,240 નશાકારક ચોકલેટ કબજે કરી મામલે વધુ તપાસ હાથ ધરી છે.
