આ પણ વાંચો ટ્રેન્ડિંગ સમાચાર
અમદાવાદ શહેરના વટવા અને લાંભા વિસ્તારમાં થયેલા 2 જુદા-જુદા અકસ્માતોમાં એક મહિલા સહિત 2 વ્યક્તિઓના મોત નીપજ્યા છે, જ્યારે 4 લોકો ઇજાગ્રસ્ત થયા છે. વટવા-ગામડી ચાર રસ્તા પાસે એક ડમ્પર ચાલકે બાઇકને ટક્કર મારતાં, ડમ્પરના ટાયર નીચે કચડાઈ જવાથી પુત્રની નજર સામે જ માતાનું કમકમાટીભર્યું મોત થયું હતું. આ અકસ્માતમાં પુત્ર અને 3 વર્ષની બાળકીને ઇજાઓ પહોંચી હતી. જ્યારે બીજા બનાવમાં, લાંભા પાસે રોડની સાઇડમાં ઉભેલી બોલેરો પીકઅપ વાનની પાછળ મોપેડ ઘૂસી જતાં એક યુવકનું મોત થયું હતું અને તેના 2 મિત્રો ઇજાગ્રસ્ત થયા હતા. ટ્રાફિક પોલીસે આ બંને બનાવો અંગે ગુનો નોંધીને સીસીટીવી ફૂટેજ ગણીને વધુ તપાસ હાથ ધરી છે.
વટવામાં ડમ્પરની ટક્કરથી માતાનું કરુણ મોત
દસ્ક્રોઇના ગામડી ગામમાં રહેતા યુવકે ટ્રાફિક ‘J’ ડિવિઝન પોલીસ સ્ટેશનમાં ડમ્પર ચાલક સામે ફરિયાદ નોંધાવી છે. ફરિયાદ અનુસાર, તા. 21ના રોજ બપોરે તેમની 3 વર્ષની ભાણીને હોસ્પિટલ લઈ જવાની હોવાથી, યુવક તેના પિતરાઈ ભાઈનું બાઇક લઈને માતા અને ભાણી સાથે વટવા જઈ રહ્યો હતો. તેઓ જ્યારે વટવા-ગામડી ચાર રસ્તા પાસેથી પસાર થઈ રહ્યા હતા, ત્યારે પૂરઝડપે આવી રહેલા એક આઇવા ડમ્પર ચાલકે બાઇકને જોરદાર ટક્કર મારી હતી. ટક્કર વાગતા જ ત્રણેય રોડ પર પટકાયા હતા. જેમાં ફરિયાદીની માતા ડમ્પરના વ્હીલ નીચે આવી જતાં તેમનું ઘટનાસ્થળે જ કમકમાટીભર્યું મોત નીપજ્યું હતું, જ્યારે યુવક અને તેની બાળકીને સામાન્ય ઇજાઓ થઈ હતી.
લાંભામાં ઉભેલી પીકઅપ પાછળ મોપેડ ઘૂસ્યું
બીજા બનાવમાં, શાહવાડી વિસ્તારમાં રહેતો એક યુવક રવિવારે રાત્રે તેના 2 મિત્રો સાથે મોપેડ પર ‘ત્રિપલ સવારી’ બેસીને લાંભા તરફના સર્વિસ રોડ પરથી પસાર થઈ રહ્યો હતો. આ દરમિયાન રસ્તા પર પાર્ક કરેલી એક બોલેરો પીકઅપ ગાડીની પાછળ મોપેડ ધડાકાભેર ઘૂસી ગયું હતું. આ ગંભીર અકસ્માતમાં મોપેડ ચાલક યુવકને ગંભીર ઇજાઓ થતાં તેનું ઘટનાસ્થળે જ મોત નીપજ્યું હતું. જ્યારે મોપેડ પર પાછળ બેઠેલા અન્ય બંને મિત્રોને ગંભીર ઇજાઓ થતાં 108 એમ્બ્યુલન્સ મારફતે તાત્કાલિક હોસ્પિટલ ખસેડવામાં આવ્યા હતા. આ મામલે ટ્રાફિક ‘K’ ડિવિઝન પોલીસે ગુનો નોંધીને આગળની કાર્યવાહી શરૂ કરી છે.
