આ પણ વાંચો ટ્રેન્ડિંગ સમાચાર
16 હેકટર જેટલી જમીન પર દબાણ થઈ ગયું હતું : અગાઉ એકવાર દબાણ દૂર કર્યા બાદ ફરી થઈ ગયું હતું : સરપંચની અરજીના આધારે તપાસ બાદ TDOએ ફરિયાદ નોંધાવી
જૂનાગઢ : જૂનાગઢ તાલુકાના પત્રાપસરમાં આવેલા ગૌચરની જમીનમાં ગેરકાયદે દબાણ થઈ ગયું હતું. આ મામલે સરપંચની અરજીના આધારે તપાસ કરવામા આવી હતી. જેમાં મહિલાઓ સહિત ૧૫એ ૧૬ એકર જેટલી ગૌચરની જમીન પર દબાણ કર્યાનું સામે આવતા ગઈકાલે ટીડીઓએ તાલુકા પોલીસ સ્ટેશનમાં લેન્ડગ્રેબિંગની ફરિયાદ કરતા જૂનાગઢ ડીવાયએસપીએ વધુ તપાસ હાથ ધરી છે.ચ
જૂનાગઢ તાલુકાના ૫ત્રાપસરમાં ગ્રામ પંચાયત હસ્તકની ગૌચરની જમીન પર ગામના જ અમુક શખ્સોએ ગેરકાયદેસર રીતે કબ્જો કરી લીધો હતો. ગયા વર્ષે આ અંગેની ફરિયાદ થતા તંત્ર દ્વારા ગૌચર પરનું દબાણ દુર કરવામાં આવ્યું હતું. આ કાર્યવાહી બાદ થોડા સમયમાં ફરી વખત ગૌચરમાં દબાણ થઈ ગયું હતું. ગત એપ્રિલ માસથી ફરીથી થયેલા દબાણ અંગે સરપંચે અરજી કરી હતી જેના અનુસંધાને તંત્ર દ્વારા તપાસ કરવામાં આવી હતી. જેમાં ગ્રામપંચાયત હસ્તકના ગૌચરની જમીનના સર્વે નં.૭૧ના ખાતા નં.૭૭૧ની ૧૬ હેક્ટરથી વધુ જમીન પર દબાણ કરી વાવેતર કરવામાં આવ્યું હોવાનું સામે આવ્યું હતું.
આ અંગે જિલ્લા કલેક્ટરની અધ્યક્ષતામાં બનેલી કમિટીએ લેન્ડગ્રેબ્રિંગ હેઠળ ફરિયાદ કરવા હુકમ કરતા જૂનાગઢ તાલુકા વિકાસ અધિકારી ડો. રાજેન્દ્રસિંગ વેલસિંગ ઠાકોરે ગેરકાયદેસર દબાણ મામલે પત્રપસરના સવિતાબેન છગનભાઈ મકવાણા, લાલજી સુરા ગંડેસર, મનસુખ સુરા ગંડેસર, રમાબેન ખોડા સાગઠીયા, દિનેશ દેસા મકવાણા, જયસુખ કાળા દવેરા, માધા પાલા ગંડેસર, હરી કરશન ગંડેસર, અરવિંદ મોહન મકવાણા, જેરામ વિરજી દવેરા, સવિતા જીવન મકવાણા, કાંતિ વિરજી દવેરા, હરેશ શાંતિ મકવાણા, મયુર વજુ મકવાણા અને વલ્લભ જેરામ દવેરા સામે ફરિયાદ કરતા તાલુકા પોલીસ સ્ટેશનમાં લેન્ડગ્રેબિંગ હેઠળ ગુનો દાખલ કરવામાં આવ્યો છે. આ અંગે જૂનાગઢ ગ્રામ્યના ઈન્ચાર્જ ડીવાયએસપી હિતેષ ધાંધલ્યાએ તપાસ હાથ ધરી છે.ગત વર્ષે દબાણ દુર કર્યા બાદ ફરી દબાણ થઈ ગયું હતું. આ વખતે દબાણ કરનારાઓ સામે લેન્ડગ્રેબિંગ હેઠળ ગુનો દાખલ કરવામાં આવતા ગૌચરની જમીન પર કબ્જો કરનારાઓમાં ફફડાટ ફેલાયો છે.
