આ પણ વાંચો ટ્રેન્ડિંગ સમાચાર
અમદાવાદ, શુક્રવાર
જુહાપુરામાં રહેતી મહિલાએ પતિ સાથે છૂટાછેડા લેવા માટે પોલીસમાં અરજી કરી હતી. જેથી જમાલપુરમાં રહેતા કાકાએ વચ્ચે રહીને સમાધાન કરાવ્યું હતું, ત્યારબાદ છૂટાછેડા નહી લેવાનું કહીને મહિલાના કાકા અને જીજાજીએ ઘરમાં ગોંધી રાખી પટ્ટાથી માર મારીને ટ્રીમરથી માથાના વાળ કાપી કાઢ્યા હતા. આ અંગે ગાયકવાડ હવેલી પોલીસે ગુનો નોંધી વધુ તપાસ હાથ ધરી છે.
જમાલપુરમાં રહેતા કાકા અને જીજાજી સામે ગાયકવાડ હવેલી પોલીસે ગુનો નોંધી વધુ તપાસ હાથ ધરી
જુહાપુરામાં રહેતી મહિલાએ ગાયકવાડ હવેલી પોલીસ સ્ટેશનમાં જમાલપુર અને બહેરામપુરામાં રહેતા બે લોકો ફરિયાદ નોંધાવી છે કે મહિલાના લગ્ન વર્ષ ૨૦૧૮માં પાંચકુવા ખાતે રહેતા યુવક સાથે થયા હતા. જોકે પતિ સાથે અણબનાવથી મહિલા જુહાપુરા ખાતે પિયરમાં રહેવા આવી ગઈ હતી અને પતિ સામે છૂટાછેડા લેવા માટે પોલીસ સ્ટેશનમાં અરજી પણ કરી હતી.
જો કે મહિલાના કાકા અને જીજાજી છૂટાછેડા નહીં લેવા માટે સતત દબાણ કરી રહ્યા હતા. તા. ૨૨-૦૨-૨૬ના રોજ છૂટાછેડા માટે યુવતી પોલીસ ચોકી ગઈ હતી ત્યારે કાકાએ સમાધાન કરાવ્યા બાદ કાકા અને જીજાજીએ ઘરે બોલાવી હતી અને તારે કોઈપણ હિસાબે તારા પતિ સાથે રહેવું પડશે તને છૂટાછેડા લેવા નહીં દઈએ તેમ કહીને માર મારીને ગોંધી રાખીને ટ્રીમરથી મહિલાના વાળ કાપી નાખ્યા હતા.
