AMC Budget: અમદાવાદ મ્યુનિસિપલ કોર્પોરેશનના બજેટનો આંકડો 18,500 કરોડને પાર કરી ગયો છે. આ સ્થિતિ વચ્ચે મ્યુનિસિપલમાં હિસાબમાં ચાલતી લાલીયાવાડી સામે આવી છે. છેલ્લા 5 વર્ષમાં વિવિધ શાખાની હિસાબોને લગતી 483 ફાઈલ ગાયબ હોવાનો ખુલાસો થયો છે. ઓડિટ શાખામાં આ ફાઈલોનો રેકોર્ડ રજૂ નહીં કરાતા ભ્રષ્ટાચારની આશંકા પણ વ્યક્ત કરવામાં આવી રહી છે.
ડ્રેનેજ, બ્રિજ, પાણી સહિતના ઈજનેર વિભાગ, બગીચા, એસ્ટેટ, સોલિડ વેસ્ટ, ટેક્સ વગેરે ખાતાની ફાઈલો ગુમ
અમદાવાદ મ્યુનિસિપલના હિસાબ-કિતાબની શંકાસ્પદ બાબતો અંગે આક્ષેપ કરતા શહેર કોંગ્રેસના લઘુમતી સેલના કાર્યકારી પ્રમુખે જણાવ્યું છે કે, વર્ષ 2020થી 2024 દરમિયાન જુદી જુદી શાખાઓની 483 ફાઈલો ઓડિટ શાખામાં રજૂ કરવામાં આવી નથી. આરટીઆઈ હેઠળ માગવામાં આવેલી માહિતીમાં આવી ફાઈલોનો નહીં મળેલા રેકોર્ડ તરીકે જાહેર કરાઈ છે. જેમાં ડ્રેનેજ, બ્રિજ, પાણી સહિતના ઈજનેર વિભાગ ઉપરાંત બગીચા, એસ્ટેટ, સોલિડ વેસ્ટ, ટેક્સ, વહીવટી સહિતના વિભાગોનો સમાવેશ થાય છે.
આ પણ વાંચો: અમદાવાદના ભદ્ર પરિસરમાં પાથરણાવાળાનો વિવાદ, AMCની દલીલો સામે ગુજરાત હાઇકોર્ટ લાલઘૂમ
આ ફાઈલો ઓડિટ વિભાગને સમયસર શા માટે સોંપવામાં આવી નથી? તે બાબત તપાસનો વિષય છે. પ્રજાના પૈસે ચાલતી કામગીરીમાં પારદર્શી વહીવટની શાસકોની વાતો સામે વાસ્તવિકતા કંઈક અલગ જ છે. આ મામલે મ્યુનિસિપલ કમિશનર અને મેયર દ્વારા જવાબદાર અધિકારીઓ સામે પગલાં લેવાય તેવી માંગ પણ તેમણે કરી છે.
