આ પણ વાંચો ટ્રેન્ડિંગ સમાચાર
– ફાયર બ્રિગેડ સ્ટાફે 6 કલાકે આગ પર કાબુ મેળવ્યો
– ટાયર મશીનરી અને ફરસાણ બનાવવાનો લોટ મસાલા મશીનરી સંપૂર્ણ પણે ખાક
ભાવનગર : આજે વહેલી સવારના સમયે ચિત્રા જીઆઇડીસી વિસ્તારમાં આવેલ લક્ષ્મી ફરસાણ નામના ગોડાઉન અને ઓરેન્જ ટ્રેડર્સ નામની ટાયરની કમાણીમાં ભયાનક આગ ભભૂકી ઊઠી હતી. આ ઘટનાની જાણ થતાની સાથેજ ફાયર ફાઇટરોની ટીન સ્થળ પર પહોંચી હતી અને ભારે જહેમત બાદ આગ પર કાબુ મેળવ્યો હતો.
ભાવનગર શહેરમાં છેલ્લા ૨૪ કલાક દરમિયાન આગ લાગવાના ત્રણ બનાવો બનવા પામ્યા છે. જેમાં શહેરના લાતી બજાર અને શિવાજી સર્કલ પાસે આવેલો સીતારામ જનરલ હોસ્પિટલના બેઝમેન્ટમાં આવેલ મેડિકલ સ્ટોરમાં આગ લાગી હતી. તેવામાં ભાવનગર શહેરના ચિત્રા જીઆઇડીસી વિસ્તારમાં આવેલ આનંદભાઈ પરીખની માલિકીની ઓરેન્જ ટ્રેડર્સ નામની ટાયરની કંપની અને સુરેશભાઈ સેવાણીની માલિકીના લક્ષ્મી ગૃહ ઉદ્યોગના ગોડાઉનમાં આજે વહેલી સવારના ૫.૫૯ કલાકે આગ ભભૂકી ઊઠે હતી. જોત જોતામાં આગે વિકરાળ સ્વરૂપ ધારણ કરી લીધું હતું. આગ લાગ્યાની જાણ સુરેશભાઈ નામના વ્યક્તિએ ફાયર બ્રિગેડને કરતા ફાયર બ્રિગેડ નો સ્ટાફ સ્થળ પર પહોંચ્યો હતો ત્યારે બંને ગોડાઉન આગની લપેટમાં આવી ગયા હતા કુલ ૧૯ જેટલા ફાયર ફાઈટરની મદદ વડે છએક કલાકની જહેમત બાદ ફાયર બ્રિગેડ સ્ટાફે આગ પર કાબુ મેળવ્યો હતો. આગમાં લક્ષ્મી ફરસાણ ગૃહ ઉદ્યોગમાં રાખવાના આવેલ મસાલા લોટ અને મશીનરી ખાક થઈ હતી અને ઓરેન્જ ટ્રેડર્સમાં ટાયરો અને મશીનરી ખાક થઈ જવા પામી હતી. આગ લગવાનું કારણ અને નુકશાનીનો આંક જાણવા મળ્યો નથી.
ફાયર બ્રિગેડ સ્ટાફે 4 લાખ લીટર પાણીનો છંટકાવ કરી આગને કાબુમા લીધી
ચિત્રા જીઆઇડીસીમાં લાગેલી આગને બુઝાવવા માટે ૧૯ ફાયર ફાઇટર, અધિકારી સહિત ૫૦ કર્મચારીઓ અને ૧૪ જેટલા પાણીના ટેન્કર, પૂર્વ ઝોનલ, પશ્ચિમ ઝોનલ અને હેડ ક્વાટરની ટીમે ૪ લાખ લીટર પાણીનો છંટકાવ કરી ભારે જહેમત બાદ આગને કાબુમા લીધી હતી.
