આ પણ વાંચો ટ્રેન્ડિંગ સમાચાર
અમદાવાદ,શનિવાર
આંધ્રપ્રદેશના ગુંટુરમાં રહેતા વ્યક્તિ વિરૂદ્ધ તેની પત્નીએ ભદ્રમાં આવેલી ફેમીલી કોર્ટમાં કેસ દાખલ કર્યો હતો. જે અનુસંધાનમાં ડાયવોર્સ અંગે પતિ પત્ની વચ્ચે થયેલી ચર્ચામાં મામલો બીચકતા યુવકની પત્નીના વકીલે તેની સાથે રહેલા જુનિયર વકીલો સાથે મળીને યુવકને કોર્ટમાં માર માર્યાની ફરિયાદ કાંરજ પોલીસ મથકે નોંધવામાં આવી છે.
આંધ્રપ્રદેશના ગુંટુર શહેરમાં રહેતા દેવેન્દ્ર બાગરેચાના લગ્ન જુન ૨૦૧૦માં પ્રેમલતા નામની યુવતી સાથે થયા હતા. તેમને લગ્ન જીવનમાં બે સંતાનોનો જન્મ થયો હતો. વર્ષ ૨૦૨૩માં પ્રેમલતાએ દેવેન્દ્રભાઇ અને તેમના પરિવાર વિરૂદ્ધ ડોમેસ્ટીક વાયોલન્સ, ભરણપોષણ અને શારિરીક માનસિક ત્રાસની ફરિયાદ ધી કાંટા કોર્ટ ખાતે કરી હતી.
ભરણ પોષણનો કેસ ફેમીલી કોર્ટમાં ચાલુ હોવાથી સતત મુદ્દતના કારણે દેવેન્દ્રભાઇ કંટાળી ગયા હતા અને તમણે સમાધાનથી કેસની પતાવત કરવા માટે કોર્ટમાં પરવાનગી માંગી હતી. જે મળતા ગત ૨૦ જાન્યુઆરીના રોજ કોર્ટના સાતમાં માળે દેવેન્દ્રભાઇ અને પ્રેમલતા બેઠા હતા અને સમાધાનના રસ્તા અંગે ચર્ચા કરતા હતા. ત્યારે પ્રેમલત્તાએ ડાયવોર્સ આપવાના બદલામાં ૫૦ લાખની માંગણી કરી હતી. આ રકમ દેવેન્દ્રભાઇ પાસે ન હોવાને કારણે તેમણે આપવાની ના કહી હતી. આ સમયે પ્રેમલત્તાએ ઉંચા અવાજે વાત કરતા દેવેન્દ્રભાઇ છઠ્ઠા માળે આવીને કોર્ટરૂમની બહાર તેમનો વારો આવવાની રાહ જોતા હતા. ત્યારે વકીલ આર સી બારોટ આવ્યા હતા અને તેમણે એકાએક દેવેન્દ્રભાઇને મારવાનું શરૂ કર્યું હતું.
આ સમયે જુનિયર વકીલોએ પણ દેવેન્દ્રભાઇને છાતીમાં અને માથામાં માર માર્યો હતો. જેના કારણે ચશ્મા તુટી જવાની સાથે આંખમાં દેખાતુ બંધ થતા તેમને નગરી હોસ્પિટલ લઇ જવાયા હતા. જ્યાં સારવાર બાદ વીએસ હોસ્પિટલમાં પણ સારવાર કરવામાં આવી હતી. આ સમયે પોલીસ સ્ટેશનમાં અરજી કરવામાં આવી હતી. ત્યારબાદ તેમની તબિયતમાં સુધારો થતા અમદાવાદ આવીને વકીલ વિરૂદ્ધ તેમણે ફરિયાદ નોંધાવતા કારંજ પોલીસે તપા શરૂ કરી છે.
