આ પણ વાંચો ટ્રેન્ડિંગ સમાચાર
Chhota Udaipur News : પાવી જેતપુર: ગુજરાતમાં દારૂબંધીના અમલ વચ્ચે બુટલેગરો અવનવા નુસખા અપનાવતા હોય છે, પરંતુ પાવી જેતપુરના કાવરા ગામે ગ્રામજનોની સતર્કતાએ બુટલેગરોના મનસૂબા પર પાણી ફેરવી દીધું છે. સામાન્ય રીતે જે સ્થળેથી ગામ આખું પાણી પીતું હોય, તે જ પાણી પુરવઠાની ઓરડીને દારૂનો અડ્ડો બનાવી દેવાનું કારસ્તાન જાગૃત નાગરિકોએ ઝડપી પાડ્યું છે.
ખાલી બોટલોએ ખોલી પોલ
કાવરા ગામના પાદરે આવેલી પાણીની ટાંકી પાસે છેલ્લા કેટલાક સમયથી ગામ લોકોને દારૂની ખાલી બોટલો નજરે પડતી હતી. જે સ્થળે સ્વચ્છતા હોવી જોઈએ ત્યાં દારૂની બોટલો જોઈને જાગૃત નાગરિકોને શંકા ગઈ. ગ્રામજનોએ આ બાબતે ગુપ્ત રીતે નજર રાખવાનું શરૂ કર્યું અને શંકાની સોય સીધી પાણી પુરવઠાની પાણીની ઓરડી તરફ ગઈ.
ગામલોકોની જનતા રેડ
શનિવારે જ્યારે ગ્રામજનો એકઠા થયા અને પાણીની ઓરડીની તપાસ કરી, ત્યારે તેઓ પણ ચોંકી ગયા હતા. જે ઓરડીમાંથી ગામના નળમાં પાણી છોડવામાં આવે છે, તે ઓરડીમાં વિદેશી દારૂનો જથ્થો છુપાવેલો હતો. ગ્રામજનોએ તાત્કાલિક આ અંગે પોલીસને જાણ કરી હતી.
આ પણ વાંચો : ભારત- અમેરિકાના ટ્રેડ- ડીલ સાથે ટ્રમ્પે કાશ્મીર અંગે પાકિસ્તાનને કડક સંદેશો આપી દીધો
પોલીસ કાર્યવાહી અને મુદ્દામાલ
ઘટનાની જાણ થતા જ કરલી પોલીસ કાફલો કાવરા ગામે દોડી આવ્યો હતો. પોલીસે સ્થળ પર પંચનામું કરી તપાસ હાથ ધરતા કુલ રૂ. 12,145 ની કિંમતનો વિદેશી દારૂ મળી આવ્યો હતો. પોલીસે તમામ જથ્થો જપ્ત કરી લીધો છે.
કોણ છે આ ‘અજાણ્યો’ બુટલેગર?
સૌથી મોટો સવાલ એ ઉભો થાય છે કે, સરકારી પાણીની ઓરડીની ચાવી કોની પાસે રહેતી હતી? અને કોના મેળાપીપણામાં આ દારૂનો જથ્થો ત્યાં ઉતારવામાં આવ્યો હતો? હાલમાં કરલી પોલીસે અજાણ્યા ઈસમ વિરુદ્ધ ગુનો નોંધીને તપાસના ચક્રો ગતિમાન કર્યા છે. ગામલોકોની આ જાગૃતિએ સાબિત કરી દીધું છે કે જો જનતા જાગૃત હોય તો અસામાજિક તત્વોને છુપાવવા માટે સરકારી મિલકતો પણ સુરક્ષિત નથી.
