આ પણ વાંચો ટ્રેન્ડિંગ સમાચાર
જૂનાગઢના યુવાનની કાર લઈ 2.50 લાખ માંગ્યા હતા રાજકોટ રહેતા સાગરિત સાથે મળી સોશ્યલ મીડિયા પરથી માહિતી મેળવી કાર ભાડે કરતા હોવાની કબૂલાત
જૂનાગઢ, : જૂનાગઢમાં રહેતા અને અભ્યાસ કરતા યુવાને એક શખ્સને કાર ભાડે આપી હતી. બાદમાં બગડુના શખ્સે કાર રાજકોટ લઈ જઈ ગુમ કરી દીધી હતી અને કાર પરત જોઈતી હોય તો 2.50 લાખ રૂપીયા માંગ્યા હતા નહીતર કાર પરત નહી કરે એવી ધમકી આપી હતી. પોલીસે આ મામલે શાપર વેરાવળના શખ્સને કાર સાથે પકડી લઈ પૂછપરછ કરતા આ શખ્સે રાજકોટના સાગરીત સાથે મળી આ કૌભાંડ કર્યાની કબુલાત આપી હતી.
મુળ સિહોર તાલુકાના મોટા સુરકા ગામના અને હાલ જૂનાગઢની જલારામ સોસાયટીમાં રહેતા અને અભ્યાસ કરતા હરપાલસિંહ નવલસંગ ચૌહાણે તેના પિતાના નામની 27-1-2026ના ભાવનગર ખાતેથી કાર લીધી હતી. જે ભાડે આપવા ઈન્સ્ટાગ્રામ પર પેઈજ બનાવ્યું હતું. તેમાં તેના મિત્ર કુંજના નંબર આપ્યા હતા. ગત તા.૧ના બગડુના યશ જશાભાઈ લાબરીયાએ તેના કાકાને કેન્સરની સારવાર માટે રાજકોટ લઈ જવા કાર ભાડે લઈ જવાનું કહ્યું હતું આથી રપ૦૦ રૂપીયા ભાડામાં કાર આપી હતી. તા.૧ના સાંજે કારની કનેક્ટ એપમાં કાર ટોઈંગ થયાનો મેસેજ આવ્યો હતો. યશ લાબરીયાને ફોન કરતા તેણે પોતાનો ભાઈ કાર લઈ જમવા લેવા ગયો હોવાનું કહ્યું હતું. ત્યારબાદ યશનો ફોન બંધ થઈ ગયો હતો. તા.રના હરપાલસિંહ તથા તેના મિત્રો રાજકોટ કારની તપાસ કરવા ગયા હતા પરંતુ ક્યાંય કાર મળી ન હતી. હરપાલના મિત્ર પિયુષભાઈએ યશને ફોન કરી વાત કરતા યશ લાબરીયાએ કાર જોઈતી હોય તો મારા શેઠ સાથે વાત કરો તેમ કહી યશે કોઈ વ્યક્તિને કોન્ફરન્સમાં લીધો હતો. તેણે કાર પરત જોઈતી હોય તો ર.પ૦ લાખ રૂપીયા આપવા પડશે નહીતર કાર નહી મળે તેમ કહ્યું હતું. આ અંગે ફરિયાદ કરતા સી ડીવીઝન પોલીસે તપાસ શરૂ કરી રાજકોટથી શાપર વેરાવળના યશ જશા લાબરીયાને પકડી લઈ પૂછપરછ કરતા તેણે રાજકોટના મનિષ કાળુ સભાડ સાથે મળી આ કાર ભાડે કરી હતી અને તેને પરત જોઈતી હોય તો અઢી લાખ રૂપીયા માંગ્યા હતા. આવી રીતે સાતેક માસ પહેલા ગોંડલના અરમાન મીરના કહેવાથી રાજકોટના કેવલ બારોટની કાર ભાડે કરી હતી બાદમાં પરત કરી ન હતી. આ મામલે યશ અને અરમાન વિરૂધ્ધ રાજકોટ માલવીયાનગર પોલીસ સ્ટેશનમાં ફરિયાદ થઈ હતી. હાલ પોલીસે મનિષ કાળુ સભાડને પકડવા તજવીજ હાથ ધરી છે.
