આ પણ વાંચો ટ્રેન્ડિંગ સમાચાર
VMC Blue Municipal Bonds: વડોદરા મ્યુનિસિપલ કોર્પોરેશન (VMC)એ અગાઉ સફળતાપૂર્વક ‘ગ્રીન બોન્ડ’ બહાર પાડ્યા બાદ, હવે કોર્પોરેશને ‘અમૃત-2.0’ યોજના હેઠળ પાણી પુરવઠાના કામો માટે રૂ. 200 કરોડના ‘બ્લ્યુ મ્યુનિસિપલ બોન્ડ’ બહાર પાડવાની તૈયારી કરી છે. આ માટે જરૂરી એજન્સીઓની નિમણૂક કરવાની દરખાસ્ત પણ રજૂ કરી દેવામાં આવી છે.
શું છે આ બ્લ્યુ બોન્ડ?
સામાન્ય ભાષામાં કહીએ તો, બ્લ્યુ બોન્ડ એ ગ્રીન બોન્ડનો જ એક ભાગ છે. જ્યારે પાણીને લગતા પ્રોજેક્ટ્સ, જેમ કે પીવાના પાણીની વ્યવસ્થા કે જળ સંરક્ષણ માટે બજારમાંથી નાણાં ઉભા કરવામાં આવે, ત્યારે તેને ‘બ્લ્યુ બોન્ડ’ કહેવાય છે. ભારતની કોઈ પણ મહાનગરપાલિકાએ અત્યાર સુધી બ્લ્યુ બોન્ડ દ્વારા નાણાં મેળવ્યા નથી, તેથી આ સિદ્ધિ મેળવનાર વડોદરા એશિયાનું પ્રથમ શહેર બની શકે છે.
શા માટે બોન્ડ બહાર પાડવાની જરૂર પડી?
વડોદરામાં કેન્દ્ર અને રાજ્ય સરકારની અનેક યોજનાઓ જેવી કે અમૃત, સ્માર્ટ સિટી અને આવાસ યોજનાઓ ચાલી રહી છે. આ યોજનાઓમાં કેન્દ્ર અને રાજ્ય સરકાર ગ્રાંટ આપે છે, પરંતુ બાકીની રકમ કોર્પોરેશને પોતાના ફાળા તરીકે આપવાની હોય છે. સરકારની યોજના અંતર્ગત વડોદરા મહાનગરપાલિકાનો સુચિત ફાળો રૂ.1496 કરોડ હતો. પરંતુ ઉપરોક્ત કારણોના લીધે પાલિકાના આપવાપાત્ર ફાળો વધીને રૂ.2150 કરોડ થયો છે. જે પૈકી રૂ.1653 કરોડ ફાળા તરીકે આપી દેવામાં આવ્યા છે અને બાકી રૂ.497 કરોડ જેટલી રકમ આવનાર 3-4 વર્ષમાં ચૂકવી દેવાશે. જેમાંથી રૂ. 200 કરોડ આ બોન્ડ દ્વારા મેળવાશે.
વડોદરા કોર્પોરેશનનો આ ત્રીજો બોન્ડ ઈસ્યુ હશે
અગાઉ માર્ચ-2022માં રૂ. 100 કરોડ અને માર્ચ-2024માં ગ્રીન બોન્ડ દ્વારા રૂ. 100 કરોડ મેળવ્યા હતા. આ બંને બોન્ડને રોકાણકારો તરફથી જબરદસ્ત પ્રતિસાદ મળ્યો હતો. ખાસ કરીને પ્રથમ બોન્ડ વખતે વડોદરાએ સૌથી ઓછું વ્યાજ (7.15%) ચૂકવવાનો રેકોર્ડ બનાવ્યો હતો, જે તેની મજબૂત આર્થિક સ્થિતિ દર્શાવે છે.
કેસ સ્ટડી પણ તૈયાર
જ્યારે કોઈ કોર્પોરેશન બોન્ડ બહાર પાડે છે, ત્યારે તેની પારદર્શિતા વધે છે અને લોકોમાં વિશ્વાસ બેસે છે. આ ઉપરાંત, જે મહાનગરપાલિકાઓ આ રીતે બોન્ડ દ્વારા નાણાં ઉભા કરીને આત્મનિર્ભર બને છે, તેમને કેન્દ્ર સરકાર તરફથી ખાસ આર્થિક પ્રોત્સાહન (Incentive) પણ આપવામાં આવે છે. વડોદરા સફળ મોડેલ પર ‘The Green Book’ જેવી કેસ સ્ટડી પણ તૈયાર કરવામાં આવી છે.
આ પણ વાંચો: Explainer: AIના કારણે માંડ 5 ક્ષેત્રમાં નોકરીઓ સલામત રહેશે, 2027 સુધીમાં 99% રોજગારી ગાયબ થવાનો નિષ્ણાતોનો દાવો
બ્લ્યુ બોન્ડ દ્વારા મળનારા રૂ. 200 કરોડનો ઉપયોગ ખાસ કરીને અમૃત 2.0 યોજના હેઠળના પાણી પુરવઠાના કામોમાં થશે. આનાથી વડોદરાના નાગરિકોને પાણીની સુવિધા વધુ સારી રીતે મળશે અને કોર્પોરેશન પર લોનનું ભારણ ઘટશે.
