આ પણ વાંચો ટ્રેન્ડિંગ સમાચાર
અમિયાદ-દિવેલ રોડ પરના કણભા સીમ વિસ્તારમાંથી
કણભા, વાડોલા, વાળંદાપુરા, કાનાવાડા વિસ્તારમાંથી વાયર ચોરી કર્યાની કબૂલાત, પોલીસે દ્વારા વધુ તપાસ હાથ ધરાઈ
આણંદ: હાઈટેન્શન ઈલેક્ટ્રીક ટ્રાન્સમિશનના વાયરની ચોરી કરતી સારોલની ગેંગના ત્રણ શખ્સોને આણંદ એલસીબી પોલીસે અમિયાદ-દિવેલ રોડ ઉપર આવેલી કણભા સીમ વિસ્તારમાંથી ઝડપી પાડયા હતા. પોલીસે તેઓની પાસેથી ચોરી કરેલા ૬૦ મીટર વાયર અને ચોરી કરવાના સાધનો કબજે લીધા હતા. ઝડપાયેલ શખ્સો વિરુદ્ધ વિરસદ,ખંભાત ગ્રામ્ય અને તારાપુર પોલીસ મથકમાં અલગ અલગ ચાર ફરિયાદો નોંધાઈ હોવાનું ખુલવા પામ્યું હતું
આણંદ જિલ્લાના અલગ અલગ સ્થળોએ તાજેતરમાં હાઈટેન્શન ટ્રાન્સમિશન લાઈનના એલ્યુમિનિયમ વાયરની ચોરીઓ થઈ હોવાના ગુનાઓ બન્યા હતા. જે અંગે આણંદ એલસીબીની અલગ અલગ ટીમો દ્વારા તપાસ હાથ ધરવામાં આવી હતી. દરમિયાન કણભા ગામે સીમ વિસ્તારમાંથી ઈલેક્ટ્રીક વાયરની ચોરી થયેલા ગુનામાં સારોલ ગામના તળપદા ગેંગના માણસો સંડોવાયેલા હોવાનું જાણવા મળ્યું હતું અને તેમાં મુખ્ય સૂત્રધાર ધુળાભાઈ નાનાભાઈ તળપદા અને તેનો દીકરો અર્જુનભાઈ અને તેના કુટુંબના માણસોની સંડોવણી છે. ચોરી કરવા માટે બોલેરો પિકઅપ ડાલાનો ઉપયોગ કરતા હોવાનું જાણવા મળ્યું હતું. સાથે સાથે તેમના મળતીયા માણસોએ અમિયા-દિવેલ રોડ ઉપર કણભા સીમ વિસ્તારમાં ગાડીયા પુરા પ્રાથમિક શાળા નજીક ચોરી કરેલા ઇલેક્ટ્રીક લાઈનના વાયરો સંતાડયા હોવાની અને આ વાયરો લઈ જવા માટે તેઓ સોમવારની રાત્રિના સુમારે ભેગા થવાના હોવાની માહિતી આણંદ એલસીબી પોલીસને મળતા પોલીસની ટીમ એક્શનમાં આવી ગઈ હતી. તળપદા ગેંગના ત્રણ શખ્સો ભેગા થયા છે અને અન્ય માણસોની રાહ જુએ છે તેવી બાતમી પોલીસને મળતા એલસીબી પોલીસની ટીમે બાતમી વાળા સ્થળે તપાસ કરતા ત્રણ શખ્સો શંકાસ્પદ હાલતમાં જોવા મળ્યા હતા અને પોલીસને જોઈ ભાગવાનો પ્રયાસ કરતા પોલીસે તેઓને કોર્ડન કરીને ઝડપી પાડયા હતા.પોલીસે તેઓની અંગ જડતી કરતા તેમની પાસેથી એક લોખંડનું મોટું કટર તથા હેકક્ષો બ્લેડ મળી આવી હતી. જે જગ્યાએ તેઓ હાજર હતા તે અંગે પૂછપરછ કરતા તેઓ ગલ્લા કલાક કરવા લાગ્યા હતા, જેથી પોલીસે જગ્યા ઉપર તપાસ કરતા બે મોટા ગોળ વાળેલા ઈલેક્ટ્રીક વાયરો મળી આવ્યા હતા. જે હાઈટેન્શન ઇલેક્ટ્રીક લાઈનમાં વપરાતા એલ્યુમિનિયમના વાયર હોવાનું જાણવા મળ્યું હતું.
જે અંગે વધુ તપાસ કરતા વીરસદ પોલીસ મથકમાં નોંધાયેલ ચોરીના ગુના અંગે મુદ્દામાલની સરખામણી કરતા મેચ થતા પોલીસે ત્રણ શખ્સો પૈકી વિજય તળપદાને યુક્તિ પ્રયુક્તિથી પૂછતા તે ભાંગી પડયો હતો અને કણભા સીમ વિસ્તારમાંથી તારીખ ૩૦ મી જાન્યુઆરીની રાત્રિના સુમારે આ વાયરોની ચોરી કરી હોવાની કબુલાત કરી હતી. પોલીસે ત્રણેય શખ્સોના નામ ઠામ અંગે પૂછતા શખ્સોએ લાલજીભાઈ ઉર્ફે લાલો રમણભાઈ તળપદા, વિજયભાઈ રાયસીંગભાઈ તળપદા (બંને રહે. સારોલ, બોરસદ) અને અજય રમેશભાઈ તળપદા (રહે. જુના બદલપુર, બોરસદ) હોવાનું જણાવ્યું હતું. પોલીસે તેઓની પાસેથી ૬૦ મીટર વાયર અને કટર અને હેક્શોબ્લેડ મળી કુલ રૂ. ૨૩,૦૦૦નો મુદ્દામાલ કબજે લઈ તેઓની વધુ પૂછપરછ કરતા વીરસદ પોલીસ મથકના કણભા સીમ વિસ્તારમાંથી ૭૦૦મીટર એલ્યુમિનિયમના વાયરો, વાડોલા સીમમાંથી ૪૫૦ મીટર વાયરો, વાળંદાપુરા વિસ્તારમાંથી ૯ કિ.મી જેટલો વાયર અને કાનાવાડાની રસાલપુરા સીમ વિસ્તારમાંથી ૩૦૯૪ મીટર વાયરની ચોરી કરી હોવાની કબૂલાત કરી હતી
