આ પણ વાંચો ટ્રેન્ડિંગ સમાચાર
વડોદરા,એસ.એમ.સી.એ ૪૭.૯૮ લાખના હેરોઇનના કેસમાં પકડેલા વડોદરા એસ.ઓ.જી.ના એ.એસ.આઇ. ને પોલીસ કમિશનર દ્વારા સસ્પેન્ડ કરી પ્રતાપનગર હેડક્વાર્ટરમાં નિયુક્ત કરવામાં આવ્યા છે. તેમજ એસ.ઓ.જી.માં ફરજ બજાવતા અન્ય ચાર પોલીસ જવાનોની પણ બદલી કરવામાં આવી છે.
સ્ટેટ મોનિટરિંગ સેલે ૪૭.૯૮ લાખના હેરોઇનના કેસમાં ડ્રગ્સ હેરાફેરીના નેટવર્કની સૌથી વધુ બાતમી ધરાવતા એ.એસ.આઇ. લક્ષ્મીકાંત દેસાઇની ધરપકડ કરતા શહેર પોલીસને શરમજનક પરિસ્થિતિમાં મૂકાવાનો વારો આવ્યો છે. આવા સંજોગોમાં તેની ધરપકડ થતા પોલીસ તંત્રમાં સન્નાટો છવાઇ ગયો છે. તેની ધરપકડ થતા પોલીસ કમિશનર દ્વારા સસ્પેન્ડ કરાયો છે. ફરજ મોકૂફી દરમિયાન તેનું મુખ્ય મથક, પોલીસ હેડ ક્વાર્ટર, પ્રતાપનગર નિયત કરવામાં આવ્યું છે. સસ્પેન્શનના સમયગાળા દરમિયાન ખાનગી નોકરી સ્વીકારશે તો નિર્વાહ ભથ્થુ સરકારમાં જપ્ત કરવામાં આવશે. આ ધરપકડના પગલે એસ.ઓ.જી.માં નોકરી કરતા ચાર પોલીસ જવાનોની બદલી કરવામાં આવી છે. જેમાં વિક્રમસિંહ જબાભાઇ, નરેન્દ્રસિંહ ગણપતસિંહ, અશોકભાઇ અંબારામ ભાઇ તેમજ શૈલેષ લાલજીભાઇનો સમાવેશ થાય છે. જેની સામે નવા પાંચની નિમણૂંક એસ.ઓ.જી.માં કરવામાં આવી છે. જોકે, છેલ્લા ૨૮ વર્ષથી માત્ર સ્કવોડ અને સયાજીગંજમાં જ નોકરી કરતા એસ.ઓ.જી.ના પોલીસ જવાન કેતનની બદલી કરાઇ નથી.
લક્ષ્મીકાંતની બાતમીવાળા ડ્રગ્સના તમામ કેસની તપાસ જરૃરી
વડોદરા,
એસ.એમ.સી.ની કાર્યવાહીથી પોલીસ બેડામાં ખળભળાટ મચી ગયો છે. નશામુક્ત દેશના સૂત્ર સાથે કામ કરતા પોલીસ તંત્ર માટે આ કિસ્સો અત્યંત શરમજનક છે. સૂત્રોનું કહેવું છે કે, એસ.ઓ.જી.માં ડ્રગ્સના જેટલા કેસ થયા છે. તે પૈકી અડધાથી વધુ કેસમાં લક્ષ્મીકાંતની જ બાતમી હતી. તે તમામ કેસની ઉંડાણપૂર્વક તપાસ થવી જરૃરી છે.
ધરપકડના અડધો કલાક પહેલા પણ સોનુનો કોલ લક્ષ્મીકાંત પર આવ્યો હતો
વડોદરા,
લક્ષ્મીકાંતને કોર્ટમાં રજૂ કરી પોલીસે રિમાન્ડ માગતા એવી રજૂઆત કરી હતી કે, તેઓ વચ્ચે છેલ્લા ૬ મહિનામાં ૧૩૨ વખત વાત થઇ છે. ઉલ્લેખનીય છે કે, લક્ષ્મીકાંતને એસ.એમ.સી. પકડીને લઇ ગઇ હતી. તેની ધરપકડના અડધો કલાક પહેલા પણ ડ્રગ્સ સાથે પકડાયેલા આરોપી સોનુનો કોલ લક્ષ્મીકાંત પર આવ્યો હતો.
