આ પણ વાંચો ટ્રેન્ડિંગ સમાચાર
Jamnagar Accident : જામનગર નજીક દડીયા ગામ પાસે ડબલ સવારી બાઈક અને બોલેરો વેન વચ્ચે ગઈકાલે અકસ્માત સર્જાયો હતો, જે અકસ્માતમાં બાઈક સવાર દડીયા ગામના 17 વર્ષના તરુણનું ગંભીર ઈજા થવાથી કરૂણ મૃત્યુ નિપજ્યું છે, જયારે પાછળ બેઠેલો તેનો મિત્ર ઘાયલ થયો છે. પોલીસે બોલેરો ચાલક સામે ગુનો નોંધ્યો છે.
આ અકસ્માતના બનાવની વિગત એવી છે, કે જામનગર નજીક દડીયા ગામમાં રહેતા અને એક મંદિરની બહાર ફુલ વેચવાનો વ્યવસાય કરતા વાસુદેવભાઈ ડાયાભાઈ ધ્રુવ (ઉંમર વ.39) કે જેનો પુત્ર રણજીત (17 વર્ષ) પોતાના મિત્ર જયદીપ મનસુખભાઈ પાદરેસાને બાઈકમાં પાછળ બેસાડીને નારણપરથી દડિયા ગામ તરફ આવી રહ્યો હતો, જે દરમિયાન પાછળ પુર ઝડપે આવી રહેલા જીજે 37 ટી 6465 નંબરના બોલેરો પીકપ વેનના ચાલકે બાઈકને હડફેટમાં લઈ લેતાં અકસ્માત સર્જાયો હતો.
જે અકસ્માતમાં બાઈક ચાલક રણજીત ધ્રુવને ગંભીર ઇજા થઇ હોવાથી તેનું સારવાર દરમિયાન મૃત્યુ નીપજયું છે, જ્યારે પાછળ બેઠેલા તેના મિત્ર જયદીપને ઈજા થઈ હોવાથી સારવાર અપાઇ છે. આ અકસ્માતના બનાવ અંગે મૃતક રણજીતના પિતા વાસુદેવભાઈ ધ્રુવએ જામનગરના પંચકોશી બી. ડિવિઝન પોલીસ મથકમાં અકસ્માત સર્જનાર બોલેરો વાહનના ચાલક સામે ફરિયાદ નોંધાવતાં પી.આઇ. અને તેઓની ટીમ તપાસ ચલાવે છે.
