આ પણ વાંચો ટ્રેન્ડિંગ સમાચાર
શહેરના માર્ગો પર વાહનચાલકો અને રાહદારીઓની સુરક્ષાને પ્રાથમિક્તા આપતા મ્યુ. કોર્પોરેશનની ટ્રાફિક પ્રોજેક્ટ શાખા દ્વારા શહેરના મુખ્ય ટ્રાફિક જંકશન પર ઝેબ્રા ક્રોસિંગ અને સ્ટોપ માર્કિંગનું અભિયાન શરૂ કરાયું છે.
આ અભિયાન અંતર્ગત કાલાઘોડા સર્કલ, બરોડા ઓટોમોબાઈલ ત્રણ રસ્તા, બીએસએનએલ ત્રણ રસ્તા, શનિ મંદિર ચાર રસ્તા તેમજ ખંડેરાવ માર્કેટ ચાર રસ્તા સહિતના મહત્વના જંક્શનો પર ઝેબ્રા ક્રોસિંગ અને સ્ટોપ માર્કિંગ કરાયા છે.
ઘણી વખત જોવા મળે છે કે, ટ્રાફિક સિગ્નલ પર વાહનચાલકો ઝેબ્રા ક્રોસિંગ સુધી વાહન લઈ આવી જાય છે, જેના કારણે રાહદારીઓને રસ્તો ઓળંગવામાં ભારે હાલાકીનો સામનો કરવો પડે છે. શહેરના મુખ્ય જંકશન પર માર્કિંગ કરવામાં આવી રહ્યા છે. જેથી વાહનચાલકોને વાહન ક્યાં થોભાવવું તેની સ્પષ્ટ માહિતી મળે અને રાહદારીઓ સલામત રીતે રસ્તો પાર કરી શકે.
મ્યુનિ. કોર્પોરેશને સ્પષ્ટ કર્યું છે કે, ટ્રાફિક સિગ્નલ રેડ હોય ત્યારે વાહનચાલકોએ ઝેબ્રા ક્રોસિંગ પહેલાં આવેલી સફેદ સ્ટોપ લાઈન પર જ વાહન થોભાવવું ફરજિયાત છે. જો કોઈ વાહનચાલક ઝેબ્રા ક્રોસિંગ પર વાહન ઊભું રાખશે તો ટ્રાફિક નિયમોના ભંગ બદલ પોલીસ દંડાત્મક કાર્યવાહી કરશે. સાથે નાગરિકોને અપીલ કરી છે કે, રસ્તો ઓળંગવા માટે હંમેશા ઝેબ્રા ક્રોસિંગનો જ ઉપયોગ કરવો.
