આ પણ વાંચો ટ્રેન્ડિંગ સમાચાર
Vadodara Corporation : વડોદરા શહેરમાં મ્યુનિસિપલ કોર્પોરેશન દ્વારા પાણી અને ડ્રેનેજની નવી લાઈનો નાખવા તેમજ જૂની લાઈનોના સમારકામ માટે વિવિધ વિસ્તારોમાં ખોદકામની કામગીરી હાથ ધરવામાં આવી હતી. જોકે, કેટલાક વિસ્તારોમાં કામ હજુ પણ અધૂરું રહેતાં વરસાદી મોસમમાં નાગરિકોને ભારે હાલાકીનો સામનો કરવો પડી રહ્યો છે.
તાજેતરમાં પડેલા વરસાદ બાદ જ્યાં ખોદકામની કામગીરી અધૂરી છે ત્યાં કિચડનું સામ્રાજ્ય છવાઈ ગયું છે. રસ્તાઓ પર પાણી ભરાવા અને કાદવના કારણે સ્થાનિક રહીશો માટે અવરજવર મુશ્કેલ બની ગઈ છે.
શહેરના જેતલપુર ગામ, ખોડીયારનગર વિસ્તાર, સોમા તળાવ પાસે આવેલી વૈષ્ણવ પાર્ક સોસાયટી સહિતના વિસ્તારોમાં આ સમસ્યા જોવા મળી છે. અનેક સ્થળોએ ખોદેલા ખાડાઓ હજુ સુધી પૂરવામાં આવ્યા નથી તેમજ રસ્તાઓને પૂર્વવત સ્થિતિમાં લાવવામાં આવ્યા નથી. સ્થાનિક રહીશો અને સામાજિક કાર્યકરોએ જણાવ્યું હતું કે, વરસાદના કારણે કાદવ અને ગંદકીથી બાળકો, વૃદ્ધો તેમજ વાહનચાલકોને સૌથી વધુ મુશ્કેલી પડી રહી છે.
રહીશોએ મ્યુનિસિપલ કોર્પોરેશનને રજૂઆત કરીને અધૂરી કામગીરી તાત્કાલિક પૂર્ણ કરવા, ખાડાઓ પુરવા અને અસરગ્રસ્ત વિસ્તારોમાં વિશેષ સફાઈ અભિયાન હાથ ધરવાની માગ કરી છે.
