આ પણ વાંચો ટ્રેન્ડિંગ સમાચાર
દિલ્હી અને રાજકોટમાં હાથસાફ કર્યા બાદ વડોદરા આવેલી : રાજકોટની મેડિકલ હોસ્ટેલમાંથી ચોરેલા દાગીના મળ્યા : વડોદરાની ગોત્રી મેડિકલ હોસ્ટેલ બહાર રેકી કરતી હતી ત્યારે પકડાઇ
વડોદરા/ રાજકોટ : વડોદરાના ગોત્રીની મેડિકલ કોલેજ બહારથી ગોરવા પોલીસે એક હાઇપ્રોફાઇલ કહી શકાય તેવી મહિલા ચોરને ઝડપી પાડી પૂછપરછ હાથ ધરી છે.
મેડિકલ કોલેજની હોસ્ટેલ બહાર એક મહિલા શંકાસ્પદ હાલતમાં હોવાની માહિતી મળતાં ગોરવાના પીઆઇ કિરીટ લાઠિયાએ સાદાવેશમાં ટીમને મોકલી હતી.પોલીસે આ મહિલા પર ખાસ્સો સમય નજર રાખ્યા બાદ તેની તપાસ કરતાં તે ચોરીના ઇરાદે ફરતી હોવાની વિગતોને સમર્થન મળ્યું હતું.
પોલીસના જણાવ્યા પ્રમાણે,મહિલાનું નામ દિપ્તી સિંઘ હોવાનું અને હાલમાં યુપીના લખનૌ ખાતેની સોસાયટીમાં રહેતી હોવાની પ્રાથમિક માહિતી મળી છે.તેની પાસેથી સોનાનું બ્રેસલેટ,નેકલેસ,વીંટી,બુટ્ટી અને પેન્ડન્ટ સહિતના રૂ.૨ લાખ ઉપરાંતની કિંમતના દાગીના મળી આવ્યા હતા.
વધુ તપાસ દરમિયાન આ મહિલાની રાજકોટ ખાતે પ્રદ્યુમન પોલીસ સ્ટેશન વિસ્તારમાં મેડિકલ કોલેજની હોસ્ટેલમાં ચાર દિવસ પહેલાં દિવસે એક રૂમમાંથી દાગીના ચોરવાના બનેલા બનાવમાં સંડોવણી જણાઇ આવતાં રાજકોટ પોલીસને જાણ કરવામાં આવી હતી. આ ઉપરાંત મહિલાએ દસેક દિવસ પહેલાં દિલ્હીમાં પણ કોઇ સ્થળે ચોરી કર્યાની કબૂલાત કરતાં દિલ્હી પોલીસને જાણ કરાઇ છે.ગોરવાના પીઆઇએ કહ્યું હતું કે,મહિલા બે-ત્રણ દિવસથી વડોદરા આવી હતી અને સ્ટેશન નજીકની એક હોટલમાં રોકાઇ હતી. અગાઉ વડોદરા આવી હતી કે કેમ અને તેના પરિવારમાં કોણ છે તેવી બાબતોએ પણ તેની પૂછપરછ કરવામાં આવી રહી છે.
