આ પણ વાંચો ટ્રેન્ડિંગ સમાચાર
Ahmedabad News: સ્માર્ટ અને સુરક્ષિત કહેવાતા અમદાવાદ શહેરના પૂર્વ વિસ્તારોમાં ચાલતી શટલ રિક્ષાઓમાં મુસાફરોનો કિંમતી સામાન ચોરી થવાના બનાવો વધી રહ્યા છે. હાલમાં જ રાજસ્થાનથી આવેલા એક મહિલા મુસાફર સાથે આવો જ એક બનાવ બન્યો હતો. મહિલા નરોડા મેમ્કો પાસે બસમાંથી ઉતરીને ગીતા મંદિર બસ સ્ટેન્ડ જવા માટે રિક્ષામાં બેઠા હતા, તે દરમિયાન તેમની નજર ચૂકવીને લાખોની કિંમતના દાગીના ભરેલા પર્સની ઉઠાંતરી કરવામાં આવી હતી.
13 તોલા સોનું અને 1 કિલો ચાંદીના દાગીના હતા
રાજસ્થાનના પાલી રોડ પર આવેલા એક ગામની આ મહિલા પૂના જવા માટે ગઇકાલે અમદાવાદ આવી હતી. નરોડા મેમ્કોથી કાલુપુર અને ત્યાંથી બીજી રિક્ષા ભાડે કરીને તે ગીતા મંદિર એસ.ટી. બસ સ્ટેન્ડ પહોંચી હતી. બસ સ્ટેન્ડ પર ઉતર્યા બાદ મહિલાને જાણ થઈ હતી કે તેની પાસે રહેલું પર્સ, જેમાં 13 તોલા સોનાના અને 1 કિલો ચાંદીના દાગીના તેમજ 5 હજારની રોકડ રકમ હતી, તે ગુમ થઈ ગયું છે.
કાગડાપીઠ પોલીસે ફરિયાદ નોંધી ચક્રો ગતિમાન કર્યા
આ ઘટના અંગે કાગડાપીઠ પોલીસ મથકે જાણ કરવામાં આવતા પોલીસે તપાસના ચક્રો ગતિમાન કર્યા હતા. મહિલાએ પોલીસને જણાવ્યું હતું કે પર્સમાં આશરે 20 લાખની કિંમતના દાગીના અને 5000 રૂપિયા રોકડા હતા. ફરિયાદને આધારે પોલીસે મુસાફરીના રૂટ પર આવતા તમામ મહત્વના પોઈન્ટ્સ તપાસવાનું શરૂ કર્યું હતું.
CCTV ફૂટેજના આધારે રિક્ષાચાલકની ધરપકડ
પોલીસ દ્વારા નરોડા મેમ્કોથી લઈને ગીતા મંદિર સુધીના તમામ સીસીટીવી ફૂટેજ ઝીણવટપૂર્વક તપાસવામાં આવ્યા હતા. ફૂટેજમાં દેખાતી શંકાસ્પદ રિક્ષાના નંબરના આધારે તપાસ લંબાવતા, ગણતરીના કલાકોમાં જ રિક્ષાચાલકને શોધી કાઢવામાં આવ્યો હતો. આખરે તમામ સોના-ચાંદીના દાગીના સાથેનું પર્સ સલામત રીતે મહિલાને પરત સોંપવામાં આવ્યું હતું.
